Чилимдін сиктын «Дзоньвидзалун» нацпроект серти кыпӧдісны районса больничалы выль корпус.
Сэні меститчасны хирургия, реанимация, терапия да интенсивнӧй терапия, а сідзжӧ тэрыб отсӧг сетан юкӧнъяс. Вит судтаа стрӧйбаын лоас тшӧтш висьысь-нёрпалысьлы 63 койкаа стационар. Бурдӧдчанінӧ вайӧмаӧсь нин став колана аппаратура-оборудованиесӧ.
–Выль корпус стрӧитан могсӧ сувтӧдӧма вӧлі 2000 воын на. И со кызь нёль во мысти сійӧ дась, и сэні эм ставыс, медым и врачьяслы бура уджавны, и висьысьяслы лючки бурдӧдчыны. Эска, нацпроектъяс збыльмӧдігӧн ми унатор на вӧчам, – висьталіс выль корпуссӧ восьтігӧн Коми Республикаса юралысь Владимир Уйба.
Больничаӧ специалистъясӧс корсьны отсалас «Земскӧй доктор» уджтас. Выльӧн воӧм медикъяслы вичмӧдасны оланін. Ӧти патераӧ овмӧдчис нин бурдӧдысьяс семья – врач-терапевт да фельдшер. 2023 вося августын найӧ локтӧмаӧсь Комиӧ Калмыкияысь.
Республикаса бюджетын индӧма вичмӧдны сьӧм Трусов да Замежнӧй сиктъясын керкаяс ньӧбӧм вылӧ. Сэні кутасны овны сэтчӧс амбулаторияясӧ уджавны воӧм медикъяс.
Кыдзи висьталіс республикаса юралысь, регионса правительство зільӧ, мед Комиын быд олысьлы вӧлі сетӧма колана медицина отсӧг. Та могысь восьтӧны ӧнія кадлы лӧсялана медоборудованиеӧн да техникаӧн могмӧдӧм выль ФАП-яс, амбулаторияяс да медицина шӧринъяс.
<> Гижӧдсӧ дасьтіс Павел Симпелев.