Гожӧмъяснас аслас отпуск дырйи Крымын Саки карса «Северное сияние» санаторийын уджалӧ Воркутаысь Вадим Долгих.
Санаторийса генеральнӧй директор Олег Кирейшинлӧн кывъяс серти, некымын во сайын налӧн бурдӧдчанінӧ вайӧмаӧсь выль аппаратура, но сыӧн вӧдитчынысӧ специалистыс абу вӧлӧма.
–Тайӧ могнас ме шыӧдчи Коми Республикаын йӧзлысь дзоньвидзалун видзан министерствоӧ, ӧд санаторийным сылӧн борд улын, – висьталіс сійӧ. – Вӧзйисны Вадим Юрьевичӧс. Медводдзаысь воліс 2021 воӧ тӧлысь кежлӧ. Таво ми сійӧс гӧтырыскӧд бара на виччысям. Ӧтпыр и шойччасны, и миянлы отсасясны.
Вадим Долгих йылысь гижлӧмаӧсь и Сакиса «Слово города» газетын. Сэні уджалысьяс казьтыштісны, сыкӧд сёрниысь пӧ тыдовтчис, мый сійӧ – гинеколог, но кужӧ и мукӧд аппаратураӧн ноксьыны. Воддза воӧ пӧ ачыс бурдӧдчӧма Москваын да сы бӧрын бара на волӧма татчӧ уджавны.
Веськыда кӧ пӧ шуны, «Северное сияниеын» врачьяс зэв бурӧсь, медикъяс зільӧны. Со Владимир Браунер – енбиа морт, и миян газетын тшӧтш велӧдіс йӧзӧс дзоньвидзалунсӧ видзны да ёнмӧдны. Рубрикаыс пӧ сылӧн сідзи и шусис – «Советы от Браунера». А ӧти журналист сод- тіс на, ме пӧ и ассьым внукъясӧс Владимир Александрович дорӧ нуӧдла, сыысь бурджыка, гашкӧ, некод оз бурдӧд-отсав да.
«Слово города» газет мӧдӧма петны 1990 воӧ. Сакиын эм и районса газет – «Сакская газета». 1935 восянь сійӧс лэдзӧны, а «Слово городаыс» Саки карса сӧветлӧн петас, но лыддьӧны сійӧс и орчча сикт-посёлокын олысьяс.
Лоӧмторъясӧн, йӧзӧн, Крым да Саки историяӧн тӧдмӧдӧм кындзи гижӧны и курортъяс, санаторийяс, сэні шойччысьяс йылысь. Вежоннас кыкысь петӧ – пекничаӧ да субӧтаӧ. Ӧтар номерас лыддьысьысьяслы колана юӧръяс йӧзӧдӧны, а мӧдас сідз шусяна официальнӧй документъяс сетӧны, наӧн ӧд йӧзсӧ тшӧтш колӧ тӧдмӧдны.
Печатайтӧны газетсӧ Симферопольын, кызвын тиражыс гижӧдчӧм серти разалӧ, вузалӧны сідзжӧ лавкаясын, киоскъясын, тшӧтш и санаторийясӧ вичмӧдӧны, мед мукӧд регионысь воӧм войтыр тӧдмасисны жӧ Сакиын олӧм-вылӧмӧн.
Редакцияын зільысьыс абу уна. Главнӧй редакторӧс вежысьлысь удж вӧчӧ Зарема Пашаева, корреспонденталӧны Марина Задорожная да Елена Яковлева.
Елена Ильина висьтасис видеографӧн, соцсетьясын пӧ газет лист бок нуӧда, тшӧтш и видеосерпасъяс сэтчӧ дасьта. Дас вит во нин пӧ журналистала: медводз Сакиса кабельнӧй телевидениеын, а сэсся газетын.
Юрнуӧдӧ редакция котырӧн Эльвира Корук. Чужлӧма Эльвира Мухамедовна Узбекистанын, Ташкентса университетын помалӧма журналистика факультет, сэсся Узбекистанас жӧ уджалӧма «Ангренская правда» газетын. Стажӧй пӧ нелямын во, а «Слово города» газетыс менам сӧмын мӧд уджаланін на и эм.
–Бать-мамӧй татара, и 1990-ӧд воясӧ найӧ чужанінас, Казань карӧ, мунісны. А ме верӧскӧд Крымӧ локті, сійӧ национальносьт сертиыс крымса татарин, – висьталіс Эльвира Мухамедовна. – Сакиӧ воӧм бӧрын во кык эг вермы аддзыны удж, а сэсся медаси татчӧ главнӧй редакторӧс вежысьӧн. Ме радейта ассьым уджӧс, радейта Саки карнымӧс. Сійӧ кӧть и вель ичӧтик, но коді кӧть недыр олыштас тані, сылы быть мусмас карыс. Уна шойччысь воысь-во волывлӧны татчӧ. Саки тшӧкыда шулӧны инвалидъяслӧн юркарӧн, асьныд ӧд казявлінныд улич вылысь коляскаӧн ветлысьяссӧ. Крымас ӧд сӧмын миян карын вермытӧмаяслы вӧчӧма став коланасӧ, кыдз шуласны, – доступнӧй среда налы лӧсьӧдӧма. Эм торъя санаторий, кӧні найӧс бурдӧдӧны. Тӧлысь сайын тані воссис физкультура да дзоньвидзалун ёнмӧдан вель ыджыд комплекс, и медводдза ордйысьӧмсӧ сэні котыртлісны буретш вермытӧмаяслы, найӧ теннисысь ворсісны. Менам ви-дзӧдлас серти, аслыспӧлӧслуннас карным мусмӧ йӧзыслы.
Газет йылысь сёрнитігӧн Эльвира Мухамедовна пасйис, том специалистъясӧс пӧ редакцияӧ вель сьӧкыд корсьны, кӧть эськӧ Крымын журналистъясӧс велӧдӧны жӧ.
Рекламасӧ газетын йӧзӧдӧны Сакиса предприятиеяс, асшӧр уджалысьяс.
–Сьӧм нажӧвитӧм могысь ньӧбим полиграфия оборудование да йӧзлӧн, организацияяслӧн корӧм серти лэдзам небӧгъяс, печатайтам открыткаяс, грамотаяс, аттьӧалана гижӧдъяс, мукӧдтор. Та вӧсна миян кык верстайтчысь уджалӧ: ӧтиыс газет вӧчӧ, а мӧдыс полиграфия прӧдукция вӧсна кывкутӧ, – висьталіс Эльвира Корук. – Чайта, Коми Республикаса газет-журнал редакцияяс та-дзи жӧ содтӧд сьӧм нажӧвитӧны, тӧжд-могным ӧд миян ӧткодь.
Сакиын, кыдзи и ставнас Крымын, уна сикас войтыр олӧ: роч, украинеч, крымса татарин, белорус, мукӧд. И ми пӧ ставным ёртасям, пасйис Эльвира Мухамедовна, ладӧн олам. И редакцияын пӧ уна сикас национальносьта йӧз жӧ уджалӧны, но тайӧ ньӧти оз падмӧд миянӧс. Рочӧн пӧ петӧ газетным, но гижам став войтыр, налӧн традицияяс йылысь. И уджнымӧс бура донъялӧны, со Крым Республикаса «Мир толерантности» конкурсын лауреатъясӧн лоим.
–Ме татарка, верӧсӧй, кыдз висьталі нин, – крымса татарин. Кывным миян торъялӧ, и традицияясным тшӧтш. Но ми мусульмана, и тайӧ миянӧс, Волга бердын олысь да крымса татаринъясӧс, ӧтувтӧ. Сакиын во комын сайын кыпӧдлісны Янъы Джами мечеть, эм сэні и медресе, кӧні челядь тӧдмасьӧны мусульмана эскӧмӧн, – висьталіс Эльвира Корук.
Сакисянь неылын эм «Кара-Тобе» музей. Комиӧдны кӧ нимсӧ, лоас «Сьӧд мыльк». Тайӧ вывтасінас миян кадӧдз нёльӧд нэмын на овмӧдчылӧмаӧсь грекъяс, кык нэм мысти сэтчӧ локтӧмаӧсь скифъяс, а сэсся войнаӧн мыльксӧ босьтӧмаӧсь херсонесско-понтийскӧй войска да лэп-тӧмаӧсь башняа крепосьт. Историяыс сылӧн озыр, та вӧсна и 2000-ӧд вояс заводитчигӧн сэні восьтӧмаӧсь археология музей.
Веськӧдлысьыс, Владимир Агарков, «Слово города» газетса внештатнӧй корреспондент, гижӧ сэтчӧ Крымса да Саки районса история йылысь.
–Миян газетным медся бур! И редакцияын уджалысьяс тшӧтш жӧ медбурӧсь! – висьталіс Владимир Иванович.
И збыльысь тадзи…
Снимокъяс вылын: Эльвира Корук; Елена Ильина; «Слово города» газет редакцияын; «Кара-Тобе» музей.
<> Павел СИМПЕЛЕВ.
Снимокъясыс авторлӧн да ӧтуввезйысь.