«Коми му» газетын йӧзӧдлім нин Инта районса Петруньын чужлӧм Андрей Терентьевлысь тайӧ жӧ сиктсьыс петлӧм том войтыркӧд некымын сёрни-гижӧд. А аскӧдыс эськӧ окота жӧ вӧлі матысяньджык тӧдмасьны. И со таын водзмӧстчис Андрейкӧд бура тӧдса морт. Кывзам налысь сёрни-баснисӧ.
–Видза олан, Андрей Фёдорович! «Коми му» газет да Петруньлы сиӧм лист бок лыддьысьяс тӧдӧны, мый тэ босьтан да йӧзӧдан землякъясыдкӧд интервью. Вай талун тэ йылысь сёрнитыштам. Тэ зэв енбиа, унаторйын водзмӧстчысь морт. Висьтав, мый таӧ ышӧдӧ, да кытысь босьтан вын-ловбитӧ?
–Бур лун! Аттьӧ вылӧ донъялӧмсьыд. Но ме ог чайт ачымӧс зэв нин енбиаӧн. Бурджык шуны, зіля лоны татшӧмнас, сӧвмыны-быдмыны. Быттьӧ неуна тай артмыштӧ. А мый таӧ ышӧдӧ? Дзик ставыс. Олӧмыс. Матігӧгӧрса. Ветлӧм-мунӧм. Небӧг. Эскӧм. Йӧз висьтасьӧмъяс. Олӧм войтъяс. Дзик ставыс. Ыззьӧдны вермӧ быд здук да лоӧмтор. Тайӧ петкӧдчӧ и кывбуръясын да прозаын.
–Тэ уналаын водзмӧстчан да унатор тӧдан-кужан. Литертура, шылад, КВН, стендап, вет-лӧм-мунӧм-путешествуйтӧм… Ставсӧ он и лыддьӧдлы. Мый воӧджык сьӧлӧм вылад, мыйлы ун-джык кад вичмӧдан? Мый выльсӧ кӧсъян видлыны?
–Кыдз бара-й вочавидзнысӧ? Меным тайӧ ставыс сьӧлӧм серти. Но эм ӧти мытшӧд. Стӧчджыка кӧ, татшӧмыс кык. Ӧти-кӧ, ме ӧдйӧ ыззя да сэтшӧм жӧ ӧдйӧ куса. А мӧд-кӧ, ог куж шуны «Ог». Ӧбичаын тайӧ кыкторйыс ӧтиладорсяньыс йӧткалӧны водзлань, а мӧдарсяньыс кыскӧны бӧрӧ. Но кадӧн-арлыдӧн быттьӧкӧ мыйӧкӧ велавныджык мӧді, сюсьӧн-мывкыдаджыкӧн куті лоны.
А мыйла ставас ӧтпырйӧ кутчыся? Сы вӧсна мый буретш тадзи позьӧ петкӧдлыны асьтӧ, ассьыд сям-кужанлунтӧ да сьӧлӧмкылӧмъястӧ. Уна во куті ставсӧ тайӧс ас пытшкын. Чужан сиктсаяс тӧдӧны, кутшӧмӧн ме вӧлі ичӧтдырйи да быдмигӧн. Кыдзи менӧ увтыртлісны-дзескӧдлісны (ӧнія ног тайӧ шусьӧ буллинг). Но сійӧ ставыс кольӧма нин. Татшӧм дзескӧдӧмыс кодӧскӧ дзикӧдз сконъялӧ-пӧдтӧ, а ме, мӧдарӧ, юрӧс кыпӧді. Петкӧдлі ставныслы, мый ме – тайӧ ме. И таысь «мучайтысьясыслы» аттьӧ!
Ме радейта шмонь. Радейта да кужа шмонитны, матыссаясӧй та йылысь тӧдӧны. Та вӧсна пырӧдча КВН-ӧ да стендапӧ. Радейта гижны да лыддьысьны. Та вӧсна бӧрйи литература. И филологӧ на велӧдчи дай.
–Водзынджык гарыштлӧма нин лои, гижан кывбуръяс, сьыланкывъяс, вуджӧдчан. А верман казьтыштны ассьыд медводдза строкаястӧ? Мый йылысь вӧлі сійӧ кывбурыс?
–Дзик-дзик медводдзасӧ ог помнит. Збыльысь. Но сизимӧд классын Галина Александровнакӧд мыйкӧ гижлывлім. А дасӧдын чужлісны «Тебе 16 лет…» да «Ты ветку не ломай, мой друг», Тамара Александровналы да Татьяна Филипповналы чолӧмалӧм. Видлі и немеч кывйӧн на гижны. Мыйкӧ «Дас ист штат, дас ист штат, дас ист штат Инта. Дас ист коми штат, дас ист кляйне штат, дас ист шёнэ штат» сямаӧс…
–Ог сорсьы, шуа кӧ, мый тэ век на корсян асьтӧ, пыр видлан мыйкӧ выльтор. Вӧлін Петруньса школаын велӧдысьӧн, завучӧн, директорӧн, сэсся национальнӧй политика министерствоын зілин, бӧр бергӧдчин велӧдан юкӧнӧ. Кӧні да мыйсяма удж ӧні вӧчан? Эм-ӧ сэні позянлун петкӧдлыны ассьыд енби-сямтӧ?
–Э-э-эм. Талун зіля регионын «Движение Первых» ӧтмунӧмса юкӧнын. Таӧдз методисталі Росдетцентрын. Господьӧ, кӧні сӧмын ме эг уджавлы. Збыльвылас кӧ, кӧсъя сӧмын лоны шудаӧн да вӧчны йӧзыслы бур власьт вӧсна тыш-венӧ пырӧдчытӧг.
–Андрей Фёдорович, неважӧн тэ ветлін Москваӧ «Движение Первых» ӧтмунӧмса фестиваль вылӧ Коми Республикаса делегацияӧн юрнуӧдысьӧн. Мыйсяма удж-мог збыльмӧдӧны ӧтмунӧмын водзмӧстчысьяс? Мый вӧчинныд фестиваль дырйиыс? Кутшӧм сьӧлӧмкылӧмъяс колины?
–Ӧтмунӧмсалӧн удж йывсьыс позьӧ висьтавны помтӧг. Бурджык асьныд видзӧдлӧй ӧтуввезйын vk.comӦmypervie11 лист бокысь. А дженьыдасӧ кӧ, пионериятӧ помнитанныд? Тайӧ сы кодь кымын жӧ ӧтмунӧм.
–Тэ унаысь волін-пырӧдчылін коми гаж-праздникъясӧ. Шуам, майын волін Мурманск обласьтса Ловозероын «Изьватас лун» вылӧ. Эм-ӧ асланым республикаын да сэні гажӧдчӧмын торъялӧм-ӧткодьлуныс? И кутшӧм гаж нӧшта ӧтчыд окотапырысь эськӧ видзӧдін?
–Татшӧм ветлӧмъяссӧ тшӧкыдджыка ас кежысь гусьӧн мӧвпыштла-тунала. Мурманск обласьтын лызьӧн котралан стадион йылысь передача видзӧдігӧн ас кежысь думышті, мися, ок, сэтчӧ кӧ ветлыны. Мӧд лунас корисны волыны Ловозероӧ, обласьтас. А дзик Мурманскас эг вӧв. Сідзкӧ, мӧдысь быть сэтчӧ сюрӧдчыла.
А праздниксьыс шуа ыджыд аттьӧ Кола кӧджын олысь изьватаслы. Муӧдз копыр налы.
Мукӧд гаж кузяыс пасъя: йӧзкостса быд праздник ас ногыс мича да бур.
–Ӧти кадӧ тэ велӧдін коми кыв курсъяс дырйи. Збыль али мый ӧнія кадӧ эмӧсь комисӧ тӧдны окотитысьяс? Ӧд весиг коми бать-мам челядьыскӧд сёрнитӧны кызвыннас рочӧн…
–Ок, кутшӧм доя юалӧм. Да, ме велӧда. И окотитысьыс уна. Но унджыкыслы тайӧ аслыссяма экзотика кодь. Ӧд курссӧ помалӧм бӧрын лыда морт водзӧ тӧдмасьӧ сыӧн. Збыльысь, кывйыс вочасӧн бырӧ, асьным челядькӧд ог сёрнитӧй сыӧн да. А ӧд сӧмын быд лун тайӧс вӧчӧмӧн позьӧ видзны кывсӧ. Быдлунъя варовитӧм кындзи ни ӧти уджтасысь, субсидияысь, этнофестивальысь водзӧсыс оз ло. Коминас колӧ сёрнитны, торйӧн нин быдмысь войтыркӧд. И мывкыд йӧз тайӧс бура гӧгӧрвоӧны.
Оз позь велӧдны кывсӧ сӧмын сы понда, мый сійӧ быть колӧ удж кузяыд либӧ нӧшта мыйлакӧ. Мамтӧ да чужанінтӧ тай он мыйыськӧ бӧрйы. Сідз жӧ и кывтӧ.
Кывйыд – тайӧ абу сӧмын кудйысь важ сарапан да ярманга дырйи чӧскыд шаньга, абу сӧмын гаж-чукӧртчылӧм дырйи некымын кыв шуӧм либӧ «Маръямоль» сьылӧм. Кывйыс ловъя. Сійӧ сӧвмӧ. Сійӧ нюдз да колана. Кывйыд миянкӧд олӧмбыд. И медым сійӧ эз быр-вош, сыӧн колӧ сёрнитны, гижны, мӧвпавны. И ме зіля вӧчны тайӧс.
–Вужвойтыр культура, традиция, семьяпытшса озырлун дорӧ муслунӧн да пыдди пуктӧмӧн йиджтысьӧмаӧсь тэнад кывбур-сьыланкывъясыд. А литература енбиыс – тайӧ рӧдвужсяньыд вуджӧмтор?
–Тайӧ ставыс Енмӧн, чужан муӧн да бать-мамӧн козьналӧмтор.
–Андрей Фёдорович, аттьӧ восьса сёрнисьыд. Выль уджтасъяс тэныд, гуся мӧвп-кӧсйӧмтӧ збыльмӧдны уна позянлун. Виччысям выль кывбур-сьыланъяс.
—И тіянлы аттьӧ! Енмыс мед видзас ставнымӧс. Кута лача, аслам висьтасьӧмӧн некодӧс эг дойд.
Алексей Рочев.
<> Комиӧдіс Елена Плетцер. Снимокъясыс Андрей Терентьевлӧн гортса архивысь.