Сентябрь 14 лунӧ Коми Республикаса государственнӧй академическӧй опера да балет театрысь Надежда Баталова «Любовь земная и небесная» концертӧн пасйис артисталӧмыслы комын во.
Надежда Анатольевна татчӧс. Помалӧма Россияса театральнӧй искусство академия (РАТИ-ГИТИС).
Студенталігас петкӧдчылӧма Москваса «Экспромт» шылада театрын.
1993 воын Надежда помалӧма велӧдчӧмсӧ да бӧр воӧма чужанінас. Кыдзи казьтыліс артистка, опера да балет театрӧ медасигӧн петкӧдчӧма И.Кальманлӧн «Баядерка» опереттаысь юкӧнъясӧн: сьылӧма да йӧктӧма. И буретш тайӧ постановкаыс сылӧн медся радейтанаяс лыдын. А Мариэтта, кодӧс сэні ворсӧ Надежда Баталова, видзӧдысьяс серти, зэв аслыспӧлӧс да тӧдчана.
Надежда Баталовалӧн геройяс, кыдзи пасйӧны театрын, быд постановкаын аслыспӧлӧсӧсь да яръюгыдӧсь.
А дзирдалӧ енбиа артистка и операын, и опереттаын, и мюзиклын, и челядьлы постановкаын.
Дерт, мичаа артмӧ и сьыланкыв да романс. Репертуарас ветымын быдсикас роль.
Видзӧдысь радейтӧ Надежда Баталоваӧс. Торъя нин томуловлы сійӧ воӧ сьӧлӧм вылас.
–Челядьлы постановкаын ворсны сьӧкыдджык, – шуӧ Надежда Анатольевна. – Колӧ и мичаа йӧктыны, ворсны, мед эскисны, мед ыззьӧмӧн видзӧдісны, мый вӧчсьӧ сцена вылын. Ме радейта челядьлы постановкаяс, ӧд буретш сэні петкӧдчӧмыс и отсаліс видзны том да бура юрган гӧлӧс.
Пасйыштны кӧ Надежда Баталовалысь тӧдчана рольяссӧ, тайӧ Ж.Бизелӧн «Карменысь» Мерседес, Дж.Вердилӧн «Травиатаысь» Аннина, «Жозефина и Наполеонысь» Жозефина, Е.Птичкинлӧн «Бабий бунтысь» Дуняша да Семёновна, В.Ильинлӧн да В.Лукашовлӧн «Моя жена – лгуньяысь» Меджи Джексон да Бетси, М.Самойловлӧн «Дон Жуан в Севильеысь» Лючия, Е.Шашинлӧн «Кот в сапогахысь» Кот, В.Улановскийлӧн «Золотой цыплёнокысь» Цыплёнок, А.Дериевлӧн «Ох, уж этот царь Горохысь!» Настя да мукӧд.
Театрын зільӧм кындзи Надежда Анатольевна велӧдіс том артистъясӧс, юксис накӧд сьывны-ворсны кужӧм-сямнас.
Творчестволы сиӧм юбилей рытӧ видзӧдысьяслы артистка козьналіс шылада калейдоскоп: опера, оперетта, мюзикл, романс, сьыланкывъяс.
Дерт, вӧлі и радейтана «Баядерка» опереттаысь юкӧн.
Сцена вылӧ сыкӧд тшӧтш петалісны театрысь уджъёртъясыс, на пӧвстын Геннадий Муралёв, Галина Петрова, Анастасия Морараш, Яна Пикулева, Валерия Яремчук, Николай Калашников, Геннадий Гуляев, Александр Шахов (гуслиӦвокал), Анатолий Васильченко (гитара), Лариса Игнатова (скрипка), Тамара Вурдова (фортепиано), Виктория Тымкив (фортепиано) да театрбердса балет студия.
Рытсӧ нуӧдіс Коми Республикаса культура колледжын велӧдысь Ольга Степанова.
<> Екатерина МАКАРОВА. Снимокъясыс Коми Республикаса опера да балет театрысь.