Уджалан династияясысь войтыркӧд сёрнисӧ регионӧн веськӧдлысь Ростислав Гольдштейн нуӧдіс пызан сайын чай юигмоз.
Сылӧн вомъёртъяс юксисны опытнас, кыдзи ышӧдӧны-туйдӧны ныв-пинысӧ пыдди пуктыны да радейтны ассьыныс уджсӧ.
–Ме тӧда, мый вӧчны тайӧс сьӧкыд, но колана.
Сьӧкыд сы вӧсна, мый челядь пӧвстысь быдӧнлӧн эм аслас дум-кӧсйӧм. Но кор найӧ водзӧ олӧмас мунӧны бать-мам кок туйӧд да артмӧдӧны династияяс – тайӧ, менам чайтӧм серти, зэв бур.
Кор тэкӧд орччӧн рӧдвужыд, да ті вӧчанныд ӧти удж – тайӧ содтӧ кывкутӧмтӧ, – пасйис да аттьӧаліс чукӧртчӧмаясӧс республика сӧвмӧдӧмӧ донъявны позьтӧм пай пуктӧмысь Ростислав Гольдштейн.
Фомин-Лавренюк семьяысь унаӧн уджалӧны Сыктывкарса вӧр комбинатын.
–Миян династиялы подувсӧ пуктіс менам дед Александр Никитич Фомин. Жаль, сійӧ абу нин миянкӧд.
Уджавны босьтчылӧма Айму вӧсна Ыджыд тыш пансьытӧдз на.
Война вылӧ босьтӧмаӧсь 1941 воын, сылӧн эмӧсь фронтвывса наградаяс, орден-медальяс.
Сыктывкарса ЛПК-ын Александр Никитич заводитӧма уджавны 1967 воын да зільӧма сэні пенсия вылас петтӧдз.
Гӧтырыс, Александра Петровна, ныв-пиыс, менам бать Василий Александрович да Татьяна Александровна, став олӧмсӧ жӧ сиисны комбинатлы, ӧтувъя уджалан стажыс налӧн нелямын сайӧ во.
Ме, менам кык вок да чой – миян семьяысь ЛПК-ын зільысьяслӧн коймӧд кӧлена нин, – висьталіс Александр Фомин.
Сылӧн кывъяс серти, династияяс артмӧны сэк, кор уджалан котырын пыдди пуктӧны ёрта-ёртсӧ, нажӧткасӧ тырмымӧн босьтӧны да веськӧдлысьясӧдз воны вермӧны.
Республикаса юралысьлысь удж вӧчысь содтіс та дорӧ, мый татшӧм семьяясын зэв тӧдчана ас му вӧсна кывкутӧмыс да бать-мам челядьсӧ велӧдӧны кывкутны жӧ.
Майбуров-Конов-Холопов династияысь Андрей Майбуров тадзи жӧ мӧвпалӧ.
–Миянлысь династиянымӧс панлӧма дедным, Визин сиктса школаысь директор Сергей Иванович Майбуров. Сійӧ уджвывса да войнаса ветеран.
Батьӧй, Генрих Сергеевич Майбуров, директоравліс жӧ школаын. И мамӧй менам велӧдысь.
Ме чужлі, кор мамӧй да батьӧй студентъясӧн на вӧлӧмаӧсь, а сэсся найӧс мӧдӧдӧмаӧсь уджавны Койгорт районӧ.
Ме, менам гӧтыр да кык чой – тшӧтш жӧ педагогъяс, – висьталіс сійӧ.
Пальшин-Политов-Филиппов династиялӧн ӧтувъя стажыс 1.256 во.
–Миян семьялӧн история ӧтувтіс Изьва, Кулӧмдін да Удора районъяс, – тӧдмӧдіс рӧднас Елена Власюк. – Династия панысьнас вӧлі Пётр Семёнович Филиппов.
Сійӧ 49 во сетіс школаын велӧдчысьяслы роч да коми кывйысь тӧдӧмлун, и аслас витнан челядьыс тшӧтш жӧ педагогъяс вӧліны.
Ме велӧда история и гижлі асланым семья йылысь небӧг. Эска, династияным водзӧ кутас паськавны, содасны и книгаын лист бокъяс.
–Нимкодь, мый история велӧдысь гижӧ аслас рӧдвуж йылысь небӧг, – ошкис Ростислав Гольдштейн.
Харитонов семья йылысь висьталіс Екатерина Костерева.
–Миян династия заводитчис Лидия Григорьевна Кукольщиковасянь, менам бабсянь.
Сійӧ вӧлі акушеркаӧн, и медиклӧн удж дорӧ ассьыс муслунсӧ вуджӧдіс мамлы, республикаса челядьлӧн бурдӧдчанінысь медсестра Лидия Ивановна Харитоновалы.
Сійӧ нин медицинаын тӧдӧмлуннас юксис мекӧд.
Больничаӧ уджавны локті да сэні аддзыси Валерий Павлович Костеревкӧд, коді сэсся лоис менам верӧсӧн.
Миян челядь – медикъяс жӧ, нывным – врач, а пиным – анестезист.
Медикъяслӧн нӧшта ӧти династиякӧд – Луздор районысь Рубцов семьякӧд – тӧдмӧдіс Светлана Жуйкова.
–Менам дед тышкасис Великӧй Отечественнӧй война вылын.
Воис гортӧ да пыр кӧсйис, медым нёль нывсьыс кӧть ӧти да лоис медикӧн.
И со коймӧд нылыс – менам мамӧй – Сыктывкарын помаліс медколледж да бергӧдчис чужанінас.
Сы моз жӧ вӧчис мамлӧн ичӧтджык чойыс, медикъясӧн лоисны и племянникъяс, – висьталіс сійӧ.
Светланалӧн верӧсыс, Станислав Жуйков – Луздор районса шӧр больничаын главнӧй врач.
Сійӧ шуис, Комиӧ пӧ уджавны локті муса гӧтыр вӧсна.
–Эскӧй кӧть эн, но и менӧ Коми Республикаӧ вайӧдіс гӧтырӧй. Таын ми тіянкӧд ӧткодьӧсь, – пасйис Ростислав Гольдштейн. – Тӧда, ми ӧтлаын вӧчам регионнымӧс сэтшӧмӧн, медым вермим гӧрдитчыны сыӧн, медым тані овны вӧлі лӧсьыдджык, кыпыдджык.
И та могысь унатор нин лои вӧчӧма: поликлиника-больничаясӧ воӧ ӧнія кадся выль медоборудование. Сиктъяс сӧвмӧны, йӧзлӧн олӧмыс бурмӧ.
Аттьӧ тіянлы ставсьыс! Аттьӧ, мый ті эмӧсь!
* * *
Регионӧн веськӧдлысьлӧн тшӧктӧм серти республикаса правительство дасьтас уджвывса династияясӧс нимӧдан торъя пас.
–Сійӧ петкӧдлас, мый ми пыдди пуктам семьяяс, кодъяс вӧчӧны республиканымӧс крепыдджыкӧн, а Комиын олӧмсӧ – бурджыкӧн, – вӧчис сёрнилы кывкӧртӧд Ростислав Гольд-штейн.
<> Гижӧдсӧ дасьтіс Павел Симпелев. Снимокъясыс ӧтуввезйысь.