Март 27 лунсянь апрель 3 лунӧдз Луздорын муніс «Неделя театра в Прилузье» республикаса XIII фестиваль, коді ӧтувтіс регионса любительскӧй театр котыръяс.
Коми Республикаса юралысь Ростислав Гольдштейн тӧдчӧдіс, тавося тайӧ гажыс пӧ аслыспӧлӧс, йитчӧма Комиын Сикт да Россияын войтырӧс ӧтувтан вояскӧд да. Сійӧ аттьӧаліс фестивальсӧ котыртысьясӧс, видзӧдысьясӧс сиктын культура нимӧдӧм-паськӧдӧмысь да пасйис, мый татшӧм аддзысьлӧмыс быдӧнлы козьналӧ вунӧдны позьтӧм здукъяс.
Культура да шойччан шӧринын петкӧдчисны Сыктывкарысь, Емваысь, Интаысь, а сідзжӧ Сыктывдін, Кӧрткерӧс, Емдін, Сыктыв, Луздор, Кулӧмдін районъясысь 17 котыр.
Фестивальсӧ восьтіс Абъячойысь Г.Д.Горчаков нима театр «Последний срок» спектакльӧн, кӧні сиктса олӧмсӧ бура петкӧдлӧма.
Мый аддзыліс тайӧ гаж дырйиыс видзӧдысь? Коми да роч кывъясӧн драма да серамбана спектакльяс, артистъяскӧд творчествоа аддзысьлӧмъяс да мастер-классъяс. Вӧлі позянлун пыравлыны и кулиса сайӧ да тӧдмавны артистъяслысь гусяторъяс. Таысь кындзи ордйысисны художествоа кывйӧн мастера вӧдитчысьяс.
Артистъяс тырвыйӧ нимкодьӧдісны видзӧдысьӧс асланыс кужанлун-сямӧн. Шуам, Кӧрткерӧс районсянь петкӧдчис «Браво» том йӧз театр бердын «Театральные ладушки» котыр. Режиссёр Людмила Казакова юрнуӧдӧм улын артистъяс петкӧдлісны Владимир Илюховлӧн пьеса-басня серти «Кто в лесу главный?» спектакль. Том артистъяс сяммисны тырвыйӧ пырӧдчыны асланыс рольӧ, а видзӧдысь гораа клопайтіс налы.
А Печораысь народнӧй театр дасьтӧма Николай Гоголь повесьт серти «Вий». Енбиа артистъяс кужисны ясыда петкӧдлыны сійӧ шуштӧм, шӧйӧвоштана здуксӧ, кор том семинарист Хома Брутлы ковмис куим вой лыддьыны молитва панночкалы.
Вӧрзьӧдіс видзӧдысьӧс и Кулӧмдін районса Помӧсдінысь йӧзкостса театр. Артистъяс вайисны фестиваль вылӧ война кадӧ колхозын зільысь аньяслӧн сьӧкыд олӧм йылысь «Нывбабаяс» спектакль. Найӧ мырсьӧны лун и вой, кыскӧны ас выланыс став сьӧкыдсӧ, виччысьӧны верӧсъяснысӧ фронт вылысь да эскӧны Победаӧ.
Интаысь «Поиск» театрса режиссёр, Коми Республикаса заслуженнӧй уджалысь Артуш Арзаканцян веськӧдлӧ котырнас 1981 восянь. Сылӧн юрнуӧдӧм улын артистъяс петкӧдлісны гижысь-фронтӧвик Вячеслав Кондратьевлӧн повесьт серти «Отпуск по ранению» спектакль. Тайӧ Володька лейтенант йылысь история, кодӧс Ржевын ранитчӧм бӧрын лэдзӧны отпускӧ, да сійӧ локтӧ Москваӧ. Но нимкодясьӧм пыдди майшасьӧ: тылын – мирнӧй олӧм, а передӧвӧйын пуктӧны юрнысӧ сылӧн ёртъясыс. Геройлы ковмис бӧрйыны: кольччыны радейтана ныв дорас либӧ бӧр мунны воинскӧй часьтас. Артистъяс бура петкӧдлісны сылысь майшасьӧмсӧ. Видзӧдысь чӧла пукаліс спектакль чӧж да тшӧтш майшасис геройкӧд…
Сыктывкарысь «Люди» театр студия петкӧдчис «Время героев? Гениев!» спектакльӧн, кодӧс сиисны искусствоын зільысьяслы. Айму вӧсна Ыджыд тыш дырйи сьӧкыдлун вылӧ видзӧдтӧг найӧ эз эновтчыны асланыс творчествоысь. Налӧн ӧружиеыс – абу винтовка, а кыв, шылад, мавтчан кисьт…
Сцена вывсянь артистъяс казьтылісны Евгений Вучетичӧс – «Родина-мать зовёт!» нималана скульптуралысь авторӧс, «Жди меня» кывбур гижысь Константин Симоновӧс, Ленинградса симфония гижысь композитор Дмитрий Шостаковичӧс, тшӧтш и Любовь Орловаӧс да Клавдия Шульженкоӧс, кодъяс асланыс сьыланкывъясӧн шонтісны салдатъясӧс окопын.
Видзӧдысьяс эз дугдывны клопайтны артистъяслы, сэтшӧм бура найӧ петкӧдчисны да.
* * *
Уджтасыс збыльмӧдсьӧ «Семья» национальнӧй да «Семейные ценности и инфраструктура культуры» федеральнӧй проектъяс весьтӧ.
Жюриӧн веськӧдліс Санкт-Петербургысь театрса критик Любовь Боярская. Артистъясӧс сідзжӧ донъялісны Коми Республикаса Н.М.Клермон нима театрысь режиссёр Анастасия Казакова да регионса опера да балет театрын сьылысь Елена Серкова.
«Неделя театра в Прилузье – 2026» фестивальлысь Гран-присӧ шуисны сетны Интаысь «Спутник» котырлы, коді петкӧдчис Светлана Алексиевичлӧн повесьт серти дасьтӧм «Последние свидетели» спектакльӧн.
Медводдза степеня диплом босьтісны Айкатылаысь «Соседи» котыр «Палата бизнес-класса» спектакльӧн, мӧдсӧ – Сыктывкарысь «Радость моя» котыр «Саша Пон» петкӧдчӧмӧн, а коймӧдыс вичмис Абъячойысь Г.Д.Горчаков нима театрлы «Последний срок» спектакльысь.
«Мужичӧйяс пӧвстын медбур роль» нимпасын вермысьнас лоис Аким-Жан Корнаков, коді ворсіс Хома Брутӧс. А аньяс пӧвстын медбур ворсысьнас шуисны Альбина Касаӧс. Сійӧ «Последний срок» спектакльын ворсіс Анна пӧчӧс.
«Челядьлы медбур спектакль» нимпасын вермысьӧн шуисны Сыктывкарысь «Созвездие» театр студия. А коми кывйӧн медбура петкӧдчисны Сыктывдін районса Выльгортысь Степан Ермолин нима драма театрысь артистъяс, кодъяс нимкодьӧдісны видзӧдысьӧс «Ӧтка олӧм – абу олӧм» спектакльӧн.
<> Екатерина Микушева. Снимокъясыс ӧтуввезйысь.