Комиын артавсьӧ 63 сюрс сідз шусяна самозанятӧй, на лыдысь 47 сюрсыс зільӧ регионын. Тайӧ мӧйму серти 36 прӧчентӧн унджык. Медся уна самозанятӧй таксисталӧ. Но эмӧсь татшӧмъясыс и видз-му овмӧсын. Йӧв-яй да картупель иналан рӧскодысь государство косӧдӧ налы сьӧм.
Кыдзи лоны самозанятӧйнас, да ыджыд-ӧ отсӧг та дырйи чуктас?
Та йылысь висьталісны Коми Республикаса юралысьлӧн Общественнӧй приёмнӧйын.
Регионса видз-му овмӧс министерствоысь госпрограммаяс юкӧнӧн веськӧдлысь Елена Кузнецова:
–Медводз пасъя, мыйӧн самозанятӧй торъялӧ ас овмӧс вӧдитысьысь. Ӧтиыс регистрируйтчӧма да вештӧ вот, а мӧдыс – оз.
2019 вося октябрь 31 лунӧ Коми Республикаса правительствоӧн вынсьӧдӧм постановление гӧгӧрвоӧдӧ, мыйсяма отсӧг вичмӧ видз-му овмӧс прӧдукция вӧчысь-иналысьлы. Тайӧ документас кадысь кадӧ пыртӧны вежсьӧм-содтӧд.
Сідз шусяна самозанятӧй аграрийлы государствосянь вичмӧ некымын сикас отсӧг. Сідз, сійӧ кӧ дӧзьӧритӧ скӧт, быдтӧ картупель, йӧв-яй да град выв пуктас иналӧмысь сетӧны субсидия.
Водзті татшӧм отсӧг шедӧдӧм могысь колӧ вӧлі гижны кабала либӧ электроннӧй кырымпасӧн вынсьӧдӧм шыӧдчӧмсӧ ыстыны ӧтуввез пыр «ГИС АПК»-ӧ. Талун ставсӧ позьӧ вӧчны «Госуслуги» пыр некутшӧм кырымпастӧг.
Медым босьтны государствосянь сьӧм, медводз колӧ регистрируйтчыны самозанятӧйӧн да этша вылӧ 12 тӧлысь вӧдитны ас овмӧс. Зільӧм йывсьыд кабала позяс босьтны сиктса юралысьлӧн сідз шусяна похозяйственнӧй небӧгысь, кӧні пасйӧма, уна-ӧ овмӧсад муыс да скӧтыс.
Самозанятӧй во чӧж дӧзьӧритӧ скӧт, гӧрӧ-кӧдзӧ, иналӧ йӧв-яй, град выв пуктас да чукӧртӧ став чек-кабаласӧ. Сылы некод оз индав, кодлы инавны, предприятие-организациялы либӧ суседыслы.
Республикаса войвыв районын зільысь самозанятӧй фермерлы килограмм яй иналӧмысь федеральнӧй да республикаса бюджетъясысь косӧдасны 51, а лунвылын – 44 шайт, килограмм йӧлысь – 18 да 12 шайт. Картупель кӧть кӧні быдты да вузась, быд килограммысь вештасны 10 шайт.
Татшӧм ногӧн скӧт дорын да му вылын зільысь вермас косӧдны 95 прӧчент рӧскодсӧ.
Картупель вӧдитысьлы тавосянь колӧ пасъявны, мыйсяма рӧскод вӧлі. Тайӧ вермас лоны ньӧбӧм-вузалӧм, услуга босьтӧм кузя сёрнитчӧмъяс. Шуам, кодкӧ гӧрис мутӧ да пуктысис либӧ отсаліс идравны урожай, мыйсяма да уна-ӧ кӧйдыс ньӧбинныд да с.в. Став тайӧ чексӧ колӧ петкӧдлыны видз-му овмӧс министерствоса специалистлы. Сійӧ висьталас, кутшӧм нӧшта кабала колӧ субсидия босьтӧм могысь.
Таво октябрь 1-15 лунъясӧ урчитасны, кодлы косӧдасны картупель иналӧмысь сьӧмсӧ. Та могысь вичмӧдӧмаӧсь нин 1 миллион 311 сюрс шайт. Мӧйму 14 мортлы косӧдісны 396 сюрс шайт. Йӧв иналӧм кузя шыӧдчыліс сӧмын ӧти морт, кодлы вичмис 90 сюрс шайт.
Картупельысь ӧтдор мукӧд град выв пуктасысь республикаын некутшӧм субсидия абу, сы вӧсна мый ас быдтас иналысьыс зэв этша. И абу гӧгӧрвоана, уна-ӧ сьӧм колӧ урчитны локтан во кежлӧ, медым отсавны свеклӧ-морков да капуста вӧдитысьяслы.
Кокньӧд эм и самозанятӧй фермерлы, сылӧн овмӧсыс кӧ бур туйсянь ылын, да сэтчӧ сьӧкыд воӧдчыны. Татшӧм сикт-грездӧн веськӧдлысьыскӧд сылы колӧ шыӧдчыны районса администрацияӧ да босьтны кабала.
Комиын 1-ӧд номера федеральнӧй вот служба управлениеысь госуслугаӧн могмӧдан юкӧнысь главнӧй инспектор Кристина Логинова:
–Самозанятӧйӧн вермас лоны быдӧн, и коді эз на фермерав, и ас вылас зільысь нин. Та дырйи вонас мед нажӧткаыс вӧлі 2,4 миллионысь этшаджык. Таысь кӧ унджык, тайӧ нин ас вылӧ зільысь предприниматель, и вотсӧ сійӧ мынтӧ мӧд ног либӧ прӧстӧй морт мында – 13 прӧчент.
Кымын самозанятӧй зільӧ республикаса видз-му овмӧсын, висьтавны ог вермӧй, сы вӧсна мый найӧс арталӧны сӧмын регистрируйтчӧмин сертиыс. Сійӧ вермас зільны некымын удж вылын, та дырйи овны ӧтилаын, а дистанционнӧя уджавны мукӧдлаын.
Миян ведомстволӧн медшӧр могыс, кыдз шуласны, петкӧдны мортсӧ гож водзӧ, медым сійӧ уджаліс восьсӧн да вештіс вот.
Самозанятӧйлы ас овмӧсас оз позь босьтны удж да гражданско-правӧвӧй сёрнитчӧм серти медалӧмаӧс. Инавны позьӧ сӧмын ас йӧв-яй да град выв пуктас. Оз позь вузасьны кыськӧ ньӧбӧм-вайӧмторйӧн.
Самозанятӧй вермас лоны и ас вылас зільысь предпринимательӧн да паськӧдны-сӧвмӧдны овмӧссӧ, но та йылысь быть колӧ юӧртны вот службаӧ.
Миян ведомствоса специалистъяс самозанятӧйсӧ шуӧны торъя вот режимын зільысьӧн.
Медым лоны татшӧмнас, тырмымӧн пырны да регистрируйтчыны федеральнӧй вот службалӧн «Мой налог» мобильнӧй приложениеын либӧ ведомстволӧн официальнӧй сайтын. Та могысь ковмасны паспортысь пасйӧдъяс, документ лист бокъяссӧ позьӧ снимайтны да ыстыны ӧтуввез пыр, либӧ пырны вот мынтысьлӧн личнӧй кабинетӧ логин да пароль серти.
Регистрируйтӧны зэв ӧдйӧ, сійӧ жӧ лунас. Стӧчджыка кӧ, юӧрсӧ программаас пыртӧм бӧрын кык минут мысти ті нин – самозанятӧй.
Мый бурыс тайӧ торъя вот режимсьыс?
Медводз, оз ков нинӧмысь висьтасьны. Став вузасьӧмыд пасйыссьӧ «Мой налог» приложениеын. Мукӧд серти самозанятӧй мынтӧ этшаджык вот. Сідз, йӧзлы тӧвар либӧ услуга иналігӧн вот ставкаыс 4, а организация-котырлы либӧ предпринимательлы кӧ вузалан – 6 прӧчент.
Та дырйи некутшӧм контроль-касса техника оз ков. Сы пыдди вӧдитчӧны мобильнӧй приложениеӧн.
Оз ков волыны и вот службаӧ, ставсӧ позьӧ вӧчны ӧтуввез пыр приложение отсӧгӧн, кыдз шуӧны, ӧти кликӧн.
Кокньӧдыс уна, но и кывкутӧмыс стрӧгджык. Йӧв-яй да картупель иналӧмысь кӧ абу некутшӧм чек, нажӧвитӧм сьӧмсьыд косӧдасны государстволы кызь прӧчент. Мӧдысь кӧ казяласны, став нажӧткатӧ мырддясны.
Кодсюрӧӧс майшӧдлӧ пенсия. Ас вылӧ зільысь предпринимательлы быть колӧ мынтыны взнос пенсия-медицина кузя страхуйтчӧмысь. Самозанятӧй таысь вермас ӧвтыштчыны. Но ас кӧсйӧм серти сійӧ вермас кырымавны пенсия фондкӧд сёрнитчӧм да мынтыны пенсия страхуйтӧм могысь взнос.
Тӧдчана, уджалан стажсӧ талун арталӧны, кыдзи и Россияса быд пельӧсын, войвыв регион артавтӧг, ӧд самозанятӧй вермӧ зільны удалённӧя. Но тайӧ сідз шусяна эксперимент на. Гашкӧ, мыйсюрӧ и вежасны.
Республикаын потребкооперациялы да фермерлы отсӧг сетан компетенция шӧринӧн веськӧдлысь Ирина Розанова:
–Самозанятӧйӧн регистрируйтчыны отсаласны видз-му овмӧс министерствоын, миян республикаса кар-районын сылӧн юкӧнъясын, а сідзжӧ компетенция шӧринын, юркарса Бабушкин уличаса 23-ӧд номера керкаса 106-ӧд жырйын.
Нӧшта на дон босьттӧг семинаръяс дырйи вермам велӧдны вӧдитны вотӧс-тусь, чипан, малязі, вӧчны сыр, быдтыны укроп-петрушка да мукӧд веж быдмӧг. Арнас воссяс фермер школа.
Видз-му овмӧс уджӧ вермас босьтчыны и 14 арӧса том морт, и олӧма нин пенсионер. Тӧдӧмлун содтыны волӧны и студентъяс. Быдӧнлы сетам курсъяс помалӧм йылысь документ. Сы серти позьӧ пырӧдчыны конкурсӧ да шедӧдны «Агростартап» грант.
Ковмас кӧ, миян шӧринса специалистъяс ветласны мукӧд кар-районӧ да сэні нуӧдасны курссӧ.
<> Николай РАЗМЫСЛОВ. Снимокъясыс авторлӧн.