Октябрь 26 лунӧ Сыктывкар бердса Вылыс Максаковкаын воссис бурдӧдчан выль амбулатория.
Сэтчӧс медикъяс могмӧдӧны асланыс услугаясӧн посёлокас олысь 5,3 сюрс мортӧс, кодъяслы позьӧ шыӧдчыны отсӧгла терапевт, педиатр, фельдшер, стоматолог дорӧ. Ыджыд опытаӧсь и медсестраяс.
Выль амбулаторияын, дерт жӧ, водзӧ кутасны вӧчавны и быдсикас процедура да прививка.
Вылыс Максаковкаын олысьясӧс тайӧ тӧдчана лоӧмторйыскӧд йитӧдын кыпыд чукӧртчылӧм дырйи чолӧмаліс регионса юралысь Владимир Уйба.
Сылӧн висьталӧм серти, миян республикаын тайӧ коймӧд нин выль медучреждение, кодӧс восьтӧма октябрын.
–Ми корсям та могысь став позянлунсӧ, – тӧдчӧдіс Владимир Уйба. – Пырӧдчам «Дзоньвидзалун» нацпроектӧ, вичмӧдам сьӧм регионса правительстволӧн резерв фондысь, зілям соцпартнёръяскӧд ӧтув. Такӧд тшӧтш могмӧдам выль ФАП-амбулаторияяссӧ ӧнія бурдӧдан обору-дование-аппаратураӧн, корсям и медицинаса специалистъясӧс. Врач-фельдшерыс кӧ абу, а талун ылі сикт-посёлокын уналаын на уджалысьыс оз тырмы, бюджет весьтӧ кыпӧдам налы олан керкаяс. Сідз, Чилимдін районса Трусов сиктын стрӧитім татшӧмсӧ да, сэтчӧс медучреждениеӧ воис уджавны врач.
* * *
Казьтыштам, таво «Дзоньвидзалун» нацпроект весьтӧ, коді збыльмӧдсьӧ Россия Федерацияса президент Владимир Путинлӧн индӧд серти, Коми Республикаын кыпӧдӧма дас куим ФАП. Октябрь заводитчигӧн бурдӧдан выль амбулатория восьтӧма Сыктывдін районса Зеленеч сиктын.
Локтан воын регионса уджтас серти шуӧма нӧшта ньӧбны да сувтӧдны модуля кызь кӧкъямыс ФАП, стрӧитны Койгорт районса Подз да Луздорса Вуктым посёлокъясын бурдӧдчан амбулаторияяс.
<> Гижӧдсӧ дасьтіс Александра АРТЕЕВА. Снимокъясыс ӧтуввезйысь.