Гашкӧ, асшӧр уджӧ босьтчыны? Али бурджык корсьны да инасьны кытчӧкӧ удж вылӧ? Оз этшаӧн майшасьны, кор сійӧ либӧ мӧд помка вӧсна воштӧны нажӧтканысӧ да быттьӧ веськалӧны дзугйӧ.
Буретш такӧд йитӧдын Комиын судзсьытӧма олысь торъя йӧзлы да семьяяслы вӧзйӧны кырымавны социальнӧй контракт, код вылӧ подуласьӧмӧн позьӧ босьтны государствосянь сьӧма отсӧг. Программаыс збыльмӧдсьӧ «Семья» национальнӧй проект весьтӧ.
Таво заводитчӧмсянь миян республикаын олысьяс, на лыдын уна челядя 88 семья да спецоперацияса дас куим ветеран, кырымалӧмаӧсь нин 509 соцконтракт.
Казьтыштам, тайӧ документ сертиыс йӧзӧс социальнӧя доръян шӧрин вичмӧдӧ мортыслы сьӧма отсӧг, медым сійӧ инасис удж вылӧ либӧ паніс ассьыс бизнес.
Таво спецоперация вылысь демобилизуйтчӧмаясӧс тӧд вылӧ босьтӧмӧн соцконтракт программаас пыртӧма тӧдчана вежсьӧмъяс. Медвойдӧр накӧд да чӧжӧснысӧ артышттӧг шуӧма кырымавны асшӧр уджӧ босьтчӧм кузя сёрнитчӧмсӧ. Та могысь спецоперацияса ветеранлы колӧ гижӧдчыны занятосьт службаын да босьтны «Айму дорйысьяс» государственнӧй фондысь колана кабала.
Татшӧм позянлунсӧ сетӧма и СВО-са первой да мӧд группаа инвалидъяслӧн гӧтыръяслы, верӧсъясныс кӧ эз кырымавлыны соцконтрактсӧ.
Коми Республикаса удж да йӧзӧс социальнӧя дорйӧм кузя министерствоӧн веськӧдлысь Татьяна Майковалӧн висьталӧм серти, соцконтрактысла шыӧдчысьяс бура гӧгӧрвоӧны, мый ас саяныс, бурмас-ӧ налӧн да семьяныслӧн олӧмыс. Та могысь медвойдӧр аслыныс колӧ зільны-водзмӧстчыны. А государствосянь сьӧма отсӧгыс збыльысь тӧдчана. Сідз, предпринимателявны босьтчысьлы шуӧма вичмӧдны ӧтпырйӧ 350 сюрс да ас овмӧс лӧсьӧдысьлы – кыксё сюрс шайтӧдз.
Удж корсьӧм ради республика лунвылын олысьлы тӧлысся пособиесӧ урчитӧма 22.316, а войвылын – 27.610 шайт.
И ставсьыс таысь водзӧсыс эм нин. Сідз, тавося январсянь удж корсьӧм могысь соцконтракт кырымалӧма Комиын 242 олысь. Бизнесӧ нырччыны босьтчӧмаӧсь дас ӧкмысӧн, на лыдын спецоперацияса квайт ветеран. Комын куимӧн лӧсьӧдӧмаӧсь ассьыныс подсобнӧй овмӧс.
Нӧшта комын витӧн соцконтрактсӧ кырымалӧмаӧсь сы могысь, медым венны олӧмас мытшӧд, на лыдын инвалидъяс да сьӧкыда нёрпалысьяс, кодъяс омӧль дзоньвидзалун пондаыс мыйдыракӧ оз вермыны уджавны. <>
Гижӧдсӧ дасьтiс Александра Артеева. Снимокыс ӧтувезйысь.