Менам висерса воспитанньӧ (коді оз тӧд, сиктыс Кӧрткерӧс районын). Миян керканым Татар посёлокын (тадзи шуисны инсӧ, челядьыс уна вӧлӧма да). Суседъяс сӧмын зонъяс. Коркӧ войбыд сулалі пельӧсын: мам-бать тӧдмалісны, мый ми зонпосникӧд зорӧд сайын турун сі куритім. Сэки ме мӧдӧд классын велӧдчи. Тайӧ урокыс став олӧм кежлӧ. Ӧнӧдз ог курит. И тіянлы ог тшӧкты.
Витӧд классын менам юрӧй вӧрзис. Мыйла? Тышкаси одноклассниккӧд. Дзерӧдӧм бӧрын ме сылы шуи: «Юра, кыз юра». Збыль кӧ, юрыс эз ичӧт вӧв. И Юра менсьым юрӧс тшӧтш кызмӧдіс.
Ӧкмыс класс помалӧм бӧрын ме муні велӧдчыны Сыктывкарӧ. Кыдз тай йӧзыд шулӧмаӧсь: «Мозгыд абу – мун педӧ, яндзимыд абу – мун медӧ, ӧтарыс ни мӧдарыс абу – мун культпросветӧ». Муні педӧ, ичӧт челядьӧс велӧдысьӧ.
Школасянь менам кутшӧмкӧ «повышенное чувство справедливости», ог вермы терпитны, кор нинӧм абусӧ бызгӧны. И меным быть колӧ восьтыны вомӧс. Кӧть эськӧ мукӧддырйи бурджык ланьтӧмӧн овны, но терпенньӧӧй абу. Колледжын ӧти урок вылын нывъёрткӧд вӧлі зэв гораа сёрнитам. Велӧдысьыс бергӧдчис миянлань да шуӧ: «Нывъяс, тіянӧс мам-батьныд лёка велӧдӧмаӧсь, он кужӧй весиг велӧдысьӧс кывзыны». Менам пытшкӧсын пузис да, шуа сылы: а тіянӧс, мися, институтад лёка жӧ велӧдӧмаӧсь, уроктӧ интереснӧя весиг он кужӧй сетны.
Та вылын эськӧ поведенньӧ вӧсна велӧдчӧмӧй вермис помасьны, но ме бура велӧдчи, кӧть урок вылас ӧтпырйӧ сё удж верми вӧчны. И весиг методистъяс вӧлі мырдӧн ыстӧны менӧ школаӧ уджавны. Но Енмыс видзис! Практика дырйи медводдза уроксянь нин гӧгӧрвои – тайӧ ичӧтик лёкгагъясыс кӧ оз йирны менсьым юр вемӧс, то ме кула вина юӧмысь. Сы вӧсна мый сизим граммтӧг найӧс терпитны ме ог вермы.
Да, веськыд сёрниа морттӧ некӧн оз радейтны. Мыйлакӧ ставныслы колӧ, мед мавтыштісны, шыльыдджыка нюлыштісны. Кор муні уджавны Михаил Николаевич Бурдин дорӧ «Зарни Ань» ансамбльӧ, сэки ме гӧгӧрвои, мый татшӧм котырас меным бур. Медводдза лунас жӧ Михаил Николаевич кывзіс менӧ, а сэсся веськыда шуис: «Абу кыз, гӧлӧсыд гора, вомыд ыджыд, ныр розьыд паськыд, кокыд чукля, но сійӧ нинӧм. Кутам уджавны».
Сцена вылын уджыд – тайӧ торъя олӧм. Сцена вылӧ петалӧмыд – тайӧ гыж йирӧм кодь: ӧтчыд кӧ кажитчас, сэсся пыр колӧ. Ӧти концерт бӧрся матыстчӧ ме дорӧ вӧвлӧм велӧдысьӧй да шуӧ, ме пӧ тэныд макайті да макайті, а тэ пӧ мыйла эн макнит? Ті аддзылінныд «Зарни Аньлысь» костюмсӧ? Кок улӧдзыд пась, гӧныс ныртӧ гильӧдӧ. Ӧтар киад тотшкӧдчан, мӧдарас зиль-зёль, голяад ӧшалӧны чипсан да пӧлян. Пась улад зептад – буксан. И став тайӧ инструментнас ворсан ӧти номерын. Мед эськӧ оз вун, кытысь перйыны да кытчӧ бӧр сюйыштны! Сценасянь, дерт, ставыс тыдалӧ: коді шенасьӧ-нюмъялӧ, а коді мисьтӧм синмӧн видзӧдӧ, думайтӧ, он нин пӧ мунлы…
Мӧд делӧ, ӧні ме уджала телевидениеын. Ті тӧданныд, журналистӧн уджавны зэв интереснӧ. Асывсяньыс каблука туплиӧн котшкан администрацияӧ, а рытнас кузь гӧленя ботіасян да скачӧн котӧртан вӧчны мӧс карта йылысь репортаж. Но вермас и мӧдарӧ лоны.
Унаӧн кӧсйӧны уджавны телевидениеын. Думайтӧны, а мый пӧ тані сьӧкыдыс? Ме локта сэтшӧм «кодзув», менӧ краситасны, шыльӧдасны. Кӧні тані гардеробнӧйыс? Бӧръя медся мича паськӧмсӧ. Пукся студияӧ да мичаника вом вежньӧдлӧмӧн лыддя дасьтӧм текст. А сэсся пасьтася да муна. А фиг вам! Первой колӧ юр потмӧн гижны сійӧ текстсӧ. Мукӧддырйи эштӧдан ассьыд шедевртӧ, а эфирӧдз кольӧма 15 минут. Котӧртан, пӧсьыд шорӧн лэччӧ. Парикмахеръяс котӧрӧн тэнад куим юрси сісьыд вӧчӧны супер-пупер причёска. Юрситӧ летігкості тіралан киясӧн чышкан вом дорсьыд быгтӧ да мавтыштан гӧрдджык помадаӧн. И тадзи, предынфарктнӧй состояниеын, вит минут эфирӧдз пуксян нуӧдысьлӧн улӧсӧ. Звукӧвик блузка увтітӧ нуӧдӧ микрофон. Режиссёрлӧн команда: «Эфир!». И тэ нюмъялан чужӧмӧн висьталан республикаса выль юӧръяс. И экран мӧдарас пукалысьясӧс оз волнуйт, мый 18.30 минут, а тэ талун асывсяньыс эн на сёйлы, и рушкуыд мышкуыдкӧд ӧтлаасьӧма нин…
Анастасия Михайлова.