Европаын пӧ нывбабаяслы саридз да ты-ю дорын оз позь пӧрччысьӧмӧн гожйӧдчыны, мусульмана странаясысь воӧмаясӧс тайӧ скӧрмӧдӧ да. И мыж вӧчӧмысь мигрантъясӧс сэтчӧс полиция ёнасӧ оз лысьт чиршӧдлыны-кутавны.
Россияын серпасыс абу на сэтшӧм шуштӧм. Но гырысь каръясын, торйӧн кӧ Москваса Котельники, Капотня да Гольяново районъясын, суйӧрсайса воӧмаясысь пикӧ жӧ воӧмаӧсь. А Ханты-Манси автономия кытш лоӧма нин мусульманалӧн аслыссяма этноанклавӧн, кытысь вужвойтырыс дасьӧсь кытчӧкӧ пышйыны…
А кыдзи та боксянь Комиын? Уна-ӧ мигрант талун республикаын, лючки-ӧ олӧны да уджалӧны?
Та йылысь висьталіс Комиын «Справедливая Россия – за правду» ютыр юкӧнӧн веськӧдлысь, республикаса Госсӧветысь депутат Татьяна Саладина.
–Татьяна Алексеевна, миграция боксянь кутшӧм серпасыс Комиын?
–Ӧткодявны кӧ Европакӧд, Москвакӧд да сійӧ жӧ Ханты-Манси автономия кытшкӧд, миян регионын серпасыс бурджык. МВД-ысь юӧр серти, Комиын бокысь воӧмаыс чиныштӧма 4,3 прӧчент. Сідз, мӧйму вӧлӧма 4.071 морт, а таво заводитчигӧн – 3.894. Казьтыштны кӧ 2016 во, сэки республикаын артавсьӧма 11 сюрс мигрант.
Медсясӧ локтӧны Узбекистанысь, Азербайджанысь, Таджикистанысь, Киргизияысь, Арменияысь, Белоруссияысь, Украинаысь да Казахстанысь. Уджалӧмысь ӧтдор тані и велӧдчӧны. Индияысь сё гӧгӧр студент босьтӧ тӧдӧмлун Сыктывкарса госуниверситетын.
Кад кежлӧ Комиӧ воӧма 269 морт, мӧйму дорысь 26 прӧчентӧн этшаджык. Овмӧдчӧма 8 прӧчентӧн этшаджык жӧ – 1.928 морт. 731-сянь 507-ӧдз чинӧма и Россияса гражданство босьтысьыс.
Тыдалӧ, чиныштӧмыс лоис сы понда, мый бӧръя воясӧ Россияын миграция кузя оланпасъясӧ пыртісны уна содтӧд-вежсьӧм. Дерт, тайӧс медводз вӧчисны сьӧд да лёк дум-кӧсйӧмӧн воысьяслы паныд водзсасьӧм могысь. Бокӧвӧй войтыр, кодъяс пыдди пуктӧны Россиялысь история, культура, эскӧм, кыв да оланпасъяс, видзӧны вӧр-ва да оз сюйсьыны государство политикаӧ, та боксянь нинӧм ёнасӧ эз и казявны. Сэсся оланпас серти Россияса гражданство босьтӧм бӧрын 18-60 арӧсалы сизим лунӧн колӧ петкӧдчыны военкоматӧ да сувтны учёт вылӧ. Тайӧс кӧ оз вӧчны вежонӧн, бӧр ковмас мунны суйӧр сайӧ.
Талун суйӧр сайысь воӧм сюрс морт зільӧ да олӧ Усинскын. Унаӧн поздысьӧмаӧсь и Сыктывкар, Ухта, Воркута, Печора, Инта, Вуктыл да Сосногорск каръясын, а сідзжӧ Сыктывдін, Княжпогост, Мылдін да Кулӧмдін районъясын.
Суйӧр сайысь унджык воӧмаыс (30,2%) уджалӧ стрӧитчан юкӧнын. Унаӧн вузасьӧны (19,3%). 9-15 прӧчент инасьӧмаӧсь трубопровода транспортӧ, мупытшкӧсса озырлун перъян да мукӧд предприятиеӧ. 10,8 прӧчентыс зільӧ видз-му овмӧсын, вӧралан да чери кыян котырын.
–И став мигрантыс лючки олӧ-уджалӧ?
–Мӧйму погона йӧз волӧмаӧсь 5.300 предприятие-организацияӧ. Миграция оланпас торкалӧмысь судлӧн кывкӧртӧд серти Комиысь ыстӧмаӧсь 212 мортӧс, а таво майын нӧшта 33-ӧс (13-ӧс – Узбекистанӧ, кӧкъямысӧс – Таджикистанӧ да сизимӧс – Киргизияӧ).
Прокуратураысь юӧр серти, миграция оланпас кольӧм воын торкӧмаӧсь 53-ысь. На серти лӧсьӧдӧма 11 представление, предприятие-организацияӧн 9 веськӧдлысьӧс кыскӧмаӧсь административнӧй кывкутӧмӧ, судӧ ыстӧмаӧсь 2 иск.
Мигрант йылысь оланпас торкалӧны и татчӧс олысьяс. Сідз, Усинскысь 45 арӧса нывбаба ас патераас гижӧдӧма Узбекистанысь вит мортӧс.
42 арӧса мужичӧй да 34 арӧса нывбаба оланпас торкӧмӧн жӧ овмӧдӧмаӧсь Азербайджанысь 29 арӧса том мортӧс.
А Воркутаысь ань 15 сюрс шайтысь гижсьӧма суйӧр сайысь воӧмакӧд. Выль верӧсыслы тайӧ сетӧма позянлун овмӧдчыны миян странаын да босьтны Россияса гражданство. Кыкнаннысӧ кыс-кӧмаӧсь уголовнӧй кывкутӧмӧ.
–Кыдзи мигрантъяслы потшны миянӧ туйсӧ?
–«Справедливая Россия – за правду» ютырӧн веськӧдлысьяс да Госдумаын миян фракцияса депутатъяс миграциякӧд йитӧдын вӧзйӧны уна вежсьӧм-содтӧд, асьныс дасьтӧны выль оланпасъяс. Сідз, 2021 восянь миян партиечьяс татшӧмсӧ лӧсьӧдӧмаӧсь 40-ӧс. Дерт, Госдумаса мукӧд депутат мыйсюрӧ ошкӧны, а кутшӧмкӧ вӧзйӧмтор косӧдӧны.
Мӧйму декабрын образование йылысь оланпасӧ миян партиялӧн вӧзйӧмӧн пыртісны вежсьӧмъяс. На серти суйӧр сайысь воӧмаяс специалитет программа серти вермӧны босьтны медвылыс тӧдӧмлунсӧ оз сӧмын вузын, но и наука организацияын.
–Тіян фракциялысь кымын вӧзйӧм видлалӧны Госдумаын?
–Талун татшӧмыс 15.
Медводз вӧзъям ӧвтыштчыны патентысь. Сы серти визатӧм странаысь 70 прӧчент мигрантыс зільӧ «вуджӧр сайын». Найӧс вермӧны донтӧм донысь уджӧдны быдлаын. Та пыдди миян партия вӧзйӧ уджавны вахтаӧн, кор быд морт вермас локны предприятиеӧн веськӧдлысьлӧн корӧм серти урчитӧм кад кежлӧ да зільны индӧм уджаланінын. Та дырйи ассьыс семьясӧ оз вайӧд, некытчӧ оз гижӧдчы да оз босьт гражданство. Локтіс, уджаліс, муніс. Араб странаясын важӧн нин тадзи вӧчӧны.
Патентысь ӧвтыштчыны вӧзъям и сы понда, мый бизнес мынтӧ мигрантлы зэв ичӧт удждон, торкӧ уджалан право да содтӧ уджтӧмалӧм.
Миян вӧзйӧм серти ружье позьӧ вузавны сӧмын сылы, коді вит воысь дырджык нин Россияса гражданин.
Колӧ кокньӧдны миян странаӧ локны налы, кодъясӧс кедзовтӧны да кӧсйӧны кыскыны уголовнӧй кывкутӧмӧ Россияса политика ошкӧмысь.
Колӧ киритны гражданство налысь, кодъяс ылӧдчӧмӧн шедӧдісны роч кыв тӧдӧм йылысь сертификат. Вонас куимысь позьӧ дон вештытӧг видлыны сдайтны роч кывйысь тест. Детсад-йысь, школаысь да мукӧд велӧдчанінысь бокысь воӧмалы колӧ мынтысьны. Роч кывтӧг школаӧ мигрантлысь челядьсӧ босьтны оз позь. Вӧзъям, медым суйӧр сайысь воӧмаыс быд классын вӧлі 10 прӧчентысь этшаджык.
Кык да унджык гражданствоа мортлы колӧ 6 тӧлысьӧн мынтӧдчыны наысь да кольны ӧтиӧс.
Мигрант кӧ вӧчис мыж, став семьясӧ депортируйтасны пыр жӧ, а ачыс сійӧ вештас мыжсӧ тані, но дзескыдінысь мездмӧм бӧрас ыстасны гортас. И водзӧ вылӧ татшӧмыслы туйыс миянӧ лоас пӧдса. Оз позь котыртны миян странаын национально-культурнӧй автономия, диаспора да землячество.
Суйӧр сайысь воӧмалысь, сійӧ кӧ миян странаын мӧдас овны-уджавны 90 лунысь дырджык, босьтӧны чунь пом туйсӧ (вӧчӧны дактилоскопия).
Ми вӧзъям содтыны мыж сикассӧ, мыйысь мырддьӧны Россияса гражданство.
Оланпас торкӧмӧн удж вылӧ мигрантӧс иналӧмысь штрапсӧ колӧ содтыны 2-10 пӧв.
–Партияыдлысь уна-ӧ вӧзйӧм бергӧдісны бӧр?
–Госдумаса депутатъяс бӧр бергӧдісны 18 вӧзйӧм.
Ми корим патент серти уджысь вотсӧ содтыны 1.200 шайтсянь 4.800-ӧдз.
Вӧзйылім кык пӧв содтыны вот, тшӧтш и транспортысь да эмбурысь кык да некымын гражданствоа войтырлы, Беларусьысь, Абхазияысь да Лунвыв Осетияысь воӧмаясысь ӧтдор.
Сідз шусяна дружескӧй странаса войтыр вермасны 14 лун овны Россияын визатӧг. Суйӧрсайса олысь, коді 2014 вося май 11 лунсянь дорйис ДНР, ЛНР, вермас кокньыдджыка да ӧдйӧджык босьтны Россияса гражданство.
Предприятиеӧ оз позь босьтны став уджалысьысь 5 прӧчентысь унджык мигрантӧс. Налы оз позь зільны 77 сикас удж вылын (медицинаын, фармацевтикаын, школаын, аптекаын, таксиын, новлӧдлыны груз да йӧзӧс).
Миян фракция вӧзйыліс босьтны мигрантлысь депортация вылӧ депозит, мынтысяна медстраховка, ДМС полис, кодъяс эськӧ вештісны депортацияысь да бурдӧдчӧмысь став рӧскодсӧ.
Миян странаын нывбабалы оз позь новлыны чужӧмсӧ тупкан кышӧд-чышъян.
Вӧзъям лӧсьӧдны миграция политика министерство.
Чайтам, миграция тшӧт весьтӧ оз позь бурмӧдны демография, содтыны Россияын олысь да уна челядя семьясӧ.
Миянӧс майшӧдлӧ оз сӧмын сідз шусяна нелегальнӧй, но и легальнӧй миграция.
Кыдз аддзам, ми абу миграциялы паныд. Миян партия ошкӧ ыджыд опыта да тӧдӧмлуна суйӧрсайса специалистъясӧс, кодъяс пыдди пуктӧны миянлысь история, культура да оланпасъяс. Татшӧмыслы, мӧдарӧ, колӧ кокньӧдны миян странаын олӧмсӧ да уджсӧ.
<> Николай РАЗМЫСЛОВ. Снимокыс авторлӧн.