2024 восӧ сигӧртігӧн Коми йӧзӧдчан керкаса газет-журналын зільысьяс шуим нӧшта ӧти аддзысьлӧм нуӧдны асланым лыддьысьысьяскӧд. Ылі туйӧ, дерт, эг нин петӧй, но Сыктывдін районса Выльгортӧ воӧдчылім. Да и сэтчӧс Эмилия Налимова нима история да культура музейӧ ёна нин кӧсйим ветлыны, торйӧн нин Россия пасьталаын нималысь Пас Налимов каньсӧ аддзӧдлыны.
Шыӧдчим музейӧн веськӧдлысь Владимир Муравьёв дорӧ, мися, верманныд-ӧ чукӧртны-корлыны тіян дорӧ тшӧкыда волысьясӧс да коми кывъя войтырӧс миянкӧд – коми журналистъяскӧд – аддзысьлӧм вылӧ? Дзик пыр и кӧсйысис Владимир Николаевич, нӧшта на пӧ и экскурсия нуӧдам!
И со декабрь 23 лунӧ ми мӧдӧдчим орчча Выльгортӧ. Музейӧ пырӧмсяньыс нин ӧвтыштіс кутшӧмкӧ торъя шоныдӧн да мелілунӧн. Буретш томуловлы вӧлі эштӧдӧны выльвося квест-вор-сӧм. Ок, и гажа коллялісны рытсӧ ныв-зон! А сэсся нин миянӧс вочааліс Владимир Николаевич. Регыд пӧ матыстчасны аддзысьлӧм вылӧ гӧсьтъяс, а бӧрас пӧ ставнас музейсӧ петкӧдла.
Зэв шоныд да ёрта сёрни артмис коми газет-журнал йылысь. Локтӧмаяс шуисны, збыль пӧ тіян петасъясыд мича лист бокаӧсь, да и гижӧдъяснас ньӧти оз кольччыны ӧнія олӧмсьыс.
Сыктывдін районса «Движение Первых» ӧтмунӧмын специалист Ольга Королёва тӧдчӧдіс, «Би кинь» журнал пӧ колӧ быть судзӧдны став школаас:
–Быд велӧдысьлы, школаса директорлы да велӧдан управлениеӧн веськӧдлысьлы колӧ ставсӧ вӧчны сы могысь, медым посниулов вермисны вӧдитчыны «Би кинь» журналӧн коми кыв урок дырйи. Кӧть кутшӧм петас киад он босьт – тайӧ быдса дась урок нин. Мукӧд гижӧд-кывбурсӧ некытысь он аддзы, сӧмын «Би киньысь»! Тайӧ зэв ыджыд отсӧг коми кыв велӧдысьлы!
Аддзысьлӧмсӧ сигӧртігӧн гӧсьтъяс вӧзйисны нӧшта ӧтчыд волыны Выльгортӧ да корлыны нин велӧдысьясӧс да районса велӧдан управлениеын зільысьясӧс коми петасъяс судзӧдны ышӧдӧм могысь.
А та бӧрын нин ми мӧдӧдчим Владимир Николаевич бӧрся восьлавны музейса жыръясӧд. Кык судтаа стрӧйбаын сы мында чукӧртӧм-лӧсьӧдӧм эмбурсӧ видзӧдны-донъявны ӧти рытыд оз тырмы! Та вӧсна каднымӧс дырджык вичмӧдім сервируйтан паньяса коллекциялы.
Уна во чӧж да став мир пасьта чукӧртӧма паньяссӧ музейлӧн важся ёрт, коллекционер, медицина наукаса доктор да профессор Игорь Васильевич Корабельников. И ӧд кутшӧм сӧмын пань абу?! Ставыс пӧ Игорь Васильевичлӧн чукӧрмӧма 6 сюрс гӧгӧр. Музейса джаджъясын абу уна петкӧдлӧма. Эзысь, ыргӧн, бронза, мельхиор, мӧс сюр, слӧн водзир, пу – мыйысь сӧмын абу вӧчлӧмаӧсь найӧс! Игорь Васильевич корсьӧма-чукӧртӧма паньяссӧ абу сӧмын Россияысь, но и Францияысь, Китайысь, Германияысь, Новая Зеландияысь да уна мукӧдлаысь. Ставсӧ тайӧс колӧ ас синнад аддзывны!
Сёр рыт вылӧ видзӧдтӧг Владимир Николаевич удитіс на миянлы ставнас музейсӧ петкӧдлыны. Збыльысь, зэв озыр да аслыспӧлӧс эмбур тані чукӧртӧма. Шуим мӧдысь дырджык кежлӧ на волыны!
Янсӧдчигӧн нин миян дорӧ петаліс музейса генеральнӧй директор Пас Налимов! Владимир Николаевич ошкигмоз шуис, тайӧ пӧ миян медбур уджалысь, шыр куталысь да керка видзысь!
<> Галина МАКАРОВА. Снимокъясыс авторлӧн да Елена Плетцерлӧн.