Кольӧм во Комиын судзсьытӧма олысь 2,2 сюрсысь унджык морт кырымалӧмаӧсь социальнӧй контракт, медым государство отсӧгӧнунджык сьӧм нажӧвитӧмӧн бурмӧдны ассьыныс олӧмсӧ.
Казьтыштам, судзсьытӧма олысьяслӧн эм позянлун социальнӧй контракт да государствосянь сьӧма отсӧг весьтӧ босьтчыны ичӧт бизнесӧ, сӧвмӧдны ас овмӧс, а сідзжӧинасьны удж вылӧ.
Коми Республикаса правительствоӧн веськӧдлысь – удж, занятосьт да йӧзӧс социальнӧя дорйӧм кузя министр Екатерина Грибковалӧн висьталӧм серти, такӧд йитӧдын государствосянь отсӧгыс тӧдчана. Сідз, асшӧрӧ уджӧ босьтчысьлы ӧтчыдысь вермасны сетны 350 сюрс шайтӧдз. 200 сюрс шайт шуӧма мынтыны ас овмӧс лӧсьӧдӧм могысь соцконтракт кырымалысьлы. Мӧйму удж вылӧ инасьны зільысьлы быд тӧлысь вештӧмаӧсь 19.035 шайт.
Йӧзыслы тайӧ кивыв да, унаӧн пырӧдчӧны соцконтракт кузя программаас. Кольӧм во татшӧм документ кырымалӧм 2.220 мортысь 1.127-ыс пуктӧмаӧсь ас водзаныс мог инасьны удж вылӧ, 669-ӧн босьтчӧмаӧсь асшӧр уджӧ, 160-ӧн лӧсьӧдӧмаӧсь ас овмӧс. Нӧшта 264 морт, кодъяс пыдди пуктана помка понда оз вермыны уджавны, шыӧдчӧмаӧсь, мед босьтны олӧманыс мытшӧд-падмӧг венӧм могысь государствосянь пособие.
И, кыдз тыдовтчӧма, соцконтракт кырымалысьясысь джынйыс государство отсӧгӧн да, дерт жӧ, иасланыс зільӧм-водзмӧстчӧмӧн сяммӧмаӧсь вены сьӧкыдлунъяссӧ да талун абу нин судзсьытӧма олысьяс лыдынӧсь.
«Демография» нацпроект вылӧ подуласьӧмӧн тайӧ уджтассӧ шуӧма збыльмӧдны Комиын и таво. Соцконтракт кырымалӧм кузя юалӧмъясӧн позьӧ шыӧдчыны кар-районын йӧзӧс социальнӧя доръян шӧринӧ, а сідзжӧ «Мои документы» МФЦ-ӧ.
<> Гижӧдсӧ дасьтiс Александра Артеева.
Снимокъясыс ӧтуввезйысь.