Сыктывкарса администрация да «Коми войтыр» ӧтмунӧм нуӧдісны «Коми ань» конкурс, кытчӧ пырӧдчисны 25-сянь 50 арӧсӧдз да верстьӧджык аньяс. Найӧ петкӧдчисны юркарын кино видзӧдан да шойччан «Октябрь» шӧринын ноябрь 30 лунӧ.
Мам лунлы да Семья волы сиӧм гажыс колис кыпыда. Видзӧдысьяслӧн гораа клопайтӧм улӧ сцена вывсянь аньяс висьталісны ас йывсьыныс, сьылісны-йӧктісны, мойдісны, тӧдмӧдісны семьяпытшса традицияясӧн, ошйысисны пусян-пӧжасян сямнас, нуӧдісны и жюрилы мастер-класс.
Жюриын найӧс донъялісны коми фольклор туялысь, филологияса кандидат Александр Панюков, Коми Республикаса народнӧй артист Василий Рочев, «Коми войтыр» ӧтмунӧмын зільысь Михаил Канев, «Юрган» телеканалса национальнӧй дирекцияӧн веськӧдлысь Александр Пивкин да уна челядя семьяяслӧн Сыктывкарса ассоциацияӧн веськӧдлысь Елена Галева.
«Коми ань» позьӧ орччӧдны «Райда» конкурскӧд, но тайӧ вермасьӧмас пырӧдчисны верстьӧджык нин аньяс. Конкурсанткаяс дорӧ медшӧр корӧмыс вӧлі – бура сёрнитны комиӧн да петкӧдчыны асланыс челядькӧд.
И сідз, медводдза тшупӧда диплом да «Коми ань» ним шуисны сетны Юлия Туисовалы. Мӧд тшупӧда диплом да «Сьӧлӧмшӧр» ним вичмис Елена Михайловалы, а коймӧд тшупӧда диплом да «Шӧвктуг» ним босьтіс Мария Соколова.
* * *
Гажсӧ дасьтіс да нуӧдіс Сыктывкарса коми культура шӧрин. Отсасисны Сыктывкарса администрацияысь культура юкӧнын да «Октябрь» шойччан шӧринын зільысьяс, а сідзжӧ Тима Вень нима культура колледжысь студентъяс, «Зарни туис» сьылан котыр, вуджӧдчысь Любовь Матвеева, «Коми войтыр» ӧтмунӧмлӧн Сыктывкарса да Эжваса представительствояс, коми семьяяслӧн «Шуда котыр» клуб, Кулӧмдінса да Удораса землячествояс. Гажсӧ кыпыда нуӧдісны Евгений Сметанин да Мария Уляшева.
Ыджыд аттьӧ конкурсас пырӧдчысь аньяслы Коми му да чужан кыв, семьяпытшса традицияяс нимӧдӧмысь.
<> Екатерина Микушева. Снимокъясыс ӧтуввезйысь.