Прокор Вась тапиктіс лавкаӧ няньла. Асъя сёйӧм дырйи бӧръя шӧрӧмсӧ гӧтырыскӧд юкӧмӧн нин вомас сюялісны. Кӧдздӧдыштӧма ывлавылыс, туйыс вильыд лоӧма. Та вӧсна кыз ӧчкиа мортыдлы вель кузя ковмӧ чушиктыны верст да джынтӧ. Кылӧ, весиг кодкӧ суӧдіс да балябӧжас нин пӧлявны кутіс. Бергӧдчылӧмӧн видзӧдліс да, Павел Дарья вӧлӧма. Абу эськӧ томджык сыысь, но тэрыб кока на.
– Панйы, дышӧдіс нин тэнсьыд упкӧмтӧ кывзыны, – броткӧдчигмоз шуис Прокор Вась.
– Сувтыштлан кӧ, верма панйыны. А тадзитӧ ог. Кок вын эз нин кут лоны, – вочавидзис Павел Дарья.
Прокор Вась сувтыштліс да, ӧтлаасисны. И колӧ жӧ вӧлі синсӧ чӧвтлыны Кирӧ Марья керка вылӧ. Кӧзяйкаыс буретш ӧшинь дорас пуксьӧма да кинас ӧвтчӧ. Корӧ найӧс пыравны ли мый ли.
– Дарья, сувтыштлы.
– Мый нӧ лоис. Кильмыны кӧсъян али мый?– серӧктыштіс олӧма нывбаба.
– Тэнад да менам кильмыссьӧма нин. Со Кирӧ Марья тай ӧвтчӧ. Тэнӧ, тыдалӧ, пыравны чуксалӧ.
– Гашкӧ, тэнӧ да?
– Ме нӧ мый морла сылы ковми? Тэысь, важся нывъёртысь, тыдалӧ, гажыс бырӧма. Пырав, эн ышнясь.
Павел Дарья кежис чуксасьысь дорӧ, а Прокор Вась довгис водзӧ. Лавкаын ньӧбасис, кодсюрӧкӧд кыв-мӧдӧн сёрнитіс да, час джын кымын лэбыштіс. Гортас локтігӧн видзӧдліс Кирӧ Марья керка вылад да чуймис. Кӧзяйкаыс бара пукалӧ ӧшинь дорас да кинас ӧвтчӧ, пыравны чуксалӧ.
– Оз, вӧлӧм, ӧнтай Дарьяӧс кор, а менӧ, – шензьыштіс Прокор Вась. – Ковмас кежавны.
Векньыдик ордымӧд вель дыр матыстчис Кирӧ Марья кильчӧ дорӧдз. Кузя жӧ пыркӧдіс лымйысь гын сапӧгсӧ да пырис керкаас. Кӧдзыдвывсьыд ӧчкиыс руаліс да, тыдовтчис сӧмын кӧзяйкалӧн мыгӧрыс.
– Мый нӧ, Марья, лоис? Мыйла чукӧстін?
– Йӧйминныд али мый нин ставныд талун. Югдӧм бӧрас пукси ӧшинь дорӧ вурсьыны да некымынӧн нин кежалісны. Неважӧн Павел Дарья пыраліс и. Юасьӧ, мый могысь пӧ чукӧстін.
Прокор Вась чышкыштіс ӧчкисӧ да сӧмын сэк казяліс, мый Кирӧ Марья мыйкӧ вурӧ. Сюйыштас емсӧ дӧраӧ да суниснас вылӧ лэптыштас. Сэсся бара и бара. Ывласянь кӧ видзӧдны, збыльысь быттьӧ кинас ӧвтчӧмӧн пыравны корӧ. Прокор Вась нинӧм эз шу да петіс бӧр ывлавылӧ. И бара вель дыр воӧдчис мир туй дорӧдз.
– Йӧзсӧ мирӧмутитӧм дорысь мед эськӧ керка дорад пыран туйсӧ зыртін, – броткӧдчис сійӧ Кирӧ Марья вылӧ.
Алексей Попов.
