Республикаса юралысь Владимир Уйба сетіс Изьва районлы ветлысь-мунысьӧс новлӧдлан кык выль автобус.
Ньӧбӧма найӧс «Машинаӧн ветлан бур да шыльыд туйяс» нацпроект серти федеральнӧй казначействоысь кредит весьтӧ.
Общественнӧй транспорт выльмӧдӧм вылӧ сьӧма отсӧгыс вичмӧ регионъяслы Россияса президент Владимир Путинлӧн индӧд серти. Комилы шуӧма вӧлі сетны 39 выль автобус ньӧбӧм вылӧ 300 миллион шайт.
Кыдзи юӧртлім нин, кольӧм во ноябрын Изьва районӧ вӧлі мӧдӧдӧма кык ПАЗ. Та пӧрйӧ войвыв муниципалитетын олысьяслы ньӧбӧмаӧсь Газ С41А23 Садко Neхt автобусъяс. Техникаыс вына, мӧдас кокниа журъявны ылі сикт-грездӧ, кытчӧ тулыс-арнас рӧспута дырйи сьӧкыд воӧдчыны.
Изьва районса администрацияӧн веськӧдлысь Игорь Норкин сикт-посёлокын олысьяс нимсянь аттьӧаліс регионса юралысьӧс да правительствоӧс выль техникасӧ вичмӧдӧмысь.
Казьтыштам, федеральнӧй казначействоысь кредит весьтӧ Комиӧ воӧма нин йӧзӧс новлӧдлан 27 автобус. Найӧс сетӧма Изьва, Чилимдін, Мылдін районъяслы, Печоралы, Усинсклы да Ухталы. Матысса кадӧ лоӧ вайӧма мукӧд 12 автобуссӧ. <>
Гижӧдсӧ дасьтiс Александра Артеева.
Снимокыс ӧтуввезйысь.