Комиын Сикт воӧ Кӧрткерӧс районса библиотека тэчасын зільысьяс збыльмӧдӧны #СелоМолодостьУспех уджтас, кӧні тӧдмӧдӧны ас районса том йӧзкӧд, кодъяс вылӧ видзӧдӧмӧн эскан: енби-водзмӧстчӧмӧн олӧмад позьӧ шедӧдны тӧдчана вермӧмъяс.
Талунъя миян гӧсьт – Илона Александрова. Сійӧ чужис да быдмис Кӧрткерӧс сиктын, а ӧні олӧ-уджалӧ Санкт-Петербургын, велӧдӧ томуловӧс шыладӧ. Илоналӧн олан туйыс петкӧдлӧ: уджачлунӧн да сьӧлӧмсяньыд зільӧмӧн артмас збыльмӧдны ичӧтдырся гуся кӧсйӧмтӧ.
–Илона, висьтышт челядьдыр йывсьыд. Кӧні чужин-быдмин? Сиктын олӧмкӧд йитчӧм кутшӧм яръюгыд казьтылӧмъяс колины?
–Чужи ме Кӧрткерӧсын. 1-4 классъясын велӧдчи шӧр школаын да тшӧтш босьті тӧдӧмлун искусство школаын. Сиктыс меным – бать-мам керка, семьяӧй, ёртъяс. Накӧд и йитчӧмаӧсь шоныд казьтылӧмъясӧй. Ме тшӧкыда волывлі библиотекаӧ, кӧні зілис Марина Юрьевна Нестерова мамӧй, да радейті лыддьысьны.
–Творчествоад кыдзи пырӧдчин?
–Дзолядырсянь на ветлі Пионер керкаӧ, кӧні велӧдчи ки помысь вӧчасьны: вурсьыны, кысьыны, сюмӧдысь мастеритны. Но медся ёна кыскис шылад.
–Мыйла бӧрйин буретш музыка?
–Витӧд классын пыри велӧдчыны Ю.А.Спиридонов нима искусство гимназияӧ. Ме серти, республикаын тайӧ медся бур школа. Босьті тӧдӧмлун хор юкӧнын, а водзӧ содті сям-кужӧмлунӧс искусство колледжын хорӧн дирижируйтан отделениеын.
Буретш колледжын, Вера Михайловна Стариковалӧн классын ме помӧдз радейтчи аслам профессияӧ. Медводдза курссянь нин босьтчи сьывны Вежа Степан кафедральнӧй вичкоын Алексей Сергеевич Разбаковлӧн чуйдӧмӧн да тшӧтш веськӧдлыны хорӧн. Гимназияын да колледжын лои пуктӧма водзӧ вылӧ зумыд подув.
–Кыдзи сетчис Санкт-Петербургӧ вуджӧмыс?
–Гимназия-колледжын велӧдісны асшӧра овны да зільны-водзмӧстчыны, та вӧсна мӧдлаӧ муні падъявтӧг-майшасьтӧг, кокниа. Мӧдарӧ на, быттьӧ бордъяси! И буретш Петыркарын збыльмӧді ассьым ичӧтдырся ыджыд кӧсйӧмӧс. Ӧд челядьдырйи на татчӧ волігъясӧ век окотиті овны тайӧ войвыв юркарас.
–Кор шуин босьтчыны велӧдны? Висьтышт ӧнія удж йывсьыд?
–Музыка училище помалӧм бӧрын пыри велӧдчыны Санкт-Петербургса культура да искусство госуниверситетӧ. Тӧдӧмлун содті профессор Лариса Николаевна Яруцкая дорын, а магистратура помалі доцент Владимир Юрьевич Поляков классын.
Коймӧд курсса студенткаӧн на куті велӧдны Санкт-Петербургын Курорт районса челядьлы искусство школаын. И ӧнӧдз сэні зіля. Талун ме веськӧдла челядь хорӧн. Уджӧй да школа – тайӧ менам шылада семья-котыр.
–Педагог уджын мый медъёна воӧ сьӧлӧм вылад?
–Ме помтӧг шуда. Ола-выла мирас медмича карын, уджала радейтана школаын. Быд лун тыр шудӧн, и таысь помтӧг аттьӧала олӧмсӧ. И ассьым уджӧс нинӧм вылӧ ог веж.
–Висьтышт Петербургын студент-музыкантлӧн лоӧмторъясӧн озыр олӧм йывсьыд.
–Олӧмыс вӧлі дзулькйӧн пуӧ! Гастроль, репетиция, карса медбуринъясын концертъяс. Нималана музыкантъяскӧд удж-аддзысьлӧм. Велӧдчигкості мойвиис волыны Латвияӧ, Литваӧ, Польшаӧ, Беларусьӧ да Россияса некымын карӧ: Выборгӧ, Петрозаводскӧ, Великӧй Новгородӧ, Вӧлӧгдаӧ, Улыс Новгородӧ.
Медся яръюгыд концертыс вӧлі Москваса консерваторияын. Петалі ӧти сцена вылӧ легендаяскӧд: Александра Пахмутовакӧд, Иосиф Кобзонкӧд, Тамара Гвердцителикӧд. Дирижёр пульт сайын вӧлі Валерий Халилов, а рояльӧн ворсіс ачыс Александра Пахмутова.
Музыка кындзи ёна куті водзмӧстчыны спортын: йога, тренажёра зал, ыджыд теннис. И ӧнӧдз уна путешествуйта да водзӧ сӧвмӧда ачымӧс.
–Мый эськӧ шуин-вӧзйин неыджыд кар-сиктысь томуловлы?
–Эн полӧй вӧчны гуся кӧсйӧм-мечталаньыд медводдза воськов. Лоӧй аскӧдныд веськыдӧн. Радейтӧй ассьыныд удж-ноктӧ, велӧдчӧй да сӧвмӧй. Некор шогӧ эн усьӧй. Олӧй асланыд олӧмӧн: аддзысьлӧй аслыспӧлӧс йӧзкӧд, путешествуйтӧй, ыштӧдчӧй да сӧвмӧй.
–А мый эськӧ шуин аслыд, 16 арӧсалы?
–Тэнад ставыс артмас! И олӧмад быд тшупӧд – гуся кӧсйӧм збыльмӧдӧмлань воськов.
–Аттьӧ, Илона, сьӧлӧмсянь восьса да бурас ышӧдана сёрниысь! Мед шылад вӧчас олӧмтӧ мыла-лӧсьыд-мичаӧн, пытшкӧсса камертоныд стӧча индас выль кӧсйӧмъяслань туй, а быд лун лоӧ тыр мича мелодия-горӧн. Творчествоын выль вермӧмъяс да енбиа велӧдчысьясӧс!
Анна Никифорова. Комиӧдіс Елена Плетцер.
Снимокъясыс Илона Александровалӧн гортса архивысь.