Коми йӧзӧдчан керка пӧшти во чӧж нуӧдіс Россияын Айму дорйысь да Комиын герой вояслы, а сідзжӧ Ыджыд Вермӧмсянь 80 вося тшупӧда паслы сиӧм
«Менам герой» конкурс.
Шулім эськӧ конкурслы кывкӧртӧдсӧ вӧчны октябрын, но гижӧдыс сы мында воис – ставыс кыксё сайӧ – мый ковмис нюжӧдны декабрӧдз на.
И со воис кад став гижӧдсӧ донъялӧмӧн сигӧртны конкурссӧ.
Медводз ыджыдысь-ыджыд аттьӧ висьталам конкурсӧ дзик быд пырӧдчысьлы!
Сэтшӧм бур, сьӧлӧм вӧрзьӧдана да интереснӧй гижӧдъяс воисны!
Нимкодь, мый конкурсӧ пырӧдчисны и зонпосни, и томулов, и верстьӧ, и олӧма. Торъя аттьӧ висьталам школаын велӧдысьяслы быдтасъяснысӧ тайӧ аслыспӧлӧс творческӧй уджас пырӧдчыны ышӧ-дӧмысь.
Асланыд гижӧд-уджъясын ті нимӧдінныд Айму вӧсна Ыджыд тышса ветеранӧс, тылын Победа дорысьӧс, зіль да уджач войтырӧс, торъя военнӧй операцияын пӧгибнитӧмаӧс да талун СВО-ын служитысьӧс. Найӧ ставныс – збыльысь геройяс!
Кызвын уджсӧ, дерт, йӧзӧдім «Коми му» газетын.
Конкурс вылӧ воӧм быд гижӧд пырис нин историяӧ. Локтан воӧ «Войвыв кодзув» журнал выль пӧв кӧсйӧ йӧзӧдны медбур очеркъяссӧ торъя петасын.
Та пӧрйӧ жюрилы вель сьӧкыд вӧлі бӧрйыны вермысьяссӧ. Но конкурсыд сы вылӧ и эм, медым бӧрйыны вермысьясӧс.
Местаяс некодлы эг вичмӧдӧй, а шуим торйӧдны медбур уджъяссӧ, кодъяс вӧрзьӧдісны сьӧлӧмсӧ жюрилысь, редакцияын зільысьяслысь да тшӧтш и лыддьысьысьяслысь.
И сідз, «Менам герой» конкурсын вермысьлысь диплом сетӧма Дарья Чупровалы, Лада Уляшевалы, Дарья Макаровалы, Ольга Ивановна Мишариналы, Елена Николаевна Музыкантлы, Любовь Александровна Ванеевалы, Игорь Валерьевич Колесовлы, Нина Николаевна Ивановалы, Елена Александровна Игнатовалы, Евгения Николаевна Ивашевалы.
Ті ыджыд молодечьяс!
Козинъяс вичмасны Коми йӧзӧдчан керкалӧн «Ордым» лавкасянь, «Арт» журнал редакциясянь да «Коми козин» котырсянь.
Конкурсӧ мукӧд пырӧдчысьлы вичмӧдам аттьӧалана гижӧд (ыджыд корӧм: шыӧдчӧй миян дорӧ, да ыстам электроннӧй вариант).
* * *
Содтӧд юалӧмӧн позьӧ шыӧдчыны «ВКонтактеын» Коми йӧзӧдчан керкаса группаӧ да тшӧтш и 8(212)24-15-19; 24-01-16 телефонъяс пыр.
Нӧшта ӧтчыд чолӧмалам ставнытӧ зэв колана да тӧдчана конкурсӧ пырӧдчӧмысь!
Галина Макарова, Коми йӧзӧдчан керкаӧн веськӧдлысь.