Сыктывдін районса Паджга сиктын воссис «Культура» нацпроект весьтӧ кыпӧдӧм выль социально-культурнӧй шӧрин.
Такӧд йитӧдын кыпыд чукӧртчылӧм вылас сиктса войтыркӧд аддзысьлыны волісны республикаса юралысь Владимир Уйба, регионса Госсӧветысь спикер Сергей Усачёв, культураса да архивса министр Гульнара Идрисова, Сыктывдін районса администрацияӧн веськӧдлысь Любовь Доронина.
Паджгаын олысьяс дорӧ шыӧдчигӧн Владимир Уйба пасйис, мый татшӧм шӧринъясыс зэв коланаӧсь кыдз верстьӧлы, сідз и челядьлы.
Талун Паджгаын тайӧ выль учреждениеас уна сикас кружок-секцияӧ енби-сямсӧ сӧвмӧдны волывлӧ нин сё ветымынысь унджык нывка да зонка. И налӧн мам-батьыслы, верстьӧ и олӧма йӧзлы ӧні эм жӧ кӧні чукӧртчывны прӧст кадӧ, сьылыштны-йӧктыштны да гажӧдчыштны-шойччыштны.
Тайӧ кык судтаа социокультура шӧринсӧ кыпӧдӧм вылӧ видзӧма 178 миллион сайӧ шайт, сы лыдын федеральнӧй бюджетысь – 54 миллионысь унджык.
Тані восьтӧма 181 видзӧдысь вылӧ артыштӧм кыпыд да югыд зал, томуловлы искусство школа да ӧнія библиотека.
Искусство школаын сиктса челядь кутасны босьтны декоративно-прикладнӧй творчествоысь тӧдӧмлун-сям, сӧвмӧдны хореографияын ассьыныс енби, дерт жӧ, велӧдчыны ворсны фортепианоӧн, баянӧн да аккордеонӧн.
А библиотекаын – квайт сюрсысь унджык небӧг-журнал. Сиктын джынсьыс унджык олысьыс волывлӧ татчӧ лыддьысьны.
Библиотекаӧн веськӧдлысь Надежда Шишмакова нимкодясьӧ, шоныд да югыд пӧ тані, сэсся и орччӧн школа да, челядьлы кивыв лоӧ урокъяс бӧрын пыравлыны татчӧ выль небӧг-журналла.
–Паджгаын выль социокультура шӧринсӧ восьтӧмыс – сиктса челядьлы да томуловлы, а сідзжӧ налӧн бать-мамлы ыджыдысь-ыджыд козин. И торйӧн нин тӧдчана, мый вӧчӧма тайӧс буретш таво заводитчигӧн. Ӧд 2024-ӧдсӧ Россия Федерацияса президент Владимир Путинлӧн индӧд серти шуӧма семья нимӧдан воӧн, – кыпыд лоӧмторйыскӧд йитӧдын сиктса войтырӧс чолӧмалігӧн шуис регионысь культураса министр Гульнара Идрисова.
* * *
Казьтыштам, Паджгаын тайӧ выль шӧриныс, кодӧс сиктсаяс виччысьӧмаӧсь матӧ дас во, лоис миян республикаын татшӧм сизимӧд нин учреждениеӧн. Витсӧ кыпӧдӧма «Культура» нацпроект весьтӧ.
<> Гижӧдсӧ дасьтіс Александра Артеева.
Снимокъясыс ӧтуввезйысь.