Кыдз юӧртӧ ставмирса дзоньвидзалун котыр (ВОЗ), талун пӧ Му шар вылын олысьясысь коймӧд пайыс нёрпалӧ щитовиднӧй железакӧд йитчӧм висьӧмӧн.
Россияын татшӧмыс 40 прӧчент. Миян странаын 14 миллион мортлӧн – йиткырас гӧрӧдъяс, 10-30 прӧчентыслӧн сьыліас чуль (зоб), а 6-ыслӧн — лёк пыкӧс.
Кодлы кӧвъясьӧ тайӧ пӧрӧсыс? Позьӧ-ӧ сыысь мынтӧдчыны? Кор колӧ шыӧдчыны врач дорӧ?
Та йылысь сёрни вӧлі Коми Республикаса юралысьлӧн Общественнӧй приёмнӧйын.
Комиын йӧзлысь дзоньвидзалун видзан министерствоысь главнӧй внештатнӧй эндокринолог, республикаса клиника больничаысь эндокринология юкӧнӧн веськӧдлысь Елена Голикова:
—Щитовиднӧй железа либӧ, кыдз йӧзыс шуӧны, щитовидка — сьылі водзладорын ичӧтик йиткыр. Видзӧднысӧ бобув кодь. «Бордъясас» тиреоид гормона фолликулаяс. Щитовиднӧй, вӧрквывса йиткыръяс, гипоталамус, гипофиз, яичникъяс артмӧдӧны эндокриннӧй система.
Щитовидка лэдзӧ вирӧ тиреоид гормонъяс — ТЗ (трийодтиронин) да Т4 (тироксин). Найӧ уджӧдӧны медводз сьӧлӧм, вей, юр вем, гырк, могмӧдӧны клеткаяснымӧс кислородӧн, разӧдӧны витамин, видзӧдӧны вир-яйлӧн температура да тӧлысся бӧрся, ёнмӧдӧны иммунитет.
Кыдз аддзам, тайӧ йиткыр саяс — вир-яйлӧн дзоньвидзалун. Сылӧн и нимыс артмӧма «щит» кывйысь. Сідзкӧ, сійӧ дорйӧ миянӧс став пӧрӧссьыс.
ТЗ да Т4 гормон артмӧдӧм могысь колӧ йод, суткинас 110 — 150 мкг.
Вир-яйын сійӧ ачыс оз артмы, а веськалӧ сёян-юанӧн да лекарствоӧн.
Щитовидка удж бӧрся видзӧдӧ гипофиз — юр вем улын анькытш тусь ыджда йиткыр. Кор вир-яйын этша Т4-ыс, гипофизыс содтӧ тиреотроп гормон (ТТГ). И, мӧдарӧ, Т4 гормоныс кӧ колана мындаысь унджык, ТТГ-ыс чинӧ.
Татшӧм ногӧн сьыліад артмӧ эндемия либӧ спорадическӧй чуль (зоб).
Щитовиднӧй йиткырын 80 прӧчент торксьӧмыс буретш йод тырмытӧм понда. Комиын, да и ставнас Россияын олысьяслы сёян-юанас оз тырмы тайӧ колана элементыс.
Кор заводитчӧ тайӧ пӧрӧсыс, сьӧкыд казявны. Но участокса терапевт дорӧ колӧ шыӧдчыны, казяланныд кӧ, мый горшад мыйкӧ неладнӧ, эм кутшӧмкӧ ёкмыль, сьӧкыд ньылавны, либӧ ад-дзанныд сьыліад кутшӧмкӧ пыкӧс.
Врач тшӧктас вӧчны колана анализ да ыстас эндокринолог дорӧ.
Вир-яяд кӧ веськалӧ этшаджык гормон, кучикыд косьмӧ, гыжйыд чегъясьӧ, юрсиыд гылалӧ, давленньӧыд улын, пульсыд зэв гежӧд, быдлаті пыктышталӧ.
Мӧдарӧ, артмӧ кӧ вывті уна гормон, мортыс омӧльтчӧ, кӧть и уна сёйӧ-юӧ, ёна ньылӧдӧ, сьӧлӧмыс муртса оз чеччышт морӧссьыс, давленньӧыс вылын. Щитовидкаӧн нёрпалысьлӧн синмас двӧитчӧ, син бугыльыс ёна ыдждӧ да быттьӧкӧ кӧсйӧ петны син кӧршсьыс (Базедов висьӧм), синъясыс ӧтарӧ лудӧны, быттьӧ лыа веськалӧма.
Мортыслы кӧ оз тырмы йод, сійӧ ӧдйӧ мудзӧ, вын-эбӧсыс чинӧ, юрыс мӧдӧ лёка уджавны, гӧгӧрвоана, челядь лёка велӧдчӧны. Тайӧ вермас вайӧдны кретинизмӧдз да пыкӧсӧдз, нывбаба да мужичӧй оз вермыны чужтыны кага.
Щитовидкалы позьӧ отсыштны и аслыным. Бур профилактикаӧн медводз лоӧ йода сов. Сыӧн позьӧ вӧдитчыны и сэк, юанныд кӧ нин кутшӧмкӧ гормон.
Дерт, щитовидкалы ёна отсаланныд, мӧданныд кӧ колана мында да ӧти кадӧ узьны, песны асьнытӧ физкультураӧн. И медбӧрын, тшӧкыдджыка петкӧдчылӧй врачлы, оз ков ӧвтыштчыны профосмотрысь да диспансеризацияысь.
Комиын йӧзлысь дзоньвидзалун видзан министерствоысь челядьлӧн главнӧй внештатнӧй эндокринолог, челядьлӧн Сыктывкарса коймӧд номера поликлиникаысь врач-педиатр Лариса Гордиенко:
—Щитовиднӧй йиткырыс дзолюклӧн артмӧ мам кынӧмас на 2-4 вежон мысти. Железаыс сылӧн юрас, а сэсся надзӧник лэччӧ голяас. Но, овлӧ, оз лэччы либӧ веськалӧ мӧдлаӧ. Та вӧсна гипотиреозӧн нёрпалысьлӧн щитовидкаыс абу сьыліас, а кыв дінас, горш дін йиткырас (миндалинаас), морӧспань саяс либӧ мукӧдлаын.
Щитовидкаӧн майшасьысь 78 прӧчент кагаыслӧн бать-мамыс либӧ пӧль-пӧчыс тшӧтш висьлӧмаӧсь татшӧм пӧрӧснас. Дзолюкыслы вермас вуджны мамсяньыс гипоплазия, аплазия, эктопия, чуль (зоб), гипотиреоз, бур либӧ лёк пыкӧс.
Щитовидкаӧн ёнджыка нёрпалӧны нывбабаяс, шуам, аутоиммуннӧй висьӧмъяс дырйи, кор мортыслӧн иммунитетыс вир-яйсьыс бырӧдӧ дзоньвидза клеткаяссӧ.
Тайӧ йиткырас лёк пыкӧсыс ӧткодя кӧвъясьӧ мужичӧйлы и нывбабалы. Щитовидкаӧн ёнджыка майшасьӧны 60 арӧсысь олӧмаджыкъяс.
Щитовидка вылӧ ёна мӧрччӧ куритчӧм, быд-сикас стресс. Интерферона, интерлейкина, моноклональнӧй антителӧа, лития да мукӧд сикас лекарствоысь вермас заводитчыны медикаментоза тиреоидит.
Щитовидкаӧн нёрпалысьлы позьӧ юны калий йодид. Пузчужӧмсянь 5 арӧсӧдз тырмымӧн суткинас 90 мкг. 6-12 арӧсалы колӧ юны 150 мкг, а таысь ыджыдджык арлыдалы — 200-250 мкг.
Европаын XIX нэмын на казялӧмаӧсь, мый горшын чуль артмӧ йод тырмытӧм вӧсна. Унаӧн майшасьӧмаӧсь щитовидкаӧн Украинаын да Белоруссияын. Та вӧсна 1955 воын торъя индӧдӧн миян странаын вӧлі тшӧктӧма вӧдитчыны йода солӧн.
Колӧ шуны, йодыс зэв рыж. Сёян-юанӧ сійӧс бурджык пуктыны пуӧм-пражитӧм бӧрас либӧ кор вӧлӧгаа тасьтіыс пызан вылын нин. Тадзи колӧ вӧчны сы вӧсна, мый дыр пуигӧн совсьыс йодыс вошӧ.
Унаӧн радейтӧны дась сёян-юан, сосиски-калбас, пельмень да мукӧд сикас сола вӧлӧга. Сэні вывті уна вир-яйлы ковтӧм солыс. Бурджык дасьтыны сёян-юансӧ аслыныд да пуктыны сэтчӧ колана мында йода сов. Быд кӧзяйкалы пызан вылас колӧ видзны йода сов доз.
Йоднас озырӧсь саридзса капуста, чери, креветка да мукӧд татшӧм прӧдукта, йӧла вӧлӧга да чипан кольк виж. Йод эм и яблӧгын, бананын, турунвиж салатын, шпинатын да шомкорйын. Арнас позьӧ тшӧкыдджыка номсасьны сьӧд пелысьӧн да сэтӧрӧн.
Ставсӧ тайӧс бурджык сёйны дыр путӧг-дасьтытӧг. Шуам, 100 грамм вӧлӧгаын ылӧсас 100-200 мкг йод, а пуӧм бӧрын сэні кольӧ уна вылӧ 4 мкг.
Республикаса физдиспансерысь дзоньвидзалун да медицина профилактика шӧринӧн веськӧдлысь Татьяна Лыюрова:
—Мӧйму гипотиреоза ни ӧти кага эз чуж. Воддза воын неонатальнӧй скрининг вӧчӧмӧн казялім кык пузчужӧм кагукӧс, кодъяслӧн вӧлі гипотиреоз. Тайӧ пӧрӧссьыс дзикӧдз он мын, но сійӧс позьӧ ёна кокньӧдны, ас кадӧ кӧ сетны щитовиднӧй йиткыр гормон. Он кӧ тайӧс вӧч, омӧльтчас когнитивнӧй функция, юр вем мӧдас лёка уджавны, да тайӧ вайӧдас кретинизмӧдз. Но талун тайӧ дзолюкъясыс лючки быдмӧны, и нинӧм лёкыс налӧн олӧмын оз ло.
Неонатальнӧй скринингӧн вӧдитчам 2023 восянь. Водзті вермим казявны вит пӧрӧс, а талун нин — нелямын ӧти.
Ас кадӧ чужӧм кагалысь 24-48 час, а кадысь водз чужӧмалысь 7 лун мысти босьтӧны вит войт вир, медым туявны та мында жӧ висьӧм, а сідзжӧ 36 пӧрӧс казялӧм могысь куим войт. Комиын вирсӧ босьтӧны быд роддомын либӧ поликлиникаын, кутшӧмкӧ помка вӧсна кӧ тайӧс эз вӧчны кага чужтанінас.
Вит войтсӧ туялӧны Сыктывкарса перинатальнӧй шӧринлӧн медико-генетическӧй лабораторияын, а куимсӧ ыстӧны Санкт-Петербургса диагностика шӧринӧ.
Анализ дырйи казялӧм пӧрӧс йылысь пыр жӧ юӧртӧны Комиын генетика службаӧ. Татшӧм кагасӧ корасны вайлыны генетик дорӧ либӧ водтӧдасны челядьлӧн клиника больничаӧ, медым нӧшта ӧтчыд донъявны сылысь дзоньвидзалунсӧ.
<> Николай РАЗМЫСЛОВ. Снимокъясыс авторлӧн да ӧтуввезйысь.