Кольӧмвося декабрь помын Ыбса В.И.Безносиков нима библиотекаын зільысьяс сиктса чужан му туялан музейын нуӧдісны школаын велӧдчысьяслы Владимир Иванович Безносиковӧс казьтылан рыт.
Тайӧ аддзысьлӧм дырйиыс пыдди пуктана гӧсьтъясӧн вӧліны краеведъяс да Выльгортса шӧр библиотекаын уджалысьяс.
Лои тшӧтш вӧчӧма президентсянь гранта конкурсын вермӧм «Ыбский бытоописатель» проектлы кывкӧртӧд.
Кыпыд рытсӧ нуӧдісны челядьлы экскурсия котыртлан «Ыбозаврята» бюроын водзмӧстчысьяс Игнат Мартюшев да Анастасия Колегова.
Найӧ зэв лӧсьыда висьталісны коми гижысьлӧн челядьдыр да томлун йылысь, тӧдмӧдісны творчествоын туй-визьнас.
Сідз, Владимир Безносиков ассьыс медводдза висьтсӧ – «Колхознӧй фермаын» – гижӧма 1953 воын. И тайӧ зарни туссяньыс сэсся чужӧма-быдмӧма-паськалӧма ставнас творчествоыс.
Сылӧн медводдза небӧгыс шусьӧма «Дружба йылысь висьтъяс», йӧзӧдӧма 1961 воӧ. Ставыс жӧ Владимир Ивановичлӧн петӧма висьт-повесьта 10 небӧг-чукӧр: «Дружба йылысь висьтъяс», «Жар гожӧм», «Свӧякъяс», «Свояки», «Вильыш Вӧръю», «Шалая речка», «Кӧні менам шудӧй?», «От зари до зари», «Чужан сиктын олам-вылам», «Ок, и мортлӧн олӧм».
Сылӧн став гижӧдыс чужан сикт да сэні олысьяс йылысь.
Повесьт-висьтъясас кызвыннас сёрниыс мунӧ збыль вӧвлӧмторъяс йылысь. Владимир Иванович оліс да уджаліс тайӧ йӧзыскӧд орччӧн, вочаасьліс накӧд клубын, улич вылын ли лавкаын.
Олӧмбыдсӧ сиктын коллялӧмӧн сійӧ серпасаліс-нимӧдіс сэні збыльвывса олӧмсӧ.
Висьт-повесьт кындзи Владимир Безносиков гижис и пьесаяс. Сылысь «Пож тыр дивӧ», «Кӧч гӧснеч» да «Мар-палӧн нимлун» тешъяссӧ пуктылісны Коми Республикаса драма театрын.
Владимир Иванович Безносиков – Коми АССР-са культураын заслуженнӧй уджалысь, СССР-са гижысь котырӧ 1991 восянь пырысь.
2006 воын сылы сетӧма «Сыктывдін районса пыдди пуктана олысь» ним.
Кыдзи пасйис Сыктывдінса библиотека тэчасӧн веськӧдлысьӧс вежысь Людмила Муравьёва, буретш сылы вичмӧма эскӧдны-корны районса сӧветысь депутатъясӧс сетны коми гижысьлы тайӧ почёта нимсӧ.
Культура керкаын уджалігас Владимир Безносиков республикаын медводдзаӧн босьтчӧма котыртлыны кывбуралысь-гижысьяскӧд аддзысьлӧмъяс.
Медводдза гӧсьтнас 1953 воын вӧлӧма Александр Лыюров.
Та бӧрын Владимир Ивановичлӧн корӧмӧн Ыбӧ волӧма нималана матӧ став кывбуралысь-гижысьыс.
И талун тайӧ бур уджсӧ Ыбса библиотекаын нуӧдӧны водзӧ. Ёна зільӧны видзны-нэммӧдны асланыс нималана земляк йылысь паметьсӧ.
Таын эскӧдӧ и «Ыбский бытоописатель» уджтас збыльмӧдӧмыс.
Библиотекаӧн веськӧдлысь Марина Колеговалӧн висьталӧм серти, проект кузяыс вӧлі вӧчӧма ыджыд удж: котыртлӧма В.И.Безносиковлӧн творчестволы сиӧм рыт-аддзысьлӧмъяс, дасьтӧма-гижӧма Владимир Ивановичлысь гижӧдъяссӧ челядьӧн лыддян видеороликъяс.
Таысь ӧтдор йӧзӧдӧма кык кывъя «Дружба» комикс да «Кымын кокаӧсь курӧгъяс?» висьта небӧгтор.
«Ыбский бытоописатель» уджтассӧ кывкӧрталан аддзысьлӧм дырйиыс чужан му туялысь, Коми Республикаса заслуженнӧй уджалысь Диана Григорьевна Холопова сетіс Ыбса библиотекалы зэв дона козин — Владимир Ивановичлысь аслас ёрт, коми гижысь Иван Васильевич Изъюровлы гижӧм письмӧяс.
Ӧти кывйӧн, «Ыбский бытоописатель» проектсӧ лои сигӧртӧма.
Но нималана земляк йылысь паметьсӧ тані олысьяс кутасны видзны да водзӧ туясьны.
В.И.Безносиков нима Ыбса библиотека мӧдас и водзӧ нимӧдны сылысь творчествосӧ.
<> Людмила Михайлова. Снимокъясыс авторлӧн.