Ыджыд вир кисьтана война вылысь дзоньвидзаӧн Инта районса Петрунь сиктӧ воӧм бӧрын Прокопий Иванович Канев гозйӧдчас дас сизим арӧса Дарья Васильевна Валейкӧд. Кыкнанныс петлӧмаӧсь нэмӧвӧйся кӧр видзысь рӧдъясысь, кодъяс ас кадӧ мунлӧмаӧсь Изьваысь да овмӧдчылӧмаӧсь Усва юбокса джуджыд кыр вылӧ. Лада олӧмӧн найӧ быдтӧмаӧсь кӧкъямыс ныла-пиа.
Бать йывсьыс казьтылӧмъясӧн мекӧд юксис Валентина Прокопьевна Васильева. Сійӧ висьталіс, мый Прокопий Иванович томсянь уджавлӧма Петруньса В.И.Ленин нима колхозын кӧр дорын.
1940 воын мукӧд том зонмӧс моз Прокопий Каневӧс босьтӧмаӧсь служитны армияӧ.
Батьыс, Иван Николаевич, вӧлӧма морякӧн. Сылӧн туйвизьӧ веськалӧма и Прокопий: школа бура помалӧм да крепыд мортӧс индӧмаӧсь служитны Войвыв флотса 5-ӧд торъя артиллерийскӧй зенитнӧй дивизияӧ.
Война йылысь лёк юӧрыс суӧма сійӧс Баренц саридзбокса Рыбачий полуостров вылын. Сэні Прокопий Иванович и петкӧдлӧма киас ружье кутан да стӧча лыйсян сямсӧ.
Та йылысь висьталӧны «За оборону Советского Заполярья», «За Победу над Германией» наградаясыс.
Сӧвет кадся историяысь тӧдса, мый кольӧм нэмся ветымынӧд-квайтымынӧд воясӧ ёнасӧ абу позьӧма висьтавлыны вир кисьтана война йывсьыс. Тайӧс тӧдӧмӧн Прокопий Иванович и «чӧв олӧма», бӧрынджык сӧмын тыдовтчӧма, мый фронтӧвиклы вӧлӧма мый казьтывны сьӧкыд тышъяс йылысь. Вежавидзысь моряк ставсӧ кутӧма ас пытшкас.
Сӧмын висьтавлӧма аслас ай-моряк йылысь: Иван Николаевич ӧкмыс во – 1896-1905 воясӧ – служитӧма Россияса императорскӧй флотын, веськавлӧма Роч-Японскӧй война вылӧ. Сёрнитігӧн Валентина Прокопьевна петкӧдліс меным дедысӧн ылысь-ылысь вайлӧм да семьяас ӧнӧдз видзан реликвия.
–Тайӧ лыысь вӧчӧм порок видзан доз. Вевтсӧ баситӧма-серпасалӧма якӧрӧн. Порок дозйыс петкӧдлӧ миянлы дедӧлысь Роч-Японскӧй война йылысь, – висьталіс Валентина. – Ӧні унджык тӧдам и айӧлысь война кадся туй йывсьыс, ӧд миян челядьдырйи ачыс нинӧм эз казьтывлы, а медальяссӧ гортын видзисны саймовтӧмӧн. Юӧръяссӧ тӧдмавлім «Паметь небӧгысь» да гусьӧнмоз видзан военнӧй билетсьыс. Сэсся, кор пондім вӧдитчыны ӧтуввезйӧн, ликмис и мукӧд героическӧй лист бок. Со «Память народа» сайтын гижӧма: «Краснофлотца Канева П.И. – номерного, 189 артиллерийского полка, наградить медалью «За боевые заслуги» (1944 г.)». Вӧлӧмкӧ, 1943 вося июнь 20 лунӧ Мурманск обласьтысь Печенга дорса «Пумманки» аэродром весьтысь зениткаысь стӧча лыйӧмӧн Прокопий Иванович уськӧдӧма вӧрӧглысь кык самолёт – «Ю-87» да «ФВ-19-с». Та йылысь, помнитсьӧ, коркӧ 1958-1959 воясӧ, гижлӧмаӧсь и «Красное знамя» газетын, сэки айным военнӧй формасӧ пасьтавліс на. Медальяссӧ айӧ да мамӧ зэв бережнӧя видзисны, батьным морӧсас новліс сӧмын «За боевые заслуги», «За оборону Советского Заполярья», «За Победу над Германией» медаль планкаяссӧ. Ёрт-фронтӧвикъясыс тшӧкыда волывлісны айӧ дорӧ, варовитлісны сиктса олӧм, кӧр видзӧм йылысь, а война кадсӧ миянлы кывмӧн эз казьтывны. Ӧні семейнӧй традиция серти айӧлысь став наградасӧ Петруньса керкаас дӧзьӧритӧ миян меддзоля вокным Владимир Прокопьевич.
Фронтӧвиклӧн Зинаида нылыс Прокопий Ивановичлӧн чужӧмсянь сё во тыригкежлас 2020 вося апрель 15 лунӧ йӧзӧдлӧма Инта районса «Искра» газетын «Образ, бережно хранимый» гижӧд. Сэні тшӧтш и со мый пасйӧма: «Отучился папа, закончив 7 классов. В табеле, хранившемся в сундуке, все оценки были «хорошо». Учёба давалась ему легко, мог бы учиться и дальше, но судьба была предрешена. С самого детства помнил он тундру, Карское море, чум и оленей. После возвращения с войны везде были нужны его руки, но выбор был сделан – оленеводство».
–Айӧ зэв лабутнӧя сёрнитліс кӧрдорса челядькӧд, велӧдчӧмсӧ ошкыліс, и миянӧс ышӧдіс лэччыны сиктӧ велӧдчыны. Сиктсалы и кӧрдорсалы удж кузяыс пыр сетліс сӧветъяс, – бать йывсьыс водзӧ висьталіс Валентина. – Оленеводӧн, зоотехникӧн бура уджалӧмсьыс сылы сет-лісны «Почётный оленевод» ним. Кывлім, мый аслас кужӧмлуннас, йӧзкӧд варовитӧмнас айӧ збыльысь торъялӧма мукӧдысь, сійӧс пыдди пуктӧмаӧсь уджъёртъясыс, и миянлы таысь век вӧлі нимкодь.
Ме жӧ Прокопий Иванович Каневӧс ловйӧн эг нин су, а Петруньӧ волігӧн меным – зятьлы – петкӧдлісны керкаас тыдаланаинын видзан нӧшта ӧти донатор.
Тайӧ сылӧн уджвывса ыджыд награда – «Малая золотая медаль ВДНХ». Висьталісны, мый тайӧ медальсӧ сылы морӧсас пысавлӧмаӧсь Москваын 1970 воын, кор сійӧс да Ксенофонт Иванович Каневӧс мӧдӧдлӧмаӧсь сэтчӧ. Найӧ тӧдмӧдӧмаӧсь ВДНХ-ӧ волысьясӧс тундраын олӧмӧн да кӧр видзӧмӧн, петкӧдлӧмаӧсь ас вурӧм парка-малича, тӧбӧк, новлӧдлӧмаӧсь москвасатӧ кӧр даддьӧн.
- Прокопий Габов. Снимокъясыс Валентина ВасильевалӦн гортса архивысь.