Республикаса видз-му овмӧсын зільысьяс «Му-видз лун – 2025» семинар дырйи ветлісны Сыктыв районса Визинӧ. Войвыв госсорткомиссияса овмӧсӧн тӧдмасисны и Ленинград, Москва да Саратов обласьтъясысь специалистъяс.
40 гектар пасьта татчӧс му вылын ассьыныс палаткаяс восьтӧмаӧсь 10 компания, вайӧмаӧсь 10 сикас трактор-погрузчик да мукӧд техника. Гӧсьтъяслы петкӧдлісны овмӧсас быдтӧм 30 сикас град выв пуктас.
Семинар вылӧ чукӧртчысьясӧс медводз чолӧмалісны регионса видз-му овмӧс министерствоӧн, Сыктыв районса администрацияӧн, Коми наука шӧринысь агробиотехнология институтӧн, «Россельхозбанкӧн» веськӧдлысьяс да Госсӧветса депутатъяс. Му вылын зільысьяс водзын сьылісны-йӧктісны Визинса культура керкаысь да Сыктыв районысь артистъяс.
«Идеалыд» Комиын важӧн нин абу…
Гӧсьтъяслы медводз петкӧдлісны гӧрӧм-визьйӧдлӧм картупель муяс. «Севернӧй» госсорткомиссия юкӧнӧн веськӧдлысь Ярослав Коробейник тӧдмӧдіс, кутшӧм картупель тані вӧдитӧны:
–Питомникын рӧдмӧдӧны-быдтӧны Войвыв да Арктика регионъяслы лӧсялана районируйтӧм гибридъяс. Медым найӧ эз висьны, эз сетчыны Колорадоса лотшаклы да проволочниклы, войся кынтылӧмлы да та дырйи позъяс мед быд во вӧлі уна мича гӧгрӧс либӧ кузьмӧс картупель.
Мӧдӧд во вӧдитам «Мира» да «Двинскӧй» сортъяс. Мӧйму воддзаыс воис бура, бӧръясьыс кык пӧв унджык. Таво кӧ татшӧм жӧ лоас серпасыс, «Мирасӧ» районируйтам да пыртам госреестрӧ.
Кольӧм восянь ставсӧ ӧткодялам «Печорскӧйкӧд», а таӧдз эталонӧн вӧлі водз воан «Оскар» сорт. Июнь 26 лунӧ войнас вӧлі 3 градус кӧдзыд. Голландияысь вайӧм «Ред Скарлет», «Ред Леди» да «Гауз» сортъясын корйыс сьӧдӧдіс, а «Печорскӧй» колис веж. Воддзаясыс эськӧ надзӧник бӧр сайкалісны, но картупельыс артмис кык пӧв этшаджык. «Печорскӧйсӧ» быд гектарысь босьтім 460 центнер, шмакыс 141 грамма, кузьмӧс.
Некымын во нин эталонӧн лыддям «Аврора». Став картупельыс ӧтыджда, 97 грамма, позъяс посньыдыс зэв этша. Быд гектарысь босьтім 430 центнер.
Кык во вӧдитім «Лила», а мӧйму сійӧс районируйтім. Тайӧ сортыслӧн абу эталоныс, ӧткодявны нинӧмӧн да. Картупель пытшкыс кельыдгӧрд, кургов свеклӧ кӧра, крахмалыс сьӧкыда йиджӧ гыркъяд. Та вӧсна «Лилаыс» ёна лӧсялӧ диабетӧн нёрпалысьяслы. Быд гектарысь босьтім 217 центнер, сьӧктаыс 92 грамм. Шуим, тайӧ сортыс и лоас эталонӧн.
Вӧдитам еджыд кыша «Атлетик». Кык во нин видзӧдам «Розовый чародей» бӧрся. Сійӧ и артмӧ бура, и фитофтороз оз кӧвъясь, и тӧвйӧ лючки. Но эгӧ на районируйтӧй, уна синма да, мукӧдыс – пыдынӧсь. Ас овмӧсын позьӧ вӧдитны, но татшӧмтӧ картупель иналысьяс оз босьтны.
Оз вись и «Невский». Быд гектарысь сійӧс босьтім 500 центнер, сьӧктаыс 130 грамм, кышыс и пытшкӧсыс еджыд. Но оз радейт кӧдзыд му.
Видзӧдам «Церата» бӧрся. Эгӧ на жӧ районируйтӧй. Тайӧ сортыс быдмӧ 100 лун. Картупельыс ӧтгырыся, синмыс этша, пытшкӧсыс кольквижов.
Таысь ӧтдор быдтам «Фламинго» да «Кармэн». Тайӧ водз воан сортъяс. Ӧтиыс быдмӧ 60-80 лун, мӧдыслы тырмымӧн 40-60. Быд гектарысь воддзасӧ босьтім 358 центнер, мӧдсӧ – 282, сьӧктаыс 115 да 104 грамм, кышыс кыкнанныслӧн гӧрд, пытшкӧсыс – еджыд.
Ӧткымын сорт сетӧ бур урожай, но шмакъясыс чулля-пелляӧсь либӧ плавкӧсӧсь. Унджык сортыс быдмигас паськалӧ ӧткодя, зырӧдӧ мусӧ. А мукӧдыслӧн быдмӧ небыдджык муланьыс.
Быдтім «Калинка» сорт, но картупельыс зэв рыж. Муртса кӧ кульыштчас кышыс либӧ потыштас, ачыс сісьмас да и йӧртӧмад матігӧгӧрсӧ тшыкӧдас.
Бура воӧмаӧсь «Зырянец» да «Вычегодскӧй» сортъяс. Воддзасӧ быд гектарысь босьтӧмаӧсь 378 центнер, а мӧдсӧ – 314, сьӧктаыс 106 да 90 грамм. Ӧтиыс кольквиж кыша, мӧдыс – еджыд. Бӧръя сортыс радейтӧ куйӧдалӧм му.
Мӧйму районируйтім водз воан «Гулливер». Картупельыс гырысь, сэні уна крахмал, а синмыс этша. Тайӧ сортыс быдмӧ гребеняс, оз пет му веркӧсас, а сідзкӧ, и турунвижыс абу.
Республикаын бура тӧдӧны да торйӧн ёна корӧны миянлысь водз воан «Снегирь», «Чароит», «Рябинушка», «Аврора» да «Чародей». Тайӧ сортъяссӧ йӧзыс вӧдитӧны и дачаас, и сикт-грездса град йӧрын.
Найӧс вӧзйыліс Ленинградса «Белогорка» наука институт. Куимнан сортыс воӧ водз, шмакъясыс кузьмӧсӧсь, бура тӧвйӧны. Воддзаыслы кӧ колӧ бур агротехника да мувердас, бӧръяясыс ӧткодя быдмӧны лыаын и сёйын. «Снегирлӧн» кельыд-гӧрд да еджыд «Чародейлӧн» сьӧктаыс 57-111, а кольквижов «Чароитлӧн» – 100-114 грамм. Медыджыд урожайыс «Чародейлӧн» – быд гектарысь 302-461 центнер. «Чароитсӧ» гектарысь босьтам шӧркодя 280, а «Снегирсӧ» – 160-216 центнерӧн.
Тшӧкыда корӧны «Идеал». Бать-мам пӧ пыр пуктылісны да босьтлісны бур урожай.
Кӧсъя юӧртны, мый воддза «Идеалыс» Комиын абу нин. Сійӧс рӧдмӧдысь оригинаторыс оз нин вӧдит тайӧ сортсӧ. А сідзкӧ, сійӧс некод оз бурмӧд, оз весав висьӧмысь да вирусысь. «Идеалсӧ» он аддзы и госреестрысь.
Дас воысь дырджык оз позь вӧдитны ӧти сорта картупельсӧ. Ӧти во кӧ ті пуктысинныд да босьтінныд урожай, сэтчӧ вермис веськавны кутшӧмкӧ вирус. Мӧд во ті бара пуктанныд висьысь нин картупельсӧ. И тадзи воысь-во разӧданныд пӧрӧссӧ. Бурногӧн кӧ, и мусӧ колӧ сдайтны анализ вылӧ да тӧдмавны, ставыс-ӧ сэні лючки.
Унаӧн чайтӧны, картупель корйыс кӧ сьӧдӧдіс, кад нин босьтны урожай. Но тайӧ абу тадз. Быд сорт быдмӧ урчитӧм кад. Артавны колӧ, кор 70 прӧчент кӧйдыссьыс мыччысисны веж коръяс. Шуам, картупельыслы кӧ колӧ 90 лун, сэки и колӧ ытшкыны корсӧ да керны картупельсӧ. Ытшкыны колӧ кышсӧ ёнмӧдӧм могысь.
Мукӧдыс дыр видзӧны муас картупельсӧ, мед пӧ нӧшта на быдмас. Но водз воан картупель таысь мӧдас сісьмыны. Сэсся мукӧд сортыс нинӧмӧн оз висьны, но муас дыр видзӧм вӧсна вирусъясыс корсяньыс веськалӧны и налы.
Мӧданныд кӧ виччысьны, шуам, «Розовый чародейлысь» кор сьӧдӧдӧмсӧ, верманныд кольны урожайтӧг. Картупельыс быдмас арбуз ыджда, но пытшкыс лоӧ тӧштшӧ.
Во квайт нин миянӧ оз вайны суйӧрсайса кӧйдыс. Ставсӧ быдтам-рӧдмӧдам асьным. Мукӧд регионас быд гектарысь босьтӧны 700 центнер картупель. Миянлы таӧдз ылын на, чукӧртам 200-250 центнерӧн.
Таво тулыснас зэв сьӧкыд вӧлі минеральнӧй мувердасӧн. Республикаӧ вайисны зэв этша. Та вӧсна ковмис унджык разӧдны куйӧд да торф.
Медым босьтны бур урожай, мусӧ колӧ шойччӧдны либӧ картупель пыдди тулыснас ли арнас кӧдзны сю, рапс, анькытш, шыранькытш, фацелия либӧ горчица, а тулыснас сэсся мусӧ быдмӧгнас и гӧрны. Но горчицаӧн вӧдитчигӧн колӧ видзчысьны, медым кӧйдысӧдз эз во. Кӧйдысыс кӧ киссяс муас, ковмас тышкасьны горчицалы паныд.
Бур, вӧдитанныд кӧ 2-3 сорт картупель.
Ме серти, Войвылын тайӧ культурасӧ вӧдитны лӧсялӧ быд боксянь.
Ыркыд поводдя понда оз сэтшӧма рӧдмы быдсикас вирус, тӧвнас лёльӧ-гагйыс бырӧ жӧ, муыс пыдӧдз кынмӧ да. Весиг Колорадоса лотшак медсясӧ рӧдмӧ республика лунвыв районъясын. Та вӧсна град выв пуктас дорйӧм могысь оз ков вӧдитчыны химия сорасӧн, а сідзкӧ, и быдтасыс экология боксянь сӧстӧм да чӧскыдджык. Сэсся тувсов-гожся кузь да югыд каднас картупель ӧдйӧ вужъясьӧ да быдмӧ-дзоридзалӧ. Бур и сы боксянь, мый Войвылын кос да жар гожӧмыд овлӧ зэв шоча, коркӧ да пыр нин зэрышталӧ. Тӧдчана и идралан кадыс. Арнас ыркыд, урожайсӧ оз ков видзны кӧзӧдын. И тайӧ ёна тӧдчӧ тӧвйӧм вылас.
Став кӧйдыссӧ пуктытӧдзыс резӧны бак сорасӧн, «Престиж» да «Ризоплан» фунгицида препаратӧн. ОМУ мувердассӧ коялӧны гӧртӧдзыс. Картупель петтӧдзыс кыкысь агсалӧны, а сэсся сы мындаысь жӧ мудйӧны.
Визинын кукурузалы немкӧ…
Ярослав Николаевич бӧрын семинар вылӧ воӧмаясӧс «Севернӧй» госсорткомиссия юкӧнысь агроном Валентина Габова вайӧдліс и ӧзим сю му дорӧ. Таво тулыснас поводдяыс вӧлі зэв лёк, помся зэрис, муяс вылас он вӧлі лыб, та вӧсна сёрмӧмаӧсь 2-3 вежон. Медся бура артмӧ «Батист». Быд во гектарысь босьтӧны 45 центнер.
–Нокыс, дерт, уна. Кӧсъян кӧ бур урожай, ёна колӧ копрасьны муыдлы. Арсяньыс дискуйтчыны, тулыснас гӧрны.
Став выль сортсӧ вӧзйӧны учёнӧйяс. Наукаса, институтса зільысьяс, мӧд ногӧн кӧ, оригинаторъяс, шыӧдчӧны Москваӧ, госсорткомиссияӧ. Корам пӧ видзӧдлыны, мыйсяма быдмӧг миян артмис, позьӧ-ӧ сійӧс рӧдмӧдны. Странаса юркарын донъялӧны выль сортсӧ да, шогмӧ кӧ, ыстӧны кӧйдыссӧ регионъясӧ. Колӧ кӧ видзӧдлыны, кыдзи, шуам, картупельыс, сюыс либӧ уна вося туруныс быдмӧ войвылын да полӧ-ӧ кӧдзыдысь, кӧйдысыс веськалас первой зонаӧ, кытчӧ Комиысь ӧтдор пырӧны Архангельск, Мурманск обласьтъяс да Карелия.
Выль сортсӧ некымын во испытайтӧм бӧрын госсорткомиссияса зільысьяс вӧчӧны кывкӧртӧд. Водзӧ нин оригинатор сайын, рӧдмӧдас-ӧ быдмӧгсӧ. Кодкӧд сійӧ кырымаліс выль сортсӧ быдтӧм-рӧдмӧдӧм йылысь сёрнитчӧм, эм пасйӧд госреестрын.
Визинса муяс вылын быдтӧны уна вося турун, райграс, овсяница, канареечник, таёжник да мукӧд быдмӧг. Торйӧн нин нимкодясьӧны «Сиверко» да «Малахит» сорта бобӧняньӧн. Ӧти быдмӧгас пӧ артмӧ 16 вож. Быд гектарысь босьтӧны 60 центнер.
Май 28 лунӧ тані пуктӧмаӧсь кукуруза. Гектарас сюйӧмаӧсь 100 сюрс кӧйдыс, но петӧма сӧмын 40 прӧчентыс, мукӧдыс васӧд муас сісьмӧмаӧсь.
Татчӧс уджалысьяслӧн медшӧр могыс абу ыджыд урожай босьтӧмын, а шедӧдны бур кӧйдыс. Тайӧс пӧ зэв жӧ сьӧкыд вӧчны. Рытнас кӧйдысыс быдмӧг сі йылас на, а асывнас ставыс нин муын.
«Август» петкӧдлас…
Визинса госсорткомиссия юкӧнын таво зільӧны Ленинград обласьтысь «Август» фирмаса специалистъяс Валерий Павленко да Алексей Морозов.
–Во квайт сайын миян дорӧ волісны Калининград обласьтысь му вӧдитысьяс да ошйысисны, кутшӧм бур урожай найӧ босьтӧны да кыдзи дӧзьӧритӧны град выв пуктассӧ. Ми босьтім налысь опытсӧ, но Ленинград обласьтлы сійӧ эз лӧсяв. Дерт, медводз поводдя вӧсна. Шуим лӧсьӧдны шогманаӧс ас овмӧсъяслы.
Санкт-Петербургсянь тіянӧс велӧдны ог вермӧй, та вӧсна воим татчӧ. Комиын ми медводдзаысь на, мӧдам видзӧдны, лӧсялас-ӧ миянӧн вӧзйӧмторйыс татчӧс мулы да быдмӧгъяслы. Гӧгӧрвоана, быд регионлы колӧ аслас методика.
Медводз шуим видлыны вӧдитны картупель. Кӧсъям и водзӧ уджавны мукӧд град выв пуктасӧн.
Мый ми вӧзъям Комилы да мӧдім нин пӧртны олӧмӧ Визинса госсорткомиссияын? Тайӧ вӧзйӧмторйыс лӧсялӧ Рытыв-Войвыв регионлы.
Картупель пуктытӧдз муас коялім «Синклер», ТМТД ВСК да «Табу» пестицид. Картупель петтӧдзыс коялім «Лазурит Ультра» гербицид. Кор корйыс быдмис да бырисны коласъясыс, резім «Метаксил» фунгицидӧн, «Лазурит Супер» да «Эскудо» гербицидъясӧн, «Полифем» адъювантӧн. Та бӧрын бара резім «Метаксилӧн», «Борей» инсектицидӧн да «Полифемӧн». Картупель дзоридзалігас нӧшта резам «Инсайд», «Интрада» фунгицидъясӧн да «Шарпей» инсектицидӧн. Шмак артмигас нин коялам «Инсайд» да «Раёк» фунгицидъясӧн. Кор нярмигас резам «Талант» да «Либертадор» фунгицидъясӧн.
Быд сорас йиджӧ картупеляс ас ног. Ӧти кор пырыс йиджӧ быдмӧгас да воӧ вужйӧдзыс, мӧд – кольӧ коръясас да видзӧ сійӧс гаг-висьӧмысь. Татшӧмсӧ весиг зэр оз вермы мыськыны.
Ставсӧ кӧ тайӧс вӧчны ас кадӧ, картупель вужйыс оз сісьмы, бырасны ёг турун, висьӧмъяс да проволочник. Сэк жӧ содас урожай, а картупельыс лоас зэв мича.
Кор сертиыс кӧ видзӧдны, Визинса участокын ставыс лючки, фитофтороз абу, коясим витӧдысь нин. Но ӧтитор лоис нин гӧгӧрвоана. Россияса шӧр регионъясын кӧ коясьӧм костас 10-14 лун, тані тайӧс колӧ вӧчны тшӧкыдджыка, 5-10 лун мысти. Миян химикатысь ӧтдор картупельыслы колӧ фосфора да калия мувердас.
Казялӧмаӧсь, кымын тшӧкыдджыка резан быдмӧгсӧ быдсикас сораснас, сымын ӧдйӧджык сійӧ быдмӧ, но сэк жӧ картупель кӧрыс пӧ омӧльтчӧ.
Химия сорасысь повны оз ков. Россияын эм зэв кыз небӧг, кӧні лыддьӧдлӧма, кутшӧм химикатӧн позьӧ вӧдитчыны видз-му овмӧсын. Миян фирмалӧн эм жӧ татшӧм каталогыс, но сійӧ тӧдчымӧн вӧсньыдджык.
Миянлысь гербицидъяс 5-30 лун мысти быдмӧгсьыс он нин аддзы, ни ӧти молекула оз коль.
Кӧйдыс рӧдмӧдан фирма-предприятиеын нӧшта на стрӧгджыка вӧдитчӧны химияӧн. Ӧд казяласны кӧ кӧйдыссьыс кутшӧмкӧ инфекция, налысь некод нинӧм оз ньӧб.
Тадзи жӧ и картупельӧн. Сійӧс иналысьлы колӧ, медым урожайыс эз сісьмы да майын вӧлі мича на.
Чайта, химия да бур кӧйдыс сетасны бур урожай. Колӧ сӧмын кужӧмӧн вӧдитчыны. Казялінныд кӧ, мый картупельыд нёрпалӧ, сёр нин сійӧс мыйӧнкӧ резны.
<> Николай РАЗМЫСЛОВ. Снимокъясыс авторлӧн.