Интаын кутасны велӧдны том йӧзӧс «Кӧр видзан овмӧсса мастер» профессияӧ.
Республикаса юралысьлысь удж вӧчысь Ростислав Гольдштейнлӧн индӧд серти тайӧ карас Воркутаысь арктикаса горно-политехническӧй колледжлӧн филиалын тавосянь мӧдасны дасьтыны регионса кӧр видзан овмӧсъясын уджалысьясӧс.
Коми Республика – Россияын кӧр видзан медся гырысь регионъясысь ӧти. «Оленевод» ПСК-ын, «Северный» ООО-ын, «Инта Приполярная» агрокомплекс», «Абезь» да «Петруньское» ООО-ясын тавося январын артавсьӧма квайтымын сюрс гӧгӧр кӧр, а республикаса став овмӧсас – 84,8 сюрс пемӧс.
Интаса колледжын «Кӧр видзан овмӧсса мастер» программа серти ӧти во да дас тӧлысь кутасны мынтысьтӧг велӧдчыны 9 класс помалӧм бӧрас кызь ныв-зон. Профессияысь ӧтдор найӧ босьтасны шӧр школаса тӧдӧмлун.
Том йӧзӧс велӧдасны дӧзьӧритны да рӧдмӧдны тундраса пемӧсъяс, вӧчны-переработайтны кӧр яй, а сідзжӧ вӧдитчыны мототранспортӧн.
Талун кӧр видзысьлы колӧ кужны вӧдитчыны ӧнія техникаӧн да связьӧн. Та вӧсна студентъяслы сетасны тӧдӧмлун-сям, кыдзи веськӧдлыны, шуам, лым вывті журъялан буранӧн, вӧдитчыны радиостанцияӧн, уджавны механизируйтӧм начкысянінъясын да яй переработай- тан цехъясын. А практика вылӧ том йӧзӧс кутасны виччысьны Интаса кӧр видзан овмӧсъясын.
Казьтыштам, пастукъясӧс да чумработникъясӧс профессиональнӧя дасьтыны босьтчылісны нин 2001 воын. Сэки вӧлі котыртӧма 13-ӧд номера профлицейын торъя группа. Инта да Изьва районъясысь кызь ныв-зон сэні велӧдчисны куим во.
Интаын Воркутаса горно-политехническӧй колледжлӧн филиалын сетлісны жӧ нин татшӧм профессия серти тӧдӧмлунсӧ, кыдзи и Изьваса политехническӧй техникумын, кӧні том йӧзӧс содтӧд велӧдісны трактористӧ да тшӧтш и буран-квадроциклӧн веськӧдлыны.
Колӧ пасйыны, мый войвылын кӧр видзӧмыс – Арктика зонаса видз-му овмӧсын дзик ӧти юкӧн, кӧні матӧ став пастук-чумработникыс – Войвылын олысь вужвойтыр, кодъяслӧн уджыс топыда йитчӧма кӧр видзысьяслӧн нэмӧвӧйся оласногкӧд да традицияяскӧд.
Гижӧдсӧ дасьтіс Александра АРТЕЕВА. Снимокыс ӧтуввезйысь.