Сыктывкарса велӧдчысьяс пырӧдчисны «МедиаСпорт» профориентация уджтасӧ, кӧні велӧдчисны корреспондентӧ, операторӧ, видеографӧ да режиссёрӧ.
Татшӧм аддзысьлӧмъяссӧ нуӧдӧны «Спортивный медиамарафон «История сильных» уджтас серти. 2024 воын проектыс вермӧма Коми юралысьлӧн гранта конкурсын. Збыльмӧдӧны республикаса госслужба академия да «Академия развития личностных компетенций» АНО отсӧгӧн.
Декабрь 9-13 лунъясӧ томулов мӧдысь нин чукӧртчылісны, а медводдза аддзысьлӧмыс вӧлі ноябрын. Сэні велӧдчисны дасьтыны видеоконтент да спортын интервью. Та могысь на дорӧ волісны журналистъяс да видеографъяс. Аддзысьлӧмыс ёна кажитчис ныв-зонлы, интереснӧй вӧлі да.
Зэв тӧдчана, мый психолог велӧдіс колана ногӧн сёрнитны инвалидъяс, торъя военнӧй операцияӧ пырӧдчысьяс йылысь. Тайӧ тӧдӧмлуныс ковмас вермытӧмаяс йылысь видеороликъяс дасьтігӧн.
Татшӧмъяссӧ республикаын эз на вӧчлыны. Сэні висьталӧны оз сӧмын вермытӧмаяс йылысь, но и нимӧдӧны регионын сідз шусяна адаптивнӧй спорт.
Водзмӧстчысь томулов корсьӧны нин аслыныс геройясӧс. А кодлы оз сюр, отсаласны регионын «Айму дорйысьяс» государственнӧй фондын да адаптивнӧй спорт сикасын командаяс дасьтан да татшӧм спортсӧ нимӧдан республикаса шӧринын уджалысьяс.
Ныв-зон дорӧ волісны и спортсменъяс Геворг Киракосян, Семён Машкин да Даниил Турьев.
Геворг – самбоын да боевӧй самбоын спортса мастер, Эжва районса самбо федерацияӧн веськӧдлысь, унаысь вермылӧма быдсикас ордйысьӧмын.
Семён – пызанвывса теннис кузя Россияын спортса мастер, юниоръяс пӧвстын Рытыв-Войвыв кытшса чемпион, мужичӧйяс пӧвстын Рытыв-Войвыв кытшса чемпионатъясын вермысь да Коми Республикаса чемпион. Унаысь вермылӧма ставроссияса да регионса турниръясын.
Даниил – пауэрлифтинг кузя Россияын спортса мастер, 2023 воын пауэрлифтинг кузя Россияса эзысь призёр, Беларусьын пауэрлифтинг кузя войтыркостса вермасьӧмын эзысь медаль босьтысь, Коми Республикаын пауэрлифтингса рекордсмен.
Найӧ висьталісны асланыс олӧм да вермӧмъяс йылысь, мый медвылӧ донъялӧны, тӧдчӧдісны, мый оз ков повны сьӧкыдлунъясысь.
«История сильных» уджтасса нӧшта ӧти герой – радиоын уджалысь Семён Кулешов. Сійӧ нуӧдіс «Работа на публике без страха» тренинг да сетіс ныв-зонлы колана вӧзйӧмъяс, юксис аслас опытӧн.
Тренинг заводитчытӧдз на томулов заводитісны юасьны сылысь, и бӧрас зэв унаӧн шыӧдчылісны, Семён Кулешовлӧн висьтасьӧмыс ёна кажитчӧма да.
Ныв-зонлы сьӧлӧм вылас воис и Коми йӧзӧдчан керкаӧн веськӧдлысь Галина Макаровакӧд аддзысьлӧм. Галина Валерьяновна – ыджыд опыта да ассьыс уджсӧ радейтысь журналист. Тайӧс пыр и казялан, сьӧлӧмсяньыс висьтасьӧ да.
Спорт йылысь висьтасисны и бокс кузя тренер, А.С.Пушкин нима гимназияын физкультура велӧдысь Александр Тюрин да фитнес-тренер Вячеслав Захаревич. Найӧ нуӧдісны мастер-класс.
А «Интервью с неизвестным героем» юкӧнын петкӧдчис Матвей Тюрнин. Матвей – райдер, самоката спорт кузя тренер, ывлавывса спорт сикасъяс «СтарТуй» конкурсын вермысь, «Кардо» войтыркостса премияӧ пырӧдчысь.
Ныв-зон видлісны сямсӧ журналист уджын да пресс-конференция дырйи ёна юасисны гӧсьтъяслысь. Таысь кындзи налы нуӧдісны командаясӧн некымын ворсӧм, кытчӧ пырӧдчисны олимпиечьясӧс дасьтан 4-ӧд номера школаӧн веськӧдлысь Андрей Латкин (нуӧдіс спортивнӧй квиз), республикаса госслужба академияысь доцент Ирина Тюкавина (нуӧдіс «Мый? Кӧні? Кор?» ворсӧм) да фоторедактор Ассоль Мишарина (нуӧдіс «Совершенно Новогодний» нейроквиз).
«Спортивный медиамарафон «История сильных» уджтас серти лоас нӧшта кык аддзысьлӧм – 2025 вося январын да апрельын. Проектсӧ кывкӧрталасны кинопеткӧдчӧмӧн, кӧні тӧдмӧдасны ныв-зонмӧн медиамарафон дырйи дасьтӧм медбур уджъясӧн.
<> Екатерина МИКУШЕВА. Снимокъясыс ӧтуввезйысь.