Сыктывкарын май 27 – июнь 4 лунъясӧ муніс Россияса ичӧт каръяслӧн ХХІІ театральнӧй фестиваль. Петкӧдчисны дас вит карысь театръяс. Кыпыд гажсӧ сиисны тшӧтш и Сыктывкарлӧн юбилейлы. Миян республикаса юркарлы таво тырӧ 245 во.
Фестивальсӧ восьтісны опера да балет театр водзын миян творческӧй котыръяс. Видзӧдысьясӧс чолӧмаліс и Россияса народнӧй артист Евгений Миронов.
Фестивальсӧ дасьтӧ-котыртӧ «Театр Наций», кӧні художествоа веськӧдлысьыс буретш Евгений Миронов. Сылӧн кывъяс серти, тайӧ гажыс ӧтувтӧ-йитӧ Россияса регионъясысь аслыспӧлӧс творческӧй котыръяс.
Таво бӧрйӧмаӧсь страна пасьталаысь дас вит театрлысь уджъяссӧ. Тайӧ Комиысь (Воркутаысь Борис Мордвинов нима драмтеатр «Сильва. Дойти до премьеры» постановкаӧн), Татарстанысь, Ханты-Мансийскысь, Перым, Красноярск да Приморье крайясысь, Ростов, Свердловск, Улыс Новгород да Кемерово обласьтъясысь театръяс. Артистъяс ворсісны ыджыд формаа квайт да ичӧт формаа ӧкмыс спектакль.
Фестивальлӧн аслыспӧлӧслуныс сыын, мый артистъяс вермисны кольччыны помӧдзыс, мед ви-дзӧдны став петкӧдчысьыслысь уджъяссӧ, пырӧдчыны спектакльяс донъялӧмӧ, мастер-классӧ, семинарӧ, педагогъяскӧд тренингӧ, мукӧд уджтасӧ.
Евгений Миронов пасйис, мый мирын Россияысь кындзи некутшӧм странаын театр дорӧ татшӧм муслуныс абу.
–Медкӧ ми вонас ӧтчыд аддзысьлам, но миянлы тайӧ зэв тӧдчана лоӧмтор. Збыльвылас кӧ, тайӧ смотр-конкурссӧ котыртны абу кокньыд. Тайӧ и аддзысьлӧм, ёртасьӧм, вылинӧ волӧм, кӧні нуӧдам фестивальсӧ, и ставыс шонтӧ да югзьӧдӧ ловтӧ.
Миян збыльысь пыдди пуктӧны ичӧт каръясысь театр, сэтчӧс артистъяслысь уджсӧ. Коми медводдзаысь пырӧдчис ичӧт каръяслӧн фестиваляс. Тайӧ збыльысь аслыспӧлӧс регион, тайӧ «фантастическӧй ин». Нимкодь, мый ме тані, мый сэтшӧм шоныда вочаалісны, и окота на мӧдысь волыны, – юксис сьӧлӧмкылӧмъяснас Евгений Миронов.
Фестиваль восьтігӧн, кыдзи пасйи нин, петкӧдчисны татчӧс творческӧй котыръяс. Тайӧ Сыктывкарса гарнизонысь военнӧй оркестр, опера да балет театр, Виктор Савин нима драмтеатр, вужвойтырлӧн шылада-драмаа театр да филармонияса «Асъя кыа» ансамбль.
Петкӧдчисны йӧз водзын и фестивальӧ пырӧдчысьяс, быдӧн ас котырӧн тӧдмӧдіс.
Шуам, Набережные Челныысь артистъяс висьталісны, мый воисны «КамАЗ чужанінысь», Альметьевскысь котыр чолӧмаліс ставнысӧ татара кывйӧн.
Коми Республикаысь культура да архив удж кузя министр Марина Бурмистрова ставнысӧ чолӧмаліс «искусство праздникӧн» да «аслыспӧлӧс гажӧн».
–Зэв нимкодь, мый миян Сыктывкар ӧкмыс лун кежлӧ лоис театральнӧй юркарӧн, – висьталіс сійӧ. – Регионъясын зэв аслыспӧлӧсӧсь театръясыс. А нӧшта на нимкодьджык, мый и миян Вор-кутаса театрысь артистъяс тшӧтш пырӧдчисны тайӧ кыпыд да тӧдчана фестиваль-конкурсас.
Збыльысь нимкодь вӧлі Воркутаса артистъяслы пырӧдчыны театральнӧй фестивальӧ, торйӧн нин «Сильва. Дойти до премьеры» спектакльӧн, коді войвыв карын олысьяслы зэв тӧдчана.
Тайӧ постановкаыс, казьтыштам, Воркутаын труппа чужӧм йылысь. Видзӧдысьяс ёна нин ошкисны воркутасалысь «Сильвасӧ», да и театральнӧй критикъяс вылӧ донъялӧны.
Буретш тайӧ постановкасӧ ӧні видлалӧны «Золотая маскаын». Вермас лоны, и нималана конкурас сылы вичмас премия.
Фестиваль-конкурсын вермысьясӧс йӧзӧдасны-нимӧдасны некымын нимпасын (тайӧ гижӧдсӧ дасьтігӧн эз на вӧвны тӧдсаӧсь медбуръясыс): «Ыджыд формаа медбур спектакль», «Ичӧт формаа медбур спектакль», «Медбур мужичӧй роль», «Медбур ань роль», «Надежда» приз.
Ыджыд да ичӧт формаа спектакль нимпасъясын вермысьяс сэсся петкӧдчасны Москваын «Театр Наций» сцена вылын.
Жюриын вӧліны нималана театральнӧй критикъяс да театр бердын уджалысьяс.
На пӧвстын Россия Федерацияса народнӧй артистка Ольга Остроумова, а сідзжӧ и Коми Республикаса опера да балет театрысь вӧвлӧм главнӧй балетмейстер, Россия Федерацияса заслуженнӧй артист Андрей Меркурьев, а жюриӧн юрнуӧдысьыс – Перымса академическӧй «Театр-Театрысь» художествоа веськӧдлысь Борис Мильграм.
Фестивальын конкурсысь ӧтдор петкӧдчисны куим гӧсьт.
Тайӧ Мариупольысь республикаса академическӧй «Знак Почёта» ордена роч драмтеатр, коді Челядьӧс доръян лунӧ петкӧдліс «Аленький цветочек».
Москваысь А.С.Пушкин нима драмтеатр июнь 3-4 лунъясӧ петкӧдліс Борис Васильевлӧн повесьт серти «Завтра была война» спектакль.
Фестивальын гӧсьтӧн вӧлі и миян опера да балет театр, коді козьналіс искусство радейтысьяслы «Фантазии на тему Кармен» балет рыт.
<> Екатерина МАКАРОВА. Снимокъясыс ӧтуввезйысь.