Коми Республикаса опера да балет театрын кыпыда муніс ветеранъяслӧн художествоа творчестволӧн «Катюша» фестиваль. Гажсӧ сиисны Айму вӧсна Ыджыд тышын Вермӧмсянь 80 во тырӧмлы.
Таво тайӧ конкурсас пырӧдчисны любитель котыръяс, Сыктывкарысь, Сосногорскысь, Ухтаысь, Печораысь, Интаысь, а сідзжӧ Сыктывдін, Кӧрткерӧс, Сыктыв, Емдін, Княжпогост, Кулӧмдін, Удора да Изьва районъясысь артист-ветеранъяс.
Концерт заводитчытӧдз видзӧдысьясӧс гажӧдісны баян улӧ войнадырся сьыланкывъясӧн, вӧлі лӧсьӧдӧма и мича фотозона. Та бӧрын сцена вылӧ петісны артистъяс. Найӧ и ӧткӧн, и хорӧн сьылісны, йӧктісны, лыддисны художествоа гижӧдъяс да ворсісны шылада инструментъясӧн.
Гала-концертӧ пырӧдчысь конкурсантъясӧс донъяліс жюри. Веськӧдлысьнас вӧлі Алёна Мальцева – «Ярмарка» котырын сьылысь, «Звёзды дорожного радио» премия босьтысь, «Песня года» фестивальса лауреат, Первой телеканалын «Голос» проектӧ пырӧдчысь.
Гран-при вичмис Кӧрткерӧсса культура да шойччан шӧринысь «Зыряночка» ансамбльлы «Баллада о сыне» сьыланкывйысь. Медводдза степеня лауреатӧн лои Помӧсдінса культура керкаысь ветеранъяслӧн «Сьӧлӧм сьылӧм» хор, найӧ сьылісны «Кык герой». Мӧд степеня лауреатӧн лои Ухтаса культура дворечысь ветеранъяслӧн хор. Найӧ дасьтӧмаӧсь Людмила Лядовалӧн «Старый марш» улӧ сідз шусяна попурри. Коймӧд тшупӧда лауреат ним босьтіс Печораса «Досуг» котырысь «Мы деревенские» дуэт «Солдатский вальс» сьылӧмысь.
«Вокально-хоровое творчество» нимпасын вермысьӧн шуисны Таисия Чередоваӧс. Сійӧ петкӧдчис Сыктывса клуб тэчассянь да нимкодьӧдіс «Если б не было войны» сьыланкывйӧн.
«Инструментальное творчествоын» медбурӧн лоис Интаса культура да техника дворечысь Анна Чабаненко. Сійӧ дасьтӧма Фредерик Шопенлысь Полонез №14 Соль-диез минор. Час сиктса культура керкасянь петкӧдчысь Галина Степанова вермис «Театральное творчество и художественное слово» нимпасын «И воис лун, кор помасис война…» кывбурӧн.
«Хореографияын» медбурӧн шуисны Сыктывкарса культура да искусство сӧвмӧдан керкаысь «Греннис» йӧктан котырӧс «Жду тебя» йӧктӧмысь.
Конкурсантъяслы сетісны дипломъяс, а вермысьяслы – козинъяс.
–«Катюша» фестиваль абу сӧмын концерт, но и кольӧм да ӧнія кад костын топыд йитӧд. Искусство нэммӧдӧ историяын тӧдчана лоӧмторъяс, и тайӧ рытпукыс талы бур пример. Зэв тӧдчана ышӧдны быдмысь войтырӧс радейтны чужан му, – висьталіс Коми Республикаса культура да архив удж кузя министр Гульнара Идрисова.
<> Гижӧдсӧ дасьтіс Екатерина МИКУШЕВА. Снимокъясыс ӧтуввезйысь.