Сьӧм, медикамент-лекарство да кӧлуй-эмбур помтӧг чукӧртӧм, гуманитарнӧй отсӧг ыстыны контейнер-техника корсьӧм да ставсӧ тайӧс мӧдӧдӧм – торъя военнӧй операция пансьӧмсянь татшӧм удж дугдывтӧг вӧчӧны Сыктывкарысь Елена Албу ёртъясыскӧд.
Боечьяскӧд топыд йитӧд
–Елена Сергеевна, кор ті босьтчинныд чукӧртны СВО-ын тышкасьысьяслы гуманитарнӧй отсӧгсӧ, да коді котыраныд водзмӧстчӧ?
–2022 вося сентябрсянь нин ог ланьтлӧй. Дерт, эмӧсь и отсасьысьяс: Людмила Михайлова, Мария да Алексей Каневъяс, Елена Максимова, Надежда Петрова, Анна Давыдова. Колана здукӧ, торйӧн нин машинаӧ сӧвтчигӧн, век чукӧстчӧны-локтӧны матыссаяс – верӧсъяс, челядь, чой-вок.
–Кытысь тӧдмаланныд, мый колӧ миян боечьяслы?
–Ми кутам накӧд топыд йитӧд. Найӧ юӧртӧны миянлы та йылысь мессенджеръясын, соцсетьын, ыстӧны быдса лыддьӧг-списокӧн. Медвойдӧр уджъёрт-волонтёръяскӧд ӧтув донъялам-видзӧдам, мыйджык вермам чукӧртны, а сэсся корсям позянлун могмӧдны таӧн зонъясӧс, мӧдӧдны налы медся коланасӧ.
«Уна-ӧ таысь вештӧны?»
–Тіянлы, кӧнкӧ, лунтыръясӧн лоӧ пукавны руль сайын? Колӧ ӧд уналаысь ньӧбасьны, волыны фирмаясӧ корны отсӧг?
–Талун со кӧкъямыс час асылын гортысь петі да рытӧдзыс журъялі кар пасьтала СВО-саяслӧн тӧжд-мог кузя. Зэв унаӧн юасьлӧны, а уна-ӧ пӧ тіянлы таысь вештӧны? Мися, кутшӧм нин веш-тысьӧм?! Сьӧмыс кӧ оз тырмы, ассьыным на видзам! Таысь дугӧдчынысӧ, эновтны передӧвӧйын тышкасьысьясӧс ог нин вермӧй. Боечьяслы отсалӧм могысь вежон чӧж суткинас кызь нёль час вӧчам став верманасӧ да весиг вермытӧмсӧ.
«Сюрӧ ставыс»
–Чукӧртӧм сьӧмсӧ видзӧм да ньӧбасьӧм кузя став юӧрыс эм соцсетьын лист боканыд. А тшӧ-кыда-ӧ йӧзыс чукӧстчӧны отсавны корӧм выланыд?
–Куим во чӧж волонтёралігӧн ме гӧгӧрвои: зэв унаӧн окотапырысь эськӧ отсалісны СВО-ын тышкасьысьяслы, сӧмын оз тӧдны, кыдзи тайӧс вӧчнысӧ. Оз ӧд ставныс лыддьыны ӧтуввезйысь юӧръяссӧ. А кор ми аддзысьлӧмӧн ли звӧнитчӧмӧн сёрнитам ас вылӧ уджалысьяскӧд, организация-учреждениеын зільысьяскӧд, сэки нин найӧ тӧдмалӧны, кыдзи вермасны отсавнысӧ. Буретш тадзи дон босьттӧг сӧвтчысьясӧс да стройматериал корсям.
–Сідзкӧ, медся коланаыс да тӧдчанаыс – отсавны кӧсйӧмыс?
–Дзик сідз. Сёрнитчыны позьӧ быдӧнкӧд, быдтор сюрас и. Шуам, стройматериалыс боечьяслы век колӧ. И таво февральсянь ми мӧдӧдім СВО-ын тыш-кось мунанінӧ пӧв да мукӧд пиломатериал тыра дас вит машина.
Корсьны кран да УАЗ дзоньтавны
–Елена, корсьны-чукӧртны медся коланасӧ – тайӧ джын уджыс. А кыдзи нуны-мӧдӧдны тайӧс ставсӧ зонъяслы?
–Чукӧртам да век сюся гӧгӧрбок мӧвпыштам, кыдзи нуны передӧвӧйӧдзыс. Неважӧн со корсим инструмент, кӧлуй-эмбур да техника улӧ контейнер да сійӧс СВО мунанінӧ нуан транспорт. Шы-ӧдчылам уна сикас организация-котырӧ корӧмӧн вӧчны тайӧс дон босьттӧг либӧ неыджыд донысь.
–Фирма-учреждениеясас мунӧны воча? Али ӧвтыштчӧны-пыксьӧны?
–Бизнесад сьӧлӧма йӧз жӧ уджалӧны. Шуам, кольӧм вежонӧ дыр корсим КамАЗ-ӧ сӧвтчыны кран. Контейнерас вӧліны гуманитарнӧй отсӧг тыра ящикъяс да УАЗ. Волім некымын фирмаӧ, весиг кӧсйим нин сьӧм чукӧртны да мынтысьны таысь. И со ӧти компанияӧн веськӧдлысь шуӧ: «Асланым боечьяслы? Да босьтӧй миянлысь!». И сетіс крансӧ дон босьттӧг. Ӧні виччысям нин передӧвӧйысь КамАЗ воӧмсӧ.
–А УАЗ-ыс кытысь?
–Машинасӧ «Народнӧй фронт» пыр сетіс «Россети» компания, а ми кӧсйысим чукӧртны «буханкасӧ» дзоньталӧм могысь сьӧм. Талун УАЗ-ыс пӧшти дась.
Шуруп гартлан, зарядитчан, пӧнар…
–Кыдзи йӧзыс вермасны тіян пыр отсавны спецоперацияын тышкасьысьяслы?
–Позьӧ ньӧбны зонъяслы медся коланасӧ да вайны миянлы. Век колӧ вежсян кӧлуй (трусик, носки, футболка), лапыд салфетка, медикамент, газ баллон да плитка, ном-гебйысь резсянтор, быдсикас инструмент. Зонъяс виччысьӧны тшӧтш шуруп гартлан, болгарка да бензопила, кӧрт тув, скӧба, саморез, генератор, рабица-сетка да сьӧд плёнка гӧрддзым.
А нӧшта боечьяслы век коланаӧсь быдсикас пӧнарыс, рацияыс, нопйыс да мобильнӧй телефонлы зарядка. Сёян йылысь кӧ казьтыштны, зонъяс радейтӧны миян республикаын вӧчӧм рок да тушёнка.
–Мый тіянӧс ышӧдӧ и водзӧ вӧчны тайӧ уджсӧ?
–Сьӧлӧм-лов вылын долыд да нимкодь, кор СВО-ын тышкасьысьяс ыстӧны миян пӧсылкаясӧн снимокъяс, гижӧны аттьӧалана кывъяс. Землякъяс да мукӧд регионысь боечьяс сьӧлӧмсяньныс пӧся аттьӧалӧны чӧскыдторъясысь, футболка-инструментысь. Тайӧ и сетӧ вын-эбӧс водзӧ отсавны налы.
Елена Музыкант.
Соцсетьын пасйӧдъясысь:
«Аттьӧ ставныдлы отсӧгысь! Водзӧ чукӧртам УАЗ дзоньталӧм могысь сьӧм. Весиг 50-100 шайтыс зэв колана. Аккумуляторсӧ ньӧбим!»
«Белгородса кык госпитальӧ да реанимация поездӧ ыстӧмторным воӧма. Аттьӧ ставныдлы! А ми водзӧ чукӧртам рация вылӧ сьӧм…»
«Границадорса «Барс» подразделение аттьӧалӧ отсӧгысь: «Список серти став коланаыс воис. Аттьӧ отсӧгысь!»
«Рекордсьыс на рекорд… Ӧти лунӧ нёль КамАЗ фронт вывсянь воисны. Вочаалім, сӧвтчим, колльӧдім. Ӧтув ми вынаӧсь, ми вермам!»
Тӧд вылӧ: боечьяслы отсавны окотитысьясӧс быд воторникӧ да четвергӧ виччысьӧны 17-сянь 20 часӧдз юркарын Первомай уличаса 78-ӧд номера керкаын 8-ӧд жырйын.
Сьӧм позьӧ ыстыны 89042062773 номера телефон пыр (Сбербанк) Елена Сергеевна А. ним вылӧ.
<> Комиӧдіс Елена Плетцер. Снимокъясыс Елена АлбулӦн гортса архивысь.