Семья – тайӧ ыджыд удж да муслун. А быдтан кӧ аслыспӧлӧс кагаӧс, кык пӧв унджык удж-нокыс да радейтӧмыс колӧ.
Тайӧ петасын висьталам 9 арӧса Юля йылысь. Бать-мамыс зільӧны медицинаын, а сідзкӧ, налӧн отсӧгыс колӧ и йӧзыслы. Дерт, абу кокньыд, кор асывсяньыс сёр рытӧдз удж вылын, а сэсся колӧ на и висьлӧс кагуктӧ сӧвмӧдны, вӧчны сылысь олӧмсӧ яръюгыдӧн.
Яръюгыд нывка
Юля зэв яръюгыд нывка. Радейтӧ модничайтны, и бать-мамыс сылы таын отсасьӧны.
Юлялӧн мамыс сьӧкыда нӧбасьӧма. Унаысь тӧкӧтьӧ абу воштӧма кагасӧ. Но ань вермӧма чужтыны мусаник да муткыль кодь нылукӧс. Бать-мам вӧлӧмаӧсь шудаӧсь, ӧд вир тусьыс быдмӧма дзоньвидзаӧн, сӧмын кокыс вӧлӧма слабджык (гипотонус).
Арӧс да куим тӧлысьӧн Юля сувтӧма кок йылӧ, заводитӧма ветлӧдлыны. Бать-мам нимкодясьӧмаӧсь. Кык арӧсӧн сетӧмаӧсь детсадйӧ. Куим да джынйын Юля заводитӧма ӧтдортчыны тшӧтшъяяссьыс, абу сёрнитӧма.
–Дерт, ми та бӧрын шыӧдчим невролог, логопед, дефектолог дорӧ, ӧнӧдз уджалам накӧд. Миянкӧд да ыджыдджык вокыскӧд Юля бурджыка сёрнитӧ, а тшӧтшъяясыскӧд сійӧс мыйкӧ падмӧдӧ на. Велӧдчӧ школа-интернатын торъя программа серти, кодӧс дасьтӧма омӧля сёрнитысь челядьлы. Классас тшӧтшъяясыс Юляӧс оз ӧтдортны. Позьӧ шуны, на отсӧгӧн и велалӧ йӧз дорас. Миян медшӧр могыс – велӧдны Юляӧс гижны да лыддьысьны. Сійӧ миян молодеч: тӧдӧ нин шыпасъяс, тӧдчымӧн бурджыка сёрнитӧ. Да и гаджетъяс, кодъястӧг миян олӧмын некыдзи нин, тшӧтш отсалӧны Юлялы сӧвмыны, – висьталӧ мамыс.
Мамыслӧн кывъяс серти, нывка радейтӧ серпасасьны. Сылӧн уджъясыс зэв аслыспӧлӧсӧсь, весиг пӧ психологъяс мӧвпалӧны сылӧн серпасъяс вылын. Ӧд сэні нывкалӧн олӧмыс, мӧвпъясыс.
–Сальвадор Далилӧн уджъясыс тшӧтш вӧлӧмаӧсь аслыспӧлӧсӧн, а сійӧ мирын медся нималана серпасасьысьяс лыдын. Код тӧдас, гашкӧ, Юлюк тшӧтш лоӧ нималанаӧн, – нюмъялӧ мамыс.
Зубарев гозъялӧн уджыс юр выв тыр. Ань чеччӧ нёль час асылын, пусьӧ да гортас ставнысӧ вердӧ, сэсся нуӧдӧ Юляӧс школаӧ да котӧртӧ удж вылас. Велӧдчӧм бӧрас нывсӧ котӧрӧн жӧ нуӧдӧ содтӧд занятиеяс вылӧ, кӧні сыкӧд зільӧны специалистъяс. А ачыс бара удж вылӧ.
Батьыс Юлякӧд ноксьӧ шойччан лунъясӧ. Кӧть семьяас удж-нокыс помасьлытӧм, вичмӧдӧны кад ӧтув шойччӧм вылӧ. Кыдзи висьталӧны Зубаревъяс, Юлялы кажитчӧ путешествуйтны. Вонас некымынысь ветлӧны мукӧд карӧ, а гожӧмсӧ коллялӧны дачаын.
Вынсӧ сетӧ пӧсь блин?
–Кыдзи ті ставсӧ удитанныд? – юалі аньлысь.
–Дерт, абу кокньыд, луннас ур моз лоӧ бергавны да, но ми верӧскӧд юкам став тӧжд-могсӧ. Ми ӧд ставсӧ вӧчам нывным ради, – вочавидзис сійӧ.
Мед тырмис вын-эбӧс быдлунъя тӧжд-мог вылӧ, Зубаревъяс «заряжайтчӧны» вӧскресенньӧса блинӧн. Шойччан лунӧ асылыс налӧн зэв чӧскыд, кыдзи висьталӧны. Сёян жырйын ӧвтӧ корица либӧ ваниль дук, кылӧ Юлялӧн кӧлӧкӧльчик кодь гӧлӧсыс. Ань пӧжалӧ блин, верӧсыс пиыскӧд бӧрйӧны, кутшӧм вотӧсӧн кутасны мичмӧдны пӧжассӧ, а Юля, дерт, мичмӧдӧ.
–Юлялы зэв ёна кажитчӧ ӧтув пӧжасьны. Мичмӧдны сійӧ мастер: тасьтіӧ ставсӧ лӧсьыда тэчас… Сійӧ миян медшӧр художник! – ошкӧ нывсӧ мамыс.
Сылӧн кывъяс серти, сэки семьяыс медся шуда, нылыслӧн радлунӧн да вермӧмъясӧн нимкодясьӧны да. Дерт, и водзӧ вылӧ мӧвпалӧны, мый кутасны ӧтув вӧчны.
–Мукӧддырйиыс весиг мӧвпала, мый буретш тайӧ блинъясыс и сетӧны вежон кежлӧ вын, – шуӧ ань. – Юля велӧдчӧ артасьны блинсӧ латкаын бергӧдлігӧн. Сералам, няньшомыс кӧ комокӧсь лоӧ, а сэсся сійӧс сёям. Вӧчас блинысь сьӧлӧм, муслунлы аслыспӧлӧс пас. Тайӧ и эм шудыс – прӧстӧй, шоныд, медводдза блин кодь.
Ичӧт моднича
Быд асыв Юлялӧн – ичӧтик перфоманс. Кыдзи висьталӧ ань, мукӧд челядьыс школаӧ локтӧны стрӧг паськӧмӧн, а Юля моднӧй блогйысь кодь. Радейтӧ баситчыны-тшапитчыны. Кор кыас кӧсасӧ кодзув моз, а кор кӧрталас мича ленточка либӧ лэдзалас юрсисӧ да мичмӧдас бобув-заколкаясӧн, кодъяс быттьӧ вот-вот лэбзясны…
–Тайӧ миян аслыспӧлӧс ритуал, творчество, – водзӧ висьталӧ мамыс. – мичмӧдчӧмӧн вочаалам лунсӧ, мед сійӧ лоӧ шуда. Весиг кӧ сьӧкыд урокъяс, мед радейтана шонді брошкаыс либӧ ка- тшасина ленточкаыс кыпӧдас нылуклысь ловрусӧ, мый и сійӧ ачыс аслыспӧлӧс.
Юлялӧн быдсикас паськӧмыс эм. Шкапас ньӧти гажтӧм платтьӧ абу, ставыс ловру кыпӧдана. Юлялӧн паськӧмыс зепта, кытчӧ сійӧ пуктӧ радейтана карандашсӧ. Юбкаас вышивайтӧма радейтана мойдысь геройясӧс, ковтаыс ки помысь серлӧдлӧма.
–Юля радейтӧ бӧрйыны уна рӧма паськӧм, – нюмъялӧ мамыс. – Мукӧддырйисӧ быттьӧ пазл чукӧртӧ. Шуам, талун лӧз, виж, дзирдалан, аски – алӧй анькытш да турунвиж тупли. Нопсӧ тшӧтш мичмӧдӧ. Кутшӧм сӧмын значок сэні абу! Ӧчкиа каньсянь планетаясӧдз, быттьӧ найӧ висьталӧны Юлялысь пытшсӧ: «Менам мирӧй паськыд».
Буретш тайӧ шыпаса значок-брошкаыс и отсалӧмаӧсь велӧдны алфавит, кор Юля заводитӧма ветлыны логопед дорӧ. А неважӧн сенсорнӧй специалисткӧд мӧвпыштӧмаӧсь сідз шусяна «заколочнӧй код». Гӧрд – сідзкӧ, бур настроенньӧа, лӧз – кӧсйӧ ас кежысь олыштны, ӧшкамӧшка рӧма – дась варовитны.
Медводз педагогъясыс чуймалӧмаӧсь, кыдзи Юля пасьтасьӧ, а ӧні аддзӧны, мый тайӧ колӧ сылӧн сӧвмӧмлы.
–Водзті ми эг тӧдӧй, кыдзи матыстчыны Юля дорӧ, а ӧні видзӧдам, мый петкӧдлас. Петкӧдлӧ кӧ брошка – виччысьӧ ошкӧм, юрсӧ кӧ лэдзӧ да юрси кутансӧ вӧрӧдӧ – колӧ сылы отсӧг, – висьталӧ Юлялӧн психолог Анастасия.
Сылӧн мич дорӧ муслуныс абу ыждалӧм, а терапия юкӧн, шуӧны педагогъяс. Лента кӧрталӧм, брошка пысалӧм – тайӧ чуньпом удж, коді бурмӧдӧ дзоньвидзалун, вежӧр.
Неважӧн Юля шуӧма: «Кор ме платтьӧа, ме принцесса, коді ставсӧ вермӧ вӧчны». И оз весьшӧрӧ тадзи сійӧ шу, специалистъяс и бать-мам казялӧны сёрникузясьыс вежӧртас: яръюгыд да вына.
–Он кӧ кут эскыны кагаыдлы, мый сійӧ вермас, ставыс лоӧ весьшӧрӧ, – шуӧ Юлялӧн мамыс. – Лоны аслыспӧлӧс кагалӧн бать-мамӧн, сідзкӧ, быд лун сылы сетны борд, мед водзӧ ас кежас вермис овны.
* * *
Колӧ пасйыны, тайӧ гижӧдсӧ дасьтӧма «Быть мамой: психологическая гармонизация особой семьи с помощью медиатерапии» социальнӧй уджтас серти, кодӧс збыльмӧдӧны Коми Республикаса юралысьлӧн грант весьтӧ.
Кристина ШУРГАНОВА. Комиӧдіс Екатерина МАКАРОВА. Снимокъясыс ЗУБАРЕВЪЯСЛӦН гортса архивысь.