Май 16 лунӧ Коми Республикаса вужвойтырлӧн шылада-драмаа театр сигӧртіс ассьыс комын кыкӧд сезонсӧ «#КомиТеатрБыдӧнлы» ывлавывса концертӧн. Сыктывкарын олысьяс да налӧн гӧсьтъяс дон вештытӧг часысь дырджык вермисны кывзыны сьыланкывъяс.
Артистъяс сьылісны комиӧн, рочӧн да англия кывйӧн. Вӧчисны кывкӧртӧд сезонлы – гарыштісны выль спектакльяс, гастроль, кывбура-сьылана рытъяс. А сідзжӧ театр козьналіс билетъяс да сувениръяс «Миян театр» видеоролика конкурсӧ пырӧдчысьяслы.
Казьтыштам, колӧ вӧлі снимайтны видео, кыдзи ветлін коми театрӧ, либӧ петкӧдлыны коми авторъяслӧн гижӧдъяс серти гортса «театр» да пуктыны «ВКонтактеын» ас лист бокӧ. Конкурс вылӧ воӧма 19 видео.
Илля, шутёвт
32-ӧд сезон вӧлі озыр премьераясӧн. Медводдзаыс – «Илля лун» сьылана-ворсана петкӧдчӧм. Дасьтіс да петкӧдліс сійӧс «Парма» ансамбль, сиис 35 вося тшупӧда паслы. Мӧвпыс – Коми Республикаса народнӧй артистка Галина Подоровалӧн да Россияса заслуженнӧй артист Александр Ветошкинлӧн. Александр Ветошкин вӧчис сьыланкывъяслы аранжировка, велӧдіс мукӧд артистсӧ ворсны коми йӧзкостса инструментъясӧн. Спектакльсӧ пуктіс Россияса искусствоын заслуженнӧй уджалысь Светлана Горчакова. Сцена вывсӧ серпасаліс Анжела Разманова, паськӧмсӧ – Надежда Колпак.
Казьтыштам сюрӧссӧ, кытчӧ пыртӧмаӧсь Илля лунся традиция. Илля пророк лунӧ помасьӧ тувсовъя-гожся кадколаст.
Тайӧ лунсянь вундылісны нянь, да позис нин чипсасьны чипсан-пӧлянӧн. Ӧд водзджык кӧ чипсасин, эськӧ торкин сю-шобді быдмӧмсӧ. Кага кӧ шутёвтлӧма тӧдтӧг, шулӧмаӧсь, абу на пӧ ӧд Илля лун, мый шутьлялан, няньыс кынмас. Илля лунӧ сикт-грездын челядь да том йӧз вӧчавлісны чипсан-пӧлян, асывсяньыс рытӧдзыс вермисны чипсасьны. Сідзи и вӧлі шуӧны – «чипсасян, пӧлясян лун». А нӧшта Илля лунӧ пажынӧдз – гожӧм, пажын бӧрын – ар.
Тайӧ постановкаас чукӧртӧма коми войтырлысь шмонь, уна вунӧдлӧм нин важ сьыланкыв, петкӧдлӧма кывлысь мичлун да стӧчлун, а сідзжӧ кутшӧм мича шыладъяс позьӧ ворсны коми йӧзкостса инструментъясӧн, ӧтувтны кӧ найӧс ансамбльӧ.
Но и гозъя…
Сезонса мӧд премьера – Михаил Рощинлӧн «Валентин и Валентина» пьеса серти «Рощин.Live» шылада спектакль. Режиссёрыс – Семён Горчаков, серпасалысьыс – Мария Рогожина.
Унаӧн помнитӧны тайӧ пьеса сертиыс кино. Спектакльыс тшӧтш быттьӧ сьӧда-еджыда кино, сӧмын краситыштӧма кӧнсюрӧ турунвижӧн да кольквижӧн, быттьӧ матыстӧма ӧнія кад дорӧ.
Тайӧ спектакльыс томъяслы да томъяс йылысь. Лоасны-ӧ том ныв да зон ӧтлаынӧсь, кор кажитчӧ, мый налы паныд ставнас мирыс да олӧмыс? Геройяс уна мӧвпалӧны да вензьӧны, весиг видзӧдысьяслысь босьтӧны интервью, мый жӧ сэтшӧмыс радейтчӧмыс. Спектакльыс век жӧ сетӧ бур вылӧ лача. Тані юргӧ разнӧй жанра шылад да сьыланкыв, важся романссянь ӧнія кадсяӧдз.
Сідзжӧ декабрын вӧлі премьера – Италияса драматург Эдуардо де Филипполӧн «Филумена Мартурано» пьеса серти «Ми тэкӧд гозъя» сьӧлӧм нормӧдан теш.
Пуктіс сійӧс Светлана Горчакова, сцена вывсӧ серпасаліс Коми Республикаса заслуженнӧй уджалысь Юрий Самодуров, костюмъяссӧ мӧвпыштіс Надежда Колпак.
Геройяслӧн тэрыб вӧрасыс да сёрниыс, ыззяна этшыс пыр жӧ казьтыштӧ видзӧдысьяслы, мый спектакльыс итальянечьяс йылысь. Тані и серам, и шог, и радлун, и норлун, и чуймалӧм. Медшӧр сюрӧсыс гӧгӧрвоана быд войтырлы – тайӧ челядьтӧ радейтӧм да на понда олӧм, нэм кежлӧ муслун. Та вӧсна спектакльсӧ и сиӧма Семья волы.
Бал да юбилей
Тайӧ сезонса декабрын театр выльысь восьтіс ассьыс залсӧ дзоньтасьӧм бӧрын: выльмӧдӧма сцена джодж, мичмӧдӧма вестибюль да фойе. Та вӧсна лоис позянлун нуӧдны театрын экскурсияяс, а фойеын – бал да поэзия рыт.
Шуам, Выль во кежлӧ дасьтылісны медводдза классическӧй бал-маскарад, кӧні позис велӧдчыны йӧктыны важся балвывса йӧктӧмъяс. Нуӧдісны и шылада-кывбура рытъяс: Серафим Поповлы сиӧм «Эжва весьтын юргӧ кывбур» да Семья волы сиӧм «Ставыс, мый меным дона».
Таво жӧ артистъяс козьналісны видзӧдысьяслы Виктор Савин чужӧмсянь 135 вося тшупӧда паслы сиӧм «Парма сикӧтшын медъюгыд моль» велӧдана-тӧдмӧдана концерт. Медводз петкӧдлісны Кӧрткерӧсын, а сэсся Сыктывкарса велӧдчанінъясын, ливкйӧдлісны Нёбдінса Витторлысь сьыланкывъяс, лыддисны кывбуръяс, висьталісны олӧм да удж йывсьыс. Тайӧ сезонын жӧ театрса художествоа веськӧдлысь Светлана Горчакова пасйис сцена вылӧ петӧмсяньыс 55 во. Творчествоа бенефисын Светлана Гениевна казьтыліс ассьыс театрса нырвизьсӧ велӧдчӧмсяньыс ӧнія кадӧдз да петкӧдчис пьеса юкӧнын кыдз актриса.
Бара на Макар Васька
32-ӧд сезонын театрӧ воисны квайт выль артист, кодъяс помалісны Москваын Борис Щукин нима институт. Накӧд видзӧдысьясӧс театр тӧдмӧдіс «Поколение «Щ» концерт-презентация дырйи.
Том артистъяс тӧдмӧдісны, мыйӧ найӧс велӧдісны нёль вонас: сьылісны, лыддисны кывбуръяс, петкӧдлісны пьеса юкӧнъяс, вежлалісны образъяс.
Ставныс найӧ ворсісны нин ассьыныс медводдза ыджыд роль – «Макар Васька – сиктса зон» премьераын.
Геннадий Юшковлӧн пьесаыс дыр кад муніс театрын, сэсся дугӧдчылісны, артистъясыс верстяммисны да. Сэки кӧ спектакляс вӧлі неыджыд пролог ӧнія олӧмысь, рэп сьыланкывъяс коставлісны действиесӧ, ӧні тайӧ лои мӧд, выль постановка, дзик пьеса гижӧд сертиыс.
Режиссёрыс – Светлана Горчакова, серпасалысьыс – Юрий Самодуров. Ворсӧ артистъяслӧн кык состав.
Тайӧ тешсӧ радейтӧ некымын кӧлена нин. Абу дивӧ, мый и ӧні став петкӧдчӧм дырйиыс вӧлі зал тыр йӧз.
Выльысь аддзысьлытӧдз!
Выль 33-ӧд сезонын миянӧс виччысьӧ нималана коми гижысь Иван Тороповлӧн «Тіянлы водзӧ овны» повесьт серти драма.
Тайӧ повесьтыс петас сцена вылӧ медводдзаысь. Висьтавсьӧ сэні войнабӧрся челядьлӧн кадысь водз верстяммӧм да кывкутӧм, сьӧкыд, но сэк кадӧ вывті колана удж йылысь.
Кызь гӧгӧр во сайын театр пуктыліс нин Федя Мелехин йылысь циклысь «Но-о, биа бордаяс!» повесьт серти спектакль.
Видзӧдысьяс ӧнӧдз на сійӧс казьтылӧны кыдз медбур постановкаысь ӧтиӧс.
Воддза кыксӧ да нӧшта «Видза колян, мушкетёр!» повесьт театрса котыр неважӧн шыӧдіс да вӧчис аудионебӧг, кодӧс позьӧ кывзыны ӧтуввезйын театр сайтысь. <>
Евгения САВИНА.