Сентябрь 14 лунӧ Сыктывдін районса Ыбын нуӧдісны «Посади своё дерево» акция. Тайӧ водзмӧстчӧмыслы подувсӧ пуктылісны Москваын «Россия» выставка-форум дырйи.
Финн-йӧгра этнокультура парк дорын школаса лесничествоясысь челядь, вӧр овмӧсын да вӧр пӧрӧдан-заптан предприятиеясын уджалысьяс, власьт тэчасын зільысьяс, торъя военнӧй операцияын тышкасьысьяслӧн ныв-пиян садитісны кызь вит сюрсысь унджык пожӧм. Найӧ артмӧдісны 400 метр кузьта да 100 метр пасьта «Россия» кыв. Пу садитны воліс и Коми Республикаса юралысь Владимир Уйба.
–Пожӧмъясыс быдмыштасны да, «Россия» кывйыс ясыда кутас тыдавны, – висьталіс сійӧ. – Миян киӧн садитӧм пуясыс лоасны Айму вӧсна Ыджыд тышын странанымӧс да став мирсӧ фашизмысь мездысь геройяслы, «пӧсь точкаясын» да йӧзӧдлытӧм войнаясын усьӧмаяслы, неонацизмлы паныд ӧнія кадӧ тышкасьысьяслы, Россия асшӧрлунсӧ дорйысьяслы ловъя памятникӧн. Пуяс садитӧмнас ми ог сӧмын вӧр ловзьӧдӧй, но и петкӧдлам тшӧтш ассьыным ӧтувъялуннымӧс, Россия вынйӧрӧ да миян Победаӧ эскӧмнымӧс.
Акция дырйиыс жӧ вӧлі лӧсьӧдӧма торъя военнӧй операцияын усьӧмаяслы сиӧм аллея.
–Тайӧ пожӧма вӧрыс казьтыштас миян внукъяслы историянымӧс. Кольӧм кадтӧгыс оз вермы лоны ӧнія олӧмыс, а ӧніятӧгыс оз ло и аскиа луныс, – пасйис Владимир Уйба. – Аттьӧала быдӧнӧс, коді локтіс талун садитны пуяссӧ. Тыш-косьса ветеранъяскӧд воисны налӧн рӧдвужыс, матыссаясыс. И ми ӧтув вӧчам буртор, мый дыр кежлӧ коляс миян сьӧлӧмъясын. Мед пуясыс быдмасны, крепаммасны да казьтыласны миянлы Айму дорйысьяслӧн героизм, странаса аскиа лун вӧсна миян кывкутӧм йылысь.
* * *
Комиын вӧр садитӧм-ловзьӧдӧмлы сетсьӧ ыджыд тӧдчанлун. 2019 восянь регионын збыльмӧдсьӧ «Экология» нацпроектлӧн «Сохранение лесов» уджтас. 2023 воӧ пуяссӧ вӧлі садитӧма 63 сюрс гектарын. Комиын торъя фондын видзӧны ӧкмыссё килограммысь унджык пу кӧйдыс. Тайӧ тырмымӧн куим-нёль во вӧчны вӧр ловзьӧдан уджсӧ.
<> Гижӧдсӧ дасьтіс Павел СИМПЕЛЕВ. Снимокъясыс ӧтуввезйысь.