Сентябрь 9 лунӧ республикаын олысьяскӧд «веськыд йитӧд» кутӧмӧн Комиын юралысьлысь удж вӧчысь Ростислав Гольдштейн вочавидзис налӧн, а сідзжӧ йӧзлы юӧр сетан тэчасын зільысьяслӧн да общественнӧй котыръясын водзмӧстчысьяслӧн юалӧмъяс вылӧ.
Кыдзи тыдовтчис, Комиын олысьясӧс медъёна майшӧдлӧны йӧзлы социальнӧй отсӧг сетан да дзоньвидзалун видзан юкӧнъясын, жилищно-коммунальнӧй овмӧсын тырмытӧмторъяс, тӧждысьӧны найӧ и вӧр-валӧн сӧстӧмлун вӧсна.
Регионын веськӧдлыськӧд сёрни дырйи кыпӧдлісны и уна сикас мукӧд юалӧм. Сідз, Вылыс Максаковкаысь Александр Осетров висьталіс, миян посёлокын пӧ абу челядьлы ворсанін, Мылдін сиктын олысьяс норасисны ёг-шыблас петкӧдӧмсӧ ковтӧм ногӧн котыртӧм вылӧ.
Помкаыс абу чужйыштӧмын
Регионӧн веськӧдлысь дорӧ шыӧдчысьяс пӧвстын медунаӧн элясисны шогмытӧм туйяс вылӧ. Княжпогост районын олысьлӧн кывъяс серти, республикаын медся лёк туйыс Сереговсянь Емдін сиктӧдз. И ті кӧ пӧ, Ростислав Эрнстович, чорыдджыка он чужйыштӧй дӧзьӧритысьяссӧ, нинӧм оз и вежсьы.
–Сӧмын кӧ чужйыштӧмын помкаыс вӧлі, регионысь став туйсӧ нин позис дзоньтавны. Водзын уджыс помтӧм миянӧс виччысьӧ. Могыс – вӧчны сідз, мед 2030 воӧдз Комиын туйяс лоисны медся бурӧсь кӧть нин Рытыв-Войвыв кытшын. И оз ков гӧп-гуран тыртны, сэки ӧд некор нинӧм оз артмы, – шуис Ростислав Гольдштейн.
Медводз, пасйис регионӧн веськӧдлысь, пӧрадокӧ колӧ вайӧдны Ухта – Сыктывкар кодь автомагистральяс, а сэсся нин босьтчыны дзоньтавны сикт-посёлок йитан туйяс. Татшӧм уджысь пӧ водзӧсыс эм: уна во чӧжӧн «Безопасные качественные дороги» нацпроект серти республикаын вӧлі дзоньталӧма муртса 350 километр туй, а таво лоӧ выльмӧдӧма 220 километр.
2025 воын туйяс вылын удж вӧчӧм могысь вӧлі торйӧдӧма 13 миллиард шайт – воддза воас серти матӧ кык пӧв унджык.
–Дырнӧсса дачаясӧ туйсӧ таво бурмӧдны эз артмы, но сійӧс ми быть капитальнӧя дзоньталам: 2026 воӧ выльмӧдам 2,1 километр, нӧшта куимӧс – 2027 воӧ, – содтіс Ростислав Гольдштейн.
Республикаӧ воӧмаӧсь нин асфальт вӧчан передвижнӧй заводъяс. На пиысь ӧтиӧс уджӧдӧны нин Удораын, мӧд завод сувтӧдӧны Печора районын.
Позьӧ донтӧмджыка
Воркутаӧ ваыс воӧ Усва юысь, но 26 километр кузьта водоводыс ёна нин важмӧма, и воркутаса элясьӧны, мый уна во нин некыдз оз путьмыны дзоньтавны сійӧс.
–Кор ме вӧлі Воркутаын, меным висьталісны, мый Усвасянь водовод выльмӧдӧм вылӧ ковмас 15 миллиард шайт. Но пыдісяньджык мӧді тӧдмасьны тайӧ мытшӧднас да, тыдовтчис, мый кызь квайтсьыс 10 километрсӧ дзоньтавны позьӧ 800 миллион шайтысь: «Воркутауголь» компания кӧсйысис из шомсӧ вежны труба вӧчигӧн колана кӧрт вылӧ, а трубаяссӧ сэсся ваясны Воркутаӧ из шом новлан поездъясӧн, бӧрсӧ ӧд найӧ локтӧны тыртӧмӧсь. Тадзи уна сьӧм лоӧ видзтӧма, – шуис Ростислав Гольдштейн. – Ми быть выльмӧдам Усваса водоводсӧ, мед Арктика карса войтырлы бура овсис.
Вежны удж котыртан нырвизь
Республикаысь видз-му овмӧсса вӧвлӧм министр Сергей Чечёткин казьтыштіс, мый Россияса президенткӧд аддзысьлігӧн Ростислав Гольдштейн висьталӧма Владимир Путинлы Комиын вӧчӧм сёян – кӧр яй да чилимдінса вый – йылысь. И президент сэки юалӧма, а выйсӧ пӧ сьӧрсьыд вайин? Сэки абу нуӧма, и Сергей Чечёткин юаліс регионӧн веськӧдлысьлысь, бӧрас пӧ ыстінныд эн козинсӧ?
–Ыстім, – вочавидзис Ростислав Гольдштейн.
Водзӧ Сергей Чечёткин кӧсйис тӧдны, кутшӧм вежсьӧмъяс колӧ вӧчны республикаса видз-му овмӧсын?
–Видз-му овмӧс министерстволы медводз колӧ вежны удж котыртан нырвизьсӧ. Медтӧдчанаыс ӧд абу субсидия-грант юклӧм, а йӧзӧс колана сёян-юанӧн могмӧдӧм, – висьталіс Ростислав Гольдштейн. – Колӧ тӧдмавны, кутшӧм прӧдукция виччысьӧны йӧзыс, а сэсся видзӧдлыны, кы-дзи вӧчны налы колана сёян-юансӧ. Кор прӧдукция вӧчысь кутас бура тӧдны, мыйта да кутшӧм качествоа вузӧс вӧчны, сэки сылы воссясны водзӧ сӧвман позянлунъяс. И войвылын видз-му овмӧсыд вермӧ вайны ыджыд водзӧс.
Вевтыс виял
«Коми войтыр» ӧтмунӧмӧн веськӧдлысьӧс вежысь Анастасия Михайлова юралысьлӧн удж вӧчысь дорӧ шыӧдчигӧн висьталіс, Кӧрткерӧс районса Висер сиктса амбулаторияын пӧ виялӧ вевтыс, и кыдзи сэні уджавны арнас да тӧвнас.
Регионӧн веськӧдлысь эскӧдіс сійӧс, локтан воын пӧ Висерын заводитам выль бурдӧдчанін кыпӧдны.
А таво республикаын стрӧитӧны 28 ФАП, 2 амбулатория, Кулӧмдінын поликлиника, Изьва районса Щельяюрын участковӧй да Сыктывкарын вуджан висьӧм бурдӧдан больничаяс.
Усьӧмаясӧс нэммӧдны
–Менам пиӧй пӧгибнитіс торъя военнӧй операцияын, кувсьӧмаяс пӧвстын эмӧсь и менам ёртъяслӧн да тӧдсаяслӧн рӧдвуж. Каръясын лӧсьӧдӧмаӧсь нин СВО-ын усьӧмаясӧс казьтылан аллеяяс, окота эськӧ, мед и миян Чилимдінын татшӧмсӧ вӧчисны. Дзоридзьяссӧ ӧд кӧсъям ог сӧмын пӧгибнитӧмаяслӧн гуяс вылӧ пуктыны, – шыӧдчис Ростислав Гольдштейн дорӧ торъя военнӧй операцияын пӧгибнитӧм воинлӧн мам.
–Геройяс йылысь паметьыс мед олас миян сьӧлӧмъясын. Нэммӧдны найӧс колӧ и памятникъясын, и оз сӧмын Чилимдінын, но и быд сиктын, – шуис та кузя регионӧн веськӧдлысь да содтіс, мемориал лӧсьӧдӧм йывсьыс пӧ сёрнитчам Чилимдін районса администрациякӧд, а муниципалитетӧн веськӧдлысь Николай Канев аддзысьлас усьӧмаяслӧн рӧдвужкӧд да юасяс налысь, кыдзи бурджык вӧчны памятниксӧ.
Тшупӧда пасъяс
2029 воын Ухта пасъяс 100 вося юбилей. Карын олысьяс ӧні нин босьтчӧмаӧсь дасьтысьны да чукӧртӧмаӧсь вӧзйӧмъяс, медым сетны найӧс республикаӧн веськӧдлысьлы. 68 вӧзйӧм улӧ кырымасьӧмаӧсь 53 сюрсысь унджык морт. «Веськыд йитӧд» дырйи ухтасаяс корисны Ростислав Гольдштейнӧс аддзысьлыны накӧд да ӧтлаын мӧвпыштны, кыдзи вӧзйӧмъяссӧ пӧртны олӧмӧ.
–Ухта – менам чужан кар. Кӧсйыси волыны сэтчӧ мусир да биару промышленносьтын уджа-лысьяслӧн праздник дырйи, но вӧлі Владивостокын, да урчитӧм кадӧ локны сэтысь эз артмы. Матысса кадӧ быть вола Ухтаӧ, – шуис Ростислав Гольдштейн. – Ухталы тырас 100, а Сыктывкарлы – 250 во. Кыкнан юбилейыс зэв тӧдчанаӧсь республикалы, и колӧ бура дасьтысьны пасйыны найӧс.
<> Павел Симпелев. Снимокъясыс ӧтуввезйысь.