Март 28 лунӧ Россияса президентӧс Рытыв-Войвыв кытшын петкӧдлысь бердын сӧветлӧн чукӧртчылігӧн видлалісны округын Семья во нуӧдан могъяс. Вӧлі пасйӧма, мый найӧс колӧ веськӧдны том семьяяслы отсӧг сетӧм да унджык кага чужтӧм вылӧ.
Медым збыльмӧдны могъяссӧ, Комиын дасьтӧны торъя программа, кӧні индӧма ёнджыка отсавны семья лӧсьӧдны кӧсйысь том йӧзлы да уна челядя котыръяслы. Таво кык пӧв – 300 сюрс шайтӧдз – кыпӧдӧма семьялы регионса капитал, да 500 сюрсӧдз, медводдза кагасӧ чужтігӧн аньлы кӧ эз на вӧв 24 арӧс. Нӧбасьысь аньяслы да кагасӧ морӧс йӧлӧн вердысь мамъяслы сёян-юан ньӧбӧм могысь быд тӧлысь вештӧны 10 сюрс шайтӧн.
2023 воӧ республикаын вӧлі торйӧдӧма 100 миллион шайт, медым отсавны том семьяяслы ньӧбны либӧ кыпӧдны оланін. Татшӧм отсӧгсӧ вичмӧдӧма нин 81 семьялы.
Таво шуӧма восьтыны регионын семьяяскӧд уджалан медводдза шӧрин. Ӧтчыд волӧмӧн сэні позяс разьны социальнӧй отсӧг босьтігӧн артмӧм уна гӧрӧд.
Уна челядя семьяяслы, кӧні эм тыр арлыдтӧм куим ныв-пи, отсалӧны сьӧмӧн жилищно-коммунальнӧй услугаясӧн могмӧдӧмысь вештысигӧн, а школаын да вузын велӧдчысьяслы – автобус-поездӧн мунӧмысь мынтысигӧн.
Судзсьытӧма олысь ыджыд семьяясын челядьыслы паськӧм ньӧбны вонас сетӧны 7.368 шайт.
Апрель 18 лунӧ Коми Госсӧвет чукӧртчылігӧн видлаласны оланпас бала, кӧні индӧма, мый уна челядя семьялы социальнӧй отсӧгыс вичмас медыджыд кагаыслы 23 арӧс тыртӧдз, сійӧ кӧ очнӧя велӧдчӧ.
Котырлы, кӧні быдмӧ сизим либӧ унджык кага, машина либӧ снегоход ньӧбӧм могысь сетӧны 1 миллион 800 сюрс шайт.
2021 восянь та вылӧ сьӧмсӧ босьтӧма нин 63 семья. <>
Гижӧдсӧ дасьтiс Павел Симпелев.
Снимокыс ӧтуввезйысь.