Коми Республикаӧ воліс Россияын спортса министр, странаса Олимпийскӧй комитетӧн веськӧдлысь Михаил Дегтярёв.
Сійӧ пасйис, мый пуктӧма мог 2030 воӧдз Россияын 70 прӧчент олысьсӧ ышӧдны нырччыны спортӧ. А Комиын пӧ ӧні нин матӧ 60 прӧчент олысьыс физкультураӧн ёнмӧдӧ дзоньвидзалунсӧ, и тайӧ зэв ошкана лыдпас.
Матысса воясӧ республикаын шуӧма лӧсьӧдны ГТО нормативъяс сдайтан содтӧд площадкаяс, восьтыны Сыктывкарын фиджитал-шӧрин, Емдін районса Айкатылаын да Удораса Косланын спортзалъяс.
Михаил Дегтярёвкӧд аддзысьлігӧн регионӧн веськӧдлысь Ростислав Гольдштейн аттьӧаліс сійӧс Россияса министерствосянь республикалы вичмӧдӧм отсӧгысь.
–Ми вӧчам ыджыд удж, медым регионын сӧвмис профессиональнӧй спорт, ышӧдам йӧзӧс да торйӧн нин челядьӧс занимайтчыны физкультураӧн. Дасьтім спорт инфраструктура ёнмӧдан некымын тӧдчана уджтас да Россияса спорт министерство отсӧгӧн кӧсъям ӧдйӧджык збыльмӧдны найӧс, – висьталіс Ростислав Гольдштейн.
Михаил Дегтярёвӧс тӧдмӧдісны баскетболӧн ворсан шӧринса проектӧн. Сэні лоасны и художествоа гимнастика да адаптивнӧй хоккей залъяс, гостиница.
Шӧрин стрӧитӧм йылысь сёрнитчӧмсӧ тавося июньын республикаса правительство да «Лузалес» компания кырымалісны Петербургын экономика форум дырйи.
Спорткомплекс кыпӧдасны и мини-футболӧн ворсан «Ухта» командалы.
–Таво медводдзаысь на «Ухта» клуб вермис футзалысь Россияса чемпионатлӧн суперлигаын. И республика гӧрдитчӧ командаын ворсысьясӧн, – висьталіс Ростислав Гольдштейн. – Но клубыслы колӧ аслас площадка, и корам отсавны кыпӧдны спорткомплекссӧ.
Регионӧн веськӧдлысь тӧдмӧдіс министрӧс и вӧла спорт сӧвмӧдан школа выльмӧдан планӧн. Ӧні сэні велӧдчӧ 112 морт, на лыдын и омӧль дзоньвидзалуна войтыр, кодъяслы тайӧ спорт сикасыс лоӧ иппотера-пияӧн.
Спортсменъяс шедӧдӧны республикаса, регионкостса да Россияса ордйысьӧмъясын вермӧмъяс.
Выльгортын Ростислав Гольдштейн да Михаил Дегтярёв видзӧдлісны, кыдзи Раиса Сметанина нима стадионын стрӧитӧны лыжиӧн котралан база – воддзасӧ кыпӧдлӧмаӧсь нелямын во сайын да, сійӧ важмӧма нин.
–Коми нималӧ спортсменъясӧн. Мир пасьталаын медбуръяс лыдын вӧліны Раиса Сметанина, Василий Рочев батя-пиа, Николай Бажуков, Сергей Капустин, Андрей Николишин, Юлия Ступак. И ӧні унаӧн дорӧны медгырысь ордйысьӧмъясын победа, – пасйис регионӧн веськӧдлысь.
Михаил Дегтярёв сетіс Комиысь спортсменъяслы да тренеръяслы Россияса спорт министерстволысь наградаяс. Пасйӧмаяс лыдын вӧліны тренеръяс Александр Коюшев, Дмитрий Порошкин, Ольга Елисеенкова, Ирина Панина, Алексей Тропников.
Регионын спорт да физкультура сӧвмӧдӧмысь Коми Республикаса юралыссянь аттьӧалана гижӧдӧн пасйӧма тренеръяс Николай Кожевниковӧс, Станислав Волженцевӧс, спортсменъяс Алексей Виценкоӧс, Илья Порошкинӧс.
Россияса спорт министерствоӧн веськӧдлысь аттьӧаліс тренеръясӧс да спортсменъясӧс да пасйис, ми пӧ ӧтув збыльмӧдам Владимир Путинӧн пуктӧм мог – вӧчны странанымӧс вынаӧн да дзоньвидзаӧн. Шоныд кывъяс сійӧ вичмӧдіс и Ростислав Гольдштейнлы.
–Ростислав Эрнстовичкӧд ме уна во нин тӧдса. Ми вӧлім кык орчча регионса – Хабаровск крайса да Еврей автономия кытшса – губернаторъясӧн. И ми век зілим отсавны ёрта-ёртлы да ӧтув уджалім, медым сӧвмӧдны странаса Ылі Асыввыв юкӧнсӧ, – висьталіс Михаил Дегтярёв.
<> Гижӧдсӧ дасьтіс Павел СИМПЕЛЕВ. Снимокъясыс ӧтуввезйысь.