Туберкулёз, В да С вируса гепатит, ВИЧ, сифилис, гонорея, псориаз, педикулёз, чесотка да уна мукӧд пӧрӧс. Мый найӧс ӧтувтӧ? Врачьяс да учёнӧйяс тайӧ висьӧмъяссӧ шуӧны социальнӧйӧн, сы вӧсна мый паськалӧны да кӧвъясьӧны йӧзлӧн дурк оласног да весиг странаын гӧль да омӧлик экономика вӧсна.
Кыдзи видзчысьны тайӧ пӧрӧсъяссьыс? Позьӧ-ӧ наысь мынтӧдчыны да мый вӧчны та могысь?
Кутшӧмсюрӧ социальнӧй висьӧм йылысь сёрни муніс Коми Республикаса юралысьлӧн Общественнӧй приёмнӧйын.
Комиын Роспотребнадзор управлениеысь эпидемиология надзор юкӧнӧн веськӧдлысьӧс вежысь Татьяна Раевская:
–Лыддьӧдлӧм пӧрӧсъяссӧ шуӧны социальнӧйӧн и сы понда, мый йӧзсӧ наысь дорйӧны оз сӧмын врачьяс, профилактика нуӧдӧны и власьт тэчасын зільысьяс, общественникъяс да мукӧд. Ускӧттьӧыс нёрпалысьяс вӧсна тӧдчана и предприятие-котырлы, и ставнас обществолы.
Туберкулёз Комиын надзӧник чинӧ. 2023 воын висьмис 180, а мӧйму – 175 морт.
Медся ӧдйӧ Кох бацилласӧ позьӧ казявны флюорография вӧчӧмӧн. Предприятие-организацияӧн кывкутӧмӧн веськӧдлысь вонас ӧтчыд сы дорын быд зільысьлысь корӧ флюорография вӧчӧм йылысь справка.
Но, кыдз тыдовтчӧ, воысь-во снимоксӧ вӧчӧны ӧти и сійӧ жӧ йӧзыс. Флюорография кабинетӧ, позьӧ шуны, оз пыравлыны пенсионер, вермытӧм, найӧ, кодъяс оз уджавны. Татшӧмыс республикаын став олыссьыс нёльӧд пайыс, а туберкулёзӧн висьысьяс пиысь – 71 прӧчент. Тайӧ пӧрӧссӧ казялӧны и сикт-грездса мужичӧйяслысь. На пиысь унаӧн ӧвтыштчӧны жӧ флюорографиясьыд.
И, дерт, верстьӧӧс и челядьӧс медся бура дорйӧ вакцина. Уколасьӧмалы кӧ кӧвъясяс бацилла, мортыс нёрпалас кокньыда. Сэсся фтизиатрсянь справкатӧг да туберкулинодиагностикатӧг кагаӧс оз босьтны сад-яслиӧ, оз водтӧдны больничаӧ, оз лэдзны школаӧ, гожся лагерӧ да санаторийӧ.
ВИЧ-ӧн да СПИД-ӧн нёрпалысьясӧс Комиын бурдӧдӧны СПИД-лы да мукӧд кӧвъясян висьӧмлы паныд водзсасян да профилактика нуӧдан республикаса шӧринын. Та вӧсна та йылысь бурджыка висьталасны сэтчӧс специалистъяс. Но тӧдса, мый Россияын тайӧ пӧрӧссӧ казялӧмаӧсь ылӧсас миллион мортлысь, а тайӧ став олыссьыс 1 прӧчент гӧгӧр. Миян регионын мӧйму ВИЧ-ӧн висьмӧма 285 морт, воддза воын татшӧмыс вӧлӧма 384.
ВИЧ-ыс йиджӧ да поздысьӧ сӧмын вирӧ, мужичӧй сперма-кӧйдысӧ, нывбаба секретӧ да морӧс йӧлӧ. Сідзкӧ, пӧрӧсыс вермӧ кӧвъясьны, висьысьыслысь вирсӧ кӧ сюясны дзоньвидза мортлы. Тайӧ вермас лоны, ӧти и сійӧ жӧ шприцӧн кӧ вӧдитчӧ некымын морт.
Инфекцияа вирыс вермас веськавны татуировка, маникюр-педикюр вӧчигӧн, операция дырйи, ем-шыран да медицина инструментсӧ кӧ эз колана ног стерилизуйтны. ВИЧ вермас вуджны и операция дырйи, мортыслы кӧ сюясны инфекцияа вир либӧ сыысь вӧчӧмтор, висьысьлысь кӧ ты-мус-вӧрксӧ вурасны мӧдлы, а сідзжӧ нывбабаӧс кӧ искусственнӧя тырсьӧдасны висьысь донор спермаӧн.
Бӧръя дас вонас ёна унджыкӧн пӧрӧссӧ мӧдісны кӧвъявны мусукасигӧн.
Татшӧм ногӧн кӧвъясьӧны и гонорея да сифилис.
Чесотка гаг да той XVII нэмын мӧдаръюгыдас ыстӧмаӧсь зэв уна йӧзӧс. Талун тойӧссьӧмыс ёнджыка йиджӧ психика-вежӧрӧ. Унаӧн яндысьӧны таысь да оз шыӧдчыны врач дорӧ. Та вӧсна сьӧкыд висьтавны, кымын морт майшасьӧ тайӧ пӧрӧснас. Аптекаын талун эм той бырӧдан быдсикас лекарствоыс, донтӧмыс и зэв донаыс. Но век жӧ кыдз позьӧ тшӧкыдджыка видзӧдлӧй пиыдлысь да нылыдлысь юрсӧ, торйӧн нин юрсиыс кӧ кузь. Гожся лагерысь кодсюрӧ вайӧ татшӧм «козинсӧ».
Лудан висьӧмысь мортыс ёна гыжъясьӧ, та вӧсна кучикас вермас веськавны инфекция.
Республикаса кожвендиспансерын главнӧй врачлысь удж вӧчысь Юрий Мокрушин:
–Медводз эськӧ казьтышті сідз шусяна венерическӧй висьӧмъяс. Тайӧ ылӧсас кызь пӧрӧс. На лыдын и лудан висьӧм да педикулёз, кодъяс вермӧны жӧ вуджны мусукасигӧн, важысянь нин тӧдса сифилис, гонорея, а сідзжӧ выль инфекцияяс: микоплазмоз, хламидиоз, ВИЧ, папиллома вирус да мукӧд.
ВОЗ-лӧн юӧртӧм серти, мирас пӧ быд во венерическӧй висьӧмыс кӧвъясьӧ 15-49 арӧса 340 миллион мортлы.
Ас кадӧ кӧ босьтчыны бурдӧдчыны, став инфекциясьыс позьӧ мынтӧдчыны. Он кӧ тайӧс вӧч, пӧрӧсыс ёсьмас. Сідз, хламидиоз ёна омӧльтӧ ки-кок кусыньяс, сифилис мӧрччӧ сьӧлӧмӧ-сӧнъясӧ да вейясӧ, а папиллома вирус вайӧдӧ лёк пыкӧсӧдз.
Став тайӧ инфекция вӧснаыс нывбабалӧн оз гӧрддзась кага, либӧ чужтас кадысь водз, а вермас и шой чужны. Мужичӧйлӧн кӧйдысыс лёкмӧ жӧ да, оз артмы кага.
Венерическӧй висьӧмсӧ кӧвъялӧны тӧдтӧмкӧд да унакӧд мусукасигӧн. Миян кожвендиспансерӧ шыӧдчысьлысь юасям, кутшӧм ногӧн да кор висьмис. Тӧдмаси пӧ войся клубын нывбабакӧд, ӧтлаын узим, тӧда пӧ сӧмын нимсӧ, а овсӧ пӧ ог. А миянлы ӧд колӧ туявны, коді разӧдӧ пӧрӧссӧ.
Тӧдмаланныд кӧ, мый мортыс бурдӧдчӧ кутшӧмкӧ инфекцияысь, бурджык виччысьны, кор сійӧ дзикӧдз мынтӧдчас пӧрӧссьыс. Оз позь мусукасьны гажа юрӧн, ӧд сэки унатор он казяв. Та дырйи быть колӧ вӧдитчыны презервативӧн.
Кӧвъялӧм гонорея петкӧдчас 3-7 лун мысти, сифилис йылысь тӧдмалан 2-3 вежон мысти, а ВИЧ-СПИД «кисьмӧны» нӧшта на дырджык.
Мӧйму сифилис казялісны 29 мортлысь, воддза воын висьӧма 33.
2015 восянь нин сифилис да гонорея эг казявлӧй челядьлысь. Но кольӧм во 15 арӧса зонка кыськӧ кӧвъялӧма гонорея.
Карс, лӧм парч, рочӧн кӧ, микроспория либӧ трихофития йӧзыс нимтӧны стригущӧй лишайӧн.
Микоспорияӧн нёрпалысь чиныштіс. 2023 воын татшӧмсӧ казялісны 160 мортлысь, а кольӧм во – 157-лысь.
Зоофильнӧй инфекциясӧ разӧдӧ кань, шочджыка пон да гортса мукӧд посньыд пемӧс. Тайӧ пӧрӧссӧ тшӧкыда вайӧны челядь лунвылын шойччӧм бӧрын. Сэні уна шӧйтысь пон-кань. Челядь торйӧн нин радейтӧны малавны каньпиянӧс, весиг вольпасяс найӧс босьтӧны.
Микроспория радейтӧ поздысьны юрад, синкымад, син лыскад да гыжъяд. Юрсиыд та дырйи едждӧ-косьмӧ да чегъясьӧ. Артмӧны 10 сантиметр пасьта «шырӧминъяс».
Мӧйму 2023 воын серти тойӧссис этшаджык морт (314 да 358).
Той казявны абу сьӧкыд, юрси вуж дорӧ эньыс пуктӧ еджыд колькъяс. Серовсьыс верстьӧ той артмӧ 8-10 лунӧн. Тойӧссьӧм морт ӧтарӧ гыжъясьӧ, курччӧминыс лудӧ да. Та вӧсна кучикыс гӧрдӧдыштӧ жӧ, артмӧны папулаяс.
Тойысь медӧдйӧ позьӧ мынтӧдчыны, шыран кӧ юртӧ. Юрсиыд абу пинь, быдмас.
Анягур либӧ чесотка дырйи мортлӧн кучикас пырӧ 10-15 ичӧтик гаг, кодъяс сэсся йирӧны «ордымъяс» да пуктӧны сэтчӧ колькъяс. 4-6 вежон мысти кучикад рӧдмас некымын сюрс либӧ некымын миллион гаг.
Гагйыс «садьмӧ» рытнас да войбыд визлалӧ йирӧм туйясті, чӧсмасьӧ вир-яйнад да рӧдмӧ. Дерт, та дырйи кучикыд ёна лудӧ, да мортыс помся гыжъясьӧ.
Мӧйму чесотка казялісны 110 мортлысь, воддза воын вӧлі 109. Медбур профилактика – ывлаысь пырӧм бӧрын китӧ мыськыны майтӧгӧн либӧ антисептикӧн.
Дзоньвидзалун видзан министерствоысь челядьлӧн внештатнӧй фтизиатр, тубдиспансерысь главнӧй врачӧс вежысь Валентина Гудырева:
–Тайӧ инфекцияыс кӧвъясьӧ сӧмын лолыштӧмӧн, орччӧн кӧ кызӧ туберкулёзӧн висьысь. Но татшӧмыс вермас лоны сӧмын пӧдса жырйын да дыр кад кӧ лолавны татшӧм сынӧднас.
Кага чужӧм бӧрын 3-7 лун мысти нин, ставыс кӧ лючки дзоньвидзалун боксяньыс, роддомас сылы пельпомас вӧчӧны БЦЖ-М вакцина. Ӧтисянь 15 арӧсӧдз детсадйын либӧ школаын челядьлы вӧчӧны Манту реакция. Вӧчӧминыс кӧ ёна гӧрдӧдӧ, ыстӧны тубдиспансерӧ фтизиатр дорӧ. Сійӧ нин стӧча вермас туявны, эм-ӧ кагаыслӧн туберкулёз. 12 во нин республикаын 8-17 арӧса челядьлы вӧчӧны диаскинтест. Сэні тшӧтш эм туберкулин, но тестыс петкӧдлӧ сӧмын сійӧ палочкаяссӧ, кодъяс эмӧсь вир-яйын да вермасны вайӧдны висьӧмӧдз. 15 арӧссянь ныв-зонлы вӧчӧны флюорография.
Верстьӧ лыдысь кык коймӧд пайыслӧн пӧ вир-яяс эм туберкулёз микобактерия. Но быд сё татшӧм мортысь сӧмын витыс висьмӧ. Мукӧдыслӧн палочкаыс «вугралӧ». «Садьмӧдны» найӧс вермасны ВИЧ-инфекция, диабет, язва, бронхит, лейкоз да мукӧд висьӧм, а сідзжӧ лёк оласног.
Туберкулёзсӧ кӧ казялісны водз, сыысь позьӧ мынтӧдчыны. Татшӧм висьысьсӧ бурдӧдӧны квайт тӧлысь «кокньыд» да донтӧм лекарствоӧн. Но эмӧсь нёрпалысьяс, кодъяслы вир-яяс пӧрӧсыс ёна нин вужъясьӧма, да нӧшта на та дорӧ мортыслы кӧвъясьӧма ВИЧ-инфекция да мукӧд висьӧм. Татшӧмсӧ ковмас бурдӧдны стационарын кык во да дырджык зэв «чорыд» да дона лекарствоӧн.
Медым тайӧ пӧрӧсыс эз вужъясь вир-яяд, вонас ӧтчыд колӧ вӧчны флюорография. Колӧ дугӧдчыны куритчӧмысь да курыд зелляӧн дурӧмысь. Босьтчӧй дзоньвидза оласногӧ, радейтӧй вӧр-ва, тшӧкыдджыка мыськӧй китӧ да лючки сёйӧй.
<> Николай РАЗМЫСЛОВ. Снимокыс авторлӧн.