Мылдінын кыпыда восьтісны физкультураӧн дзоньвидзалун бурмӧдан-ёнмӧдан комплекс (ФОК).
Пытшкас эм ворсан, тренажёра да аэробика залъяс. Ӧкмыс спорт сикас кузя тані мӧдасны тренируйтчыны татчӧс спортшколаса 366 быдтас.
Комплексас позьӧ ворсны футболӧн, баскетболӧн, флорболӧн, бадминтонӧн, лыйсьыны ньӧввужйысь, а сідзжӧ песны вын-эбӧс пауэрлифтингӧн, сьӧкыд атлетикаӧн да йӧктан спортӧн. Тані вермасны пырӧдчыны спортӧ и вермытӧмаяс.
Рытъяснас татчӧ вермас волыны юрсиктын квайтымын олысь да дон вештытӧг ёнмӧдны ки-коксӧ физкультураӧн да спортӧн.
Казьтыштам, тайӧ уджтассӧ дасьтылӧмаӧсь 2016 воын, а стрӧйбасӧ босьтчӧмаӧсь кыпӧдны нёль во мысти. Пӧдрадчикыс кӧсйысьлӧма эштӧдны 2021 вося декабрын, но тыдовтчӧмаӧсь кутшӧмсюрӧ тырмытӧмторъяс. 2022 воын арнас графикысь кольччӧмаӧсь во. Сэки жӧ выльысь артасьӧмаӧсь да стрӧйбасӧ помалӧм могысь корӧмаӧсь 70 миллион шайт.
Сьӧм вичмӧдӧм бӧрын 2023 вося октябрӧдз вӧчӧмаӧсь 80 прӧчент уджсӧ. И бара ковмӧма вежны проект-смета документсӧ. Декабрын кӧсйылӧмаӧсь восьтыны комплекссӧ, но сэсся шуӧмаӧсь тайӧс вӧчны тавося апрельын. Та бӧрын эскӧдӧмаӧсь, майся праздник дырйи пӧ пытшкас позяс ворсны футболӧн.
Бӧръявыв районса администрацияӧн веськӧдлысь Алексей Целищев юӧртӧма, прӧверка бӧрын пӧ пӧдрадчикыс мыйсюрӧ дзоньталӧ-вежлалӧ на…
Водзтіджык татшӧм спорткомплексъяссӧ восьтісны Луздор районса Абъячойын да Ухтаын.
Став тайӧ стрӧйбасӧ кыпӧдӧма «Демография» нацпроектлӧн «Спорт – норма жизни» уджтас серти.
<> Гижӧдъяссӧ дасьтіс Николай РАЗМЫСЛОВ.
Снимокъясыс ӧтуввезйысь.