Тэрыб отсӧг сетан медицина службаын уджалысьяс быд лун отсалӧны сьӧкыда висьмӧм да неминучаӧ веськалӧм йӧзлы. На лыдын и Юлия Русанова, коді уджалӧ Кӧрткерӧс районса шӧр больничаысь Шойнатыса тэрыб отсӧг сетан службаын фельдшерӧн.
Юлия Васильевна чужӧма-быдмӧма Шойнаты сиктын. 2006 воын помалӧма Сыктывкарса медколледж. Та бӧрын медводз уджалӧма Нёбдінса ФАП-ын, а сэсся, 2010 восянь да ӧнӧдз, Шойнатыын.
Мыйӧн кажитчӧ уджыс? Кутшӧм сьӧкыдлун-падмӧг овлӧ? Тшӧкыда-ӧ смена дырйи ковмылӧ ветлыны отсӧг сетны? Аслас кывкутана удж йылысь сійӧ окотапырысь висьтасис.
–Юлия, мыйла буретш медицина бӧрйинныд?
–Менам мам акушеркаӧн уджавліс, нылӧй велӧдчӧ медсестраӧ, а вокӧй тэрыб отсӧг службаын шопералӧ. Позьӧ шуны, миян семьяын быдса династия нин. Помнита, кор Шойнатыын роддом на вӧлі, мамӧй тшӧкыда аскӧдыс менӧ удж вылас босьтліс. Ичӧтдырйи пыр сэні бергалі.
Медводз окотиті велӧдчыны педиатрӧ. Но сэсся мӧвпышті, мый пукавны ог радейт, окота пыр кытчӧкӧ мунны-ветлыны. Сідзкӧ, скорӧйын уджыс сьӧлӧм сертиджык лоӧ. Велӧдчи фельдшерӧ да направление серти медводз веськалі Нёбдінса ФАП-ӧ. Но скорӧйын уджавны пыр окотиті. И кор Шойнатыын лои местаыс, пыр жӧ вӧзйыси сэтчӧ.
–Тэрыб отсӧг сетан кымын бригада уджалӧ Кӧрткерӧс районын?
–Кӧрткерӧс районын уджалӧ нёль бригада. Юрсиктас – ӧти юкӧн-отделение, а сэсся куим пост – Мордінын, Одыбын да Шойнатыын. Шойнатыын да Кӧрткерӧсын медикъяс уджалӧны сутки чӧж, а мукӧдлаас 17 чассянь асылӧдзыс, но шойччан лунӧ сутки чӧж жӧ.
Ӧти бригадаас пырджык кык фельдшер да шопер. Зілям сменаӧн. Овлӧ, сутки уджалам да куимӧс шойччам либӧ сутки бӧрын сутки шойччам. Но медикыс оз тырмы. Кодлы окота миянкӧд уджавны, виччысям. Местаыс эм.
–Кутшӧм сьӧкыдлун паныдасьлӧ смена дырйи?
–Кор тэрмасян висьысь дорӧ, он тӧд, мый виччысьӧ. Шуам, корисны юр висьӧмӧн, а локтан да… мортыслӧн инфаркт. Либӧ пуртӧн пӧ кодкӧ доймӧма, а сэні сӧмын парсыштчӧма, а овлӧ и, мортыс куланвыйын нин. Содтӧд на, висьысьяссӧ тшӧкыда аслыным ковмӧ нӧсилкаӧн кыскавны. Войнас ӧд кодкӧ дорӧ сьӧкыд шыӧдчыны, либӧ рӧдвужыс абу. Коді петкӧдас висьысьсӧ? Ставсӧ аслыным лоӧ вӧчны. Дерт, сьӧкыд. Но нинӧм вылӧ видзӧдтӧг уджыс меным кажитчӧ, йӧзкӧд тшӧкыда паныдасьлан-сёрнитан да. Нӧшта на долыдджык, кор отсалан налы, бур вӧчан.
–Ыджыд-ӧ участокныд?
–Кор сӧмын Шойнаты сиктын олысьясӧс вӧлі могмӧдам, и диспетчеръясыс сӧмын сэні вӧліны, эз ыджыд вӧв участокыс. А ӧні ставнас районсӧ ковмылӧ кытшовтны. Шойнатыса бригада ветлӧ Нёбдінсянь Одыбӧдз, Уръёльӧдз – тайӧ ставыс миян участок. Но кор Кӧрткерӧсса бригадасӧ кыт-чӧкӧ корӧмаӧсь, да воӧ сідз шусяна экстреннӧй вызов, ковмылӧ ветлыны миянлы и Визябӧжӧ, и Доддзӧ, и Мордінӧ.
Арнас да тулыснас рӧспута дырйи ӧткымын сикт-грездӧ сьӧкыд воӧдчыны, ю вомӧныс вуджаніныс абу да. Шуам, Керӧсӧ. Сэки миянлы отсӧг вылӧ воӧны Кулӧмдінысь уджъёртъяс. А ми кӧ Кулӧмдін пыр кутам воӧдчыны, зэв уна кад воштам. Миянлы ӧд 20 минут и сетсьӧ висьысь дорӧ воӧдчыны. Но та мында каднад и Пӧдтыбокӧдз он удит воны, мый нин шуны Уръёль йылысь. Смена дырйи шӧркодя 7-10 вызов овлӧ. Тшӧкыда корлӧны и курыд зелляӧн вывтіасьысьяс, кор юрныс висьӧ.
–17 во нин ті медицинаын. Мый интереснӧйыс вӧвлі?
–Коли паметьӧ регыд на вӧвлӧмтор. Тэрыб отсӧг сетан машинаын чужи кага. Эжва ю поскас и чужис, тшук эг удитӧй воны Кӧрткерӧсӧдз. Пыр полі, мед эськӧ, мися, татшӧмторйыскӧд ог паныдась. Но кор чужи кагаыс, дзоляник выль олӧм, дзик нин мӧд сьӧлӧмкылӧмъяс вевтыртісны.
–Бурдӧдысьыдлы, тӧдӧмысь, пыр колӧ тӧдӧмлун-сямсӧ кыпӧдны?
–2022 воын пырӧдчылі «Лучший фельдшер» республикаса конкурсӧ да босьті первой степеня диплом. Таысь кындзи кыкысь нин петкӧдчылі виччысьтӧм лоӧмтор да туйвывса неминуча бы-рӧдан ордйысьӧмӧ, кытӧн ассьыныс кужанлун-сямсӧ петкӧдлӧны быдсикас спецслужбаысь специалистъяс. Татшӧм конкурсъяс дырйиыс пыр мыйкӧ выльтор тӧдмалан, унатор пель саяд сюркнялан.
–Унаӧн, торйӧн нин томулов, овмӧдчӧны карын. Оз кыскы сэтчӧ?
–Верӧсӧй уджалӧ Шойнатыын кусӧдчан отделениеса командирӧн. Ичӧт пиӧй первой класс помалӧ, ыджыдджык нылӧй карын велӧдчӧ, но, гашкӧ, сиктӧ жӧ бергӧдчас. Тані менам радейтана семья, радейтана удж. И кытчӧкӧ мунны татысь ог кӧсйы.
<> Екатерина МИКУШЕВА. Снимокъясыс Юлия РусановалӦн гортса архивысь.