Талун кодсюрӧ олӧны уджйӧзӧн. На кузя, кодъяс оз кӧсйыны мыйыськӧ вештысьны, судлӧн шуӧм серти приставъяс панӧны сідз шусяна исполнительнӧй производство, и мортыс ас вӧляысь оз вермы вӧдитчыны банкса карта-тшӧтӧн, эмбурӧн, машинаӧн, ставсӧ тайӧс арестуйтӧны да.
Нӧшта кутшӧм ногӧн приставъяс перйӧны уджйӧзсӧ? Кыдзи позьӧ ӧдйӧджык вештыны алимент да штрап?
Тайӧ да мукӧд юалӧм вылӧ республикаса юралысьлӧн Общественнӧй приёмнӧйын вочавидзис Комиын суд приставъяс федеральнӧй служба управлениеӧн (УФССП) веськӧдлысьӧс вежысь Максим Орлов.
–Максим Борисович, талун кежлӧ республикаын уна-ӧ панӧма исполпроизводствосӧ?
–Панӧма 600 сюрс. Сы лыдын медся уна, 25-30 прӧчентыс, коммунальнӧй услуга вештытӧмысь. Муртса этшаджыкӧн уджйӧзасьӧмаӧсь банкъяслы да микрокредит котыръяслы. Машинаӧн журъялысь 50 сюрс морт оз кӧсйы вештыны ГАИ-сянь штрап. 7,5-8 сюрс (на пиысь 1,5-ыс – нывбаба) вунӧдӧмаӧсь челядь йывсьыс да ур оз вичмӧдны найӧс быдтӧм вылӧ.
Став уджйӧзсӧ, тшӧтш и алимент, косӧдӧны удждонысь, пенсияысь, стипендияысь, сідз шусяна самозанятӧйлӧн нажӧткаысь да весиг больничнӧйысь. Кыдз шуӧны приставъяс, кокньыдджык пӧ вайӧдны, мыйысь оз косӧдны: дзебӧм-гуалӧм вылӧ сьӧмысь да челядьлы кутшӧмсюрӧ пособие-компенсацияысь, шуам, кага чужтӧмысь.
–А мыйла сы мындаӧн оз мынтысьны коммунальнӧй услугаысь?
–Та кузя уджйӧзыс воысь-во содӧ. И оз сы вӧсна, мый йӧзыслы вештысьны нинӧмӧн. Медводз «мыжаӧсь» войвыв каръяс – Воркута да Инта. Йӧзыс сэтысь овмӧдчӧны странаса шӧр да лунвыв регионъясӧ. А патерасӧ дыр кад оз вермыны вузавны, кодсюрӧ сэсся и дзикӧдз ӧвтыштчӧ. А коммунальнӧй услугаысь квитанцияыс быд тӧлысь воӧ, сідзкӧ, и уджйӧзыс содӧ.
–И мый татшӧмыскӧд водзӧ лоӧ?
–Татшӧм мортсӧ сэн и тан виччысьӧ кутшӧмкӧ мытшӧд. Важӧн кӧ кыдзкӧ-мыйкӧ позьӧ на вӧлі найӧс кытшовтны, талун уджйӧз йылысь юӧрыс ӧтуввез пыр воӧ быд ведомство-службаӧ, тшӧтш и пограничникъяслы.
Шуам, семьяыдкӧд ньӧбинныд суйӧр сайӧ путёвка, самолёт билет. Аэропортӧ воинныд, мӧвпнад шоныд саридз дорынӧсь нин, но матыстчӧ погона морт да юӧртӧ, ті пӧ дыр кад нин он мынтӧй 10 сюрс шайт штрап.
Дерт, мортыс сэні жӧ, аэропортас, вермас мынтыны та мындатӧ. Но, кыдз шуӧны приставъяс, тайӧ абу телефонысь телефонӧ здукӧн сьӧм вуджӧдӧм.
Сідз, неважӧн Сосногорскса олысьӧс сувтӧдӧмаӧсь аэропортас. Суд пристав юӧртӧма, тіян пӧ 230 сюрс шайт уджйӧз да нӧшта колӧ вештыны 16 сюрс исполнительнӧй сбор. Мортыд сэні и вештӧма став сьӧмсӧ, но семьяыс лэбӧма сытӧг. Ковмӧма вӧтӧдны сутки мысти.
Либӧ пристав службаӧ пекнича рытӧ котӧрӧн пырас морт, кӧсъя пӧ штрап вештыны да аски лючки лэбны отпускӧ. Мынтысяс, но сьӧмыс казначействоӧ воас сӧмын выльлунӧ. Та бӧрын нин приставлы юӧртасны, мый мортыс ставсӧ мынтіс.
Суйӧр сайӧ мунӧмысь ӧтдор уджйӧза морт оз вермы регистрируйтны, вӧдитчыны, кытчӧкӧ инавны, кодлыкӧ козьнавны машинасӧ, патерасӧ да мукӧд эмбур. Водзті тайӧс оз вӧлі позь вӧчны во джын, а ӧні – кытчӧдз он мынтӧдчы уджйӧзсьыд.
Овлӧ, мортыслы козьналісны стадионӧ вося абонемент. Но, овлӧ, локтас видзӧдны радейтана командаыслысь ворсӧмсӧ, а сійӧс оз лэдзны. Сӧмын сэки мортыс гӧгӧрвоӧ, мый арестуйтӧмаӧсь банкса став тшӧтсӧ. Уджйӧзыс кӧ 3 сюрс шайтысь унджык, арестуйтасны и эмбурсӧ, медым бӧрас инавны.
Та дырйи унаӧн ыстысьӧны ипотека вылӧ. Вештыся пӧ выль патераысь да ог вермы мынтыны штрап, алимент, вот да мукӧдтор. Но суд приставлы дзик став уджйӧзыс ӧткодь. Суд шуас косӧдны мыйтакӧ сьӧм, и миян сотрудникъяс корсьӧны, мый мортыслысь позьӧ босьтны-инавны та могысь.
Нӧшта на овлӧ, мортыслӧн 2 миллион шайта ипотека да та мында жӧ колӧ вештыны исполпроизводство серти. Но сійӧ полӧ воштыны выль патерасӧ да вештӧ ипотека, а судӧн индӧм уджйӧзсӧ оз косӧд. Тайӧ мыж нин, и таысь УК-ысь 177-ӧд статья серти кыскасны кывкутӧмӧ.
Ті кӧ босьтінныд банкысь сьӧм, удждінныд тӧдсаыдлысь, судӧдз колӧ сёрнитчыны, кыдзи мӧданныд косӧдны уджйӧзтӧ, ипотекатӧ да с.в. Весиг судын на позьӧ воӧдчыны ӧти кывйӧ. Но делӧыс кӧ воис приставӧдз, сыкӧд оз нин артмы сёрнитчыны. Сэсся кодсюрӧ чайтӧ, босьті пӧ 100 сюрс шайт, а мӧда косӧдны быд тӧлысь 5 сюрсӧн. Тадзи оз жӧ артмы, ковмас ӧтпырйӧ вештысьны ставсьыс.
–Комиын асланыс челядь дорӧ веськодь бать-мамыс чинӧ?
–Тавося январын суд приставъяс киын вӧлі 11.119 исполпроизводство. 1.815 панім, а 3.447-ӧс – помалім. 2.549 кузя быдтас йывсьыс вунӧдӧмалысь удждонсьыс мӧдасны косӧдны сьӧм, а 125 морт мынтӧдчӧма уджйӧзсьыс.
Май 1 лун кежлӧ колис туявны 7.670 делӧ. На кузя челядьсьыс пышъялысь 800 мортӧс корсям на. 90-ӧс кыским административнӧй кывкутӧмӧ, но штрапыд найӧс нинӧмӧ эз велӧд, та вӧсна Россия Федерацияса Уголовнӧй кодексысь 157-ӧд статья серти кыскасны уголовнӧйӧ. 180 татшӧм кӧк-бать-мам кузя панӧма нин уголовнӧй делӧ.
508 исполпроизводство серти уджйӧзалысь арестуйтӧма эмбурсӧ, 5.332 мортлы оз позь мунны суйӧр сайӧ, 959-лы – пуксьыны машина руль сайӧ, журъявны мотоциклӧн, катерӧн, яхтаӧн, мотовездеходӧн, квадроциклӧн, самолётӧн да мукӧд транспортӧн.
Суд приставъяс 3.875-ысь волісны предприятие-организацияса бухгалтерияясӧ да видзӧдлісны, лючки-ӧ косӧдӧны да вуджӧдӧны челядьыслы уджалысьыслысь алиментсӧ. Суд приставъяслӧн зільӧмӧн дзолюкъясӧс быдтӧм вылӧ таво воӧма 415,5 миллион шайт.
Республикаса каръясын алимент мынтысьыс этшаджык. Тані кокньыдджыка позьӧ аддзыны нажӧткатӧ. А сиктсалӧн татшӧм уджйӧзыс унджык. Помкаыс тшӧтш и уджтӧмалӧмын, сикт-грездын уналы некытчӧ инасьнысӧ да.
–СВО пӧ уналы отсаліс мездысьны уджйӧзысь……
–А быдсикас войтыр жӧ эм. Сідз, Сыктывкарысь 47 арӧса уджтӧмалысь кадысь кадӧ вуджӧдліс челядьыслы некымын шайтӧн. Татшӧм ногӧн 2022 вося августын сылӧн уджйӧзыс чукӧрмис 900 сюрс шайт. Мужичӧйыс кырымаліс оборона министерствокӧд контракт. Таво тулысӧдз вештіс челядьыслы джын мында алиментсӧ, а неважӧн ӧтчыдысьӧн – мӧд джынсӧ.
Ӧти сиктысь нывбаба нэмсӧ кодаліс, мортӧс виӧмысь весиг пукаліс дзескыдінын. Но мездысьӧм бӧрас дугдіс юны да муніс СВО вылӧ госпитальын санитаравны. Воліс отпускӧ да джынсьыс унджык уджйӧзсӧ вештіс. И тӧданныд, тайӧ вӧлі дзик мӧд морт, синмыс шуда, югыд. Спецоперация вывсянь водзӧ ысталіс верӧсыслы алимент вештӧм могысь сьӧм. Недыр мысти командирыс бара ыстӧма отпускӧ, мынтӧдчы пӧ нин алиментсьыс. Талун сылӧн некутшӧм уджйӧз абу.
И тадзи вӧчӧны унаӧн. Гортас волігӧн пыралӧны пристав дорӧ, тӧдмалӧны, мыйта колӧ мынтыны, да час мысти нин вайӧны 500-700 сюрс шайт вештӧм йылысь квитанция.
Но эмӧсь и сэтшӧмъяс, кодъяс СВО вылысь воӧм бӧрын оз тэрмасьны мынтыны уджйӧзсӧ. Кодсюрӧӧс кыйлім Москваса ресторанын, кӧні найӧ сысъялӧны вӧлі вирӧн нажӧвитӧм сьӧмсӧ…
–ФССП сайтын май 25 лунӧ йӧзӧдісны алиментысь пышъялысьяслысь восьса реестр. Мыйла тайӧ колӧ?
–Тайӧс вӧчисны мӧйму май 29 лунся 114-ӧд номера «Об исполнительном производстве» федеральнӧй оланпасӧ пыртӧм вежсьӧмъяс серти. Челядьыслы да тшӧтш и вермытӧм бать-мамлы уджйӧзасьӧм войтырсӧ реестрас пыртӧ ФССП. Таысь ӧтдор сэні юӧртсьӧ, кодӧс алимент кузя кыскылісны административнӧй да уголовнӧй кывкутӧмӧ либӧ корсьӧны. Ов-ним-вичтӧ сэтысь киритасны, вештанныд кӧ кагукыдлы, пӧрысь бать-мамыдлы судӧн индӧм став сьӧмсӧ. Мынтанныд кӧ колана мындаысь этшаджык, колянныд реестрас.
Приставъяс серти, реестрас казьтыштӧмыс ышӧдас мортсӧ кыдз позьӧ ӧдйӧджык мынтӧдчыны уджйӧзсьыс. Ӧд тайӧ вермас мӧрччыны удж кузяныд, сідз шусяна репутация вылад. Шуам, ті кӧ шыӧдчанныд пызан-шкап вӧчысь дорӧ, а сэсся тӧдмаланныд, мый сы вылын «ӧшалӧ» исполпроизводсто, ыліті кытшовтанныд татшӧм «мастерсӧ».
Талун реестрас веськалӧмаӧсь нин 2005 воын чужӧм том йӧз. Асьныс на челядь, а мынтӧны нин алимент.
–Кыдзи тӧдмавны мортыслы, абу-ӧ сійӧ уджйӧза аслас кагуклы?
–Панӧмаӧсь кӧ исполпроизводство, «Госуслуги» (fssp.gov.ruӦissӦip) пыр тайӧ юӧрыс воас мортыслы 30 минут мысти. Та вӧсна тшӧкыдджыка лыддьӧй электроннӧй письмӧястӧ.
Позьӧ звӧнитлыны 8(8212) 28-79-86 номера «пӧсь йитӧда» телефон пыр, а сідзжӧ 8(800) 303-00-00 номер пыр юасьны виртуальнӧй отсасьысь Полиналысь.
Панӧмаӧсь кӧ делӧ, а мортыс та йылысь оз тӧд, тайӧ оз мезды сійӧс кывкутӧмысь.
<> Николай РАЗМЫСЛОВ. Снимокъясыс авторлӧн да ӧтуввезйысь.