Ыджыдвидз сиктса велӧдысьяс важысянь радейтӧны ветлыны мукӧд школаӧ, кывзыны урокъяс, видзӧдлыны, кыдзи олӧны-вылӧны-велӧдчӧны республикаса нималана школаясын. И быдлаын уна буртор аддзылім, асланым уджӧ пыртім.
Сідз, автобусӧн ветлім Паджгаӧ, кор сэтчӧс школаса директорӧн вӧлі Мария Вячеславовна Кузьбожева. Велӧдысьяс да гырысь классъясын велӧдчысьяс ветлім и Емва карса школаӧ. Миян школаын директорнас сэки вӧлі Нина Петровна Мишарина.
А кор Ыджыдвиддзын выль школа кыпӧдісны, асьным нин кутім вочаавны Висер вожса сиктъясысь велӧдысьясӧс, ветлывны и на дорӧ. Век бура дасьтысьлім аддзысьлӧмъяс кежлӧ.
Миян паныдасьлӧмъяс йылысь йӧзӧс велӧдан министерствоын уджалысь висьталӧма и мукӧд районса велӧдысьяслы, ошйысьӧма, кутшӧм кыпыда да гажаа найӧ мунӧны, да тшӧктӧма и налы котыртлыны татшӧм аддзысьлӧмъяссӧ.
Бӧръя воясӧ мыйлакӧ дугдылісны паныдасьлыны. Но со мартын Одыбса велӧдысьяс Любовь Александровна Королёва да Мария Олеговна Хайрединова веськӧдлӧм улын бара корисны волыны на дорӧ Ыджыдвидзса да Висерса велӧдысьясӧс.
Март 13 лун кежлӧ лэдзӧмаӧсь быдӧнлы аслыспӧлӧс буклет, кытчӧ гижӧмаӧсь, мый лоас аддзысьлӧм дырйиыс.
Ӧкмыс часӧдз коліс нин воӧдчыны школаӧдзыс. Кыдзи и век, одыбсаяс зэв бура дасьтысьӧмаӧсь. Школаыс зэв кыпыд, став коланасӧ мичаа вӧчӧма классъясын, коридоръясын. Миянӧс медводз чайӧн да чӧскыдторъясӧн гӧститӧдісны.
Сэсся 1-ӧдсянь 10-ӧд классӧдз вӧліны быд предметысь восьса урокъяс – ставыс 13. Позис пырны кӧть кутшӧм классӧ. Дерт, учительяс и велӧдчысьяс бура лӧсьӧдчӧмаӧсь.
А школаӧ локтӧдз Ыджыдвиддзысь математика вӧвлӧм велӧдысьяс Нина Николаевна Иванова да Любовь Александровна Головкина пыралісны гортас Одыбса математика вӧвлӧм велӧдысьяс дорӧ, кодъяс ӧні оз нин вермыны волыны аддзысьлӧм вылас. Водзті ӧта-мӧдыскӧд век паныдасьлісны, юксисны выльторъясӧн. И ӧні налы эм мый йылысь варовитны. Час чӧж сёрнитӧмыс зэв ӧдйӧ лэбис, и корисны на, мед Ыджыдвидзса уджъёртъясыс на дінӧ нӧшта воласны, мед дырджык на сёрнитны.
Школаын жӧ и мастер-классъяс вӧліны. Татьяна Васильевна Петрова нуӧдіс ворсӧмъяс да шымыртіс наӧ став воысьсӧ. Юксис сійӧ и опытнас, ӧд татшӧмсӧ быд школаын позьӧ котыртлыны.
Сэсся вӧлі «Мелодия наших сердец» концерт. Миянӧс водзвыв корисны дасьтысьны да тшӧтш петкӧдчыны. Ставыс кажитчис.
Куим школаысь велӧдысьяс ӧтлаын и снимайтчим.
Пажын дырйи чай юигмоз да чӧскыд пӧжасӧн чӧсмасигӧн быдӧн бара вермис висьтасьны-казьтывны – и пызан сайын аддзысьлӧмыс водзӧ муніс.
Кыдзи и быд паныдасьлігӧн, Одыбса велӧдысьяс эз кольны гӧсьтъясӧс козинтӧг – найӧ век тадзи колльӧдӧны волысьясӧс. Да и Ыджыдвидзса да Висерса котыръяс эз куш киӧн локны.
Аттьӧала Одыбса велӧдысьясӧс миянӧс бура примитӧмысь. Локтан воӧ шуим аддзысьлыны Висерса школаын – сэтчӧс велӧдысьяслы сетісны та могысь вуджан кубок.
Татшӧм паныдасьлӧмъясыс зэв коланаӧсь и ӧнія велӧдысьяслы, и ветеранъяслы, мед казьтышны уна вося уджсӧ, челядьлы бур тӧдӧмлун сетӧмсӧ. Жаль сӧмын, эз вермыны волыны Кӧрткерӧс районса образование юкӧнын зільысьяс, кӧть эськӧ одыбсаяс найӧс ёна виччысисны. <>
Анна Александровна Попова. Снимокъясыс ӧтуввезйысь.