Ӧні челядь велалӧмаӧсь: мыйкӧ кӧ ковмис, дзик пыр – на! Бать-мам, кодъяслӧн челядьдырыс коли кольӧм нэмсяк ӧкъямысдасӧд воясӧ, шуӧны: «Дзоля дырйи менам нинӧм эз вӧв, и ме кӧсъя, мед кагалӧн вӧлі ставыс. Сы вӧсна, мый корӧ, сійӧс и ньӧба». Сідзкӧ, ми асьным веляммӧдам, ог велӧдӧй, мед виччысис либӧ терпитіс. А ӧд ми виччысим чужанлун, медым чӧсмасьны «Буратино»лимонадӧн. Ӧні жӧ быд лун дучкӧ ныбыдсикассӧ. Сыктывкарӧ кӧ вонас ӧтчыд лэччӧдласны да нуӧдласны Киров нима паркӧ гажӧдчыны, и таысь пасибӧ! А ӧнія челядьлӧн быд лун гаж.
Помнита, мамкӧд пыралім сельпо лавкаӧ, кӧні джаджйын сулаліс мича акань. Ме эськӧ ёна видзӧді сы вылӧ. Весиг шуи, мися, меным колӧ, но мам быттьӧ эз и кывлы. Мӧдысь шуи гортӧ мунігӧн, мися, аканьыс мича вӧлі… Колӧ… А мам вочавидзис, чужан лунӧдзыд пӧ ылын на. Та вылын и помасис ставыс. А куті кӧ ӧнія челядь моз дзайгыны либӧ лавка джоджын чужъясьӧмӧн туплясьны, сэки эськӧ лёзьӧд кыскалісны да ньӧръялісны.
Унаысь кывлан, колӧ пӧ вӧчны ставсӧ, сӧмын мед кагаӧс гажтӧм оз босьт. А мыйла эськӧ мед оз?! Буретш гажтӧмлуныс эськӧ и вӧтліс керкаысь да, ас коддьӧмыскӧд ворсісны-котралісны кутшӧмкӧ АС ЮРӦН мӧвпыштӧм ворсӧмысь. Миян дзолядырйи быдсикас ворсӧмыс вӧлі. Ӧні ӧти – гаджет. Сэні нинӧм мӧвпыштны оз ков, ставыс нин дась. Мыйла сылы юр жугӧдны? А колӧ эськӧ, мед уджӧдыштіс юр вемсӧ. Мый вылӧ сылы юрыс пельпом вылас? Сӧмын сёйны?! Арӧса кагалы бать-мам сетӧны телефон, мед сӧмын чӧв оліс, мультфильм видзӧдіс (а кутшӧмӧс петкӧдлӧны, тайӧ мӧд сёрни нин).
Челядьлы верстьӧсянь оз велӧдӧм ков, а аттракцион. Мыйла ныв-зон дышӧдчӧны велӧдчыны школаын? Да сы вӧсна, мый сэні налы гажтӧм. Дерт, велӧдысьлы колӧ дасьтыны уроксӧ сідз, мед школьникыслы вӧлі окота унджык тӧдмавны. Но век жӧ оз ков вӧчны велӧдысьысь аниматорӧс. Оз ков виччысьны, мый сійӧ кага водзын кутас чеччавны-вежнясьны. Да и урокыд – тайӧ абу спецэффектъяса кино. Быд велӧдысь – тайӧ тӧдӧмлун юкмӧс, кытысь колӧ гумлавны и гумлавны тӧдӧмлунсӧ. Кыдзи миянлы бать-мам шулывлісны: «Бура кывзы, ставсӧ пель сайӧ сюркняв». А сэсся гортын юаласны, мый выльсӧ тӧдмалім. И вӧлі висьталам. Ӧні жӧ тадзи оз юасьны. Либӧ кодкӧ кӧ юалас, кагаыс вочавидзас: «Нинӧм интереснӧйыс». А сійӧ эськӧ кывзіс эз? Али урокбыдыс телефонӧ сатшкысьӧмӧн тутвидзис.
Челядь дышмисны. А мыйла и уджавнысӧ, кор бать уджалӧ да быд лун сетӧ чипсы, газировка, гаж вылӧ сьӧм. Мам ставсӧ тэ бӧрся пелькӧдӧ-идралӧ. Оз жӧ тай дзик паньӧд да асмогасьӧм бӧрад … чышкы.
Водзті ми вӧлі классын дежуритам: дзоридз киськалам, джодж чышкам-мыськам, дӧска урок кежлӧ дасьтам, школа йӧрын ноксям. Сэсся и горт гӧгӧр удж вӧчам. Видлы мунны мачӧн ворсны, тасьті-паньыд кӧ няйт либӧ пескыд пырттӧм! Ӧнія велӧдчысьӧс кӧ тшӧктасны классысь джоджсӧ чышкыны – киыс усяс. А стӧчджыка кӧ, бать-мамыс жӧ и пиняласны тыр арлыдтӧмаӧс нартитӧмысь. Сідзкӧ, кодӧс ми асьным пӧльтам-быдтам?
Оланпас дасьтысьяс балябӧжсӧ жӧ гыжъялӧны, гашкӧ пӧ, школа олӧмӧ бӧр колӧ пыртны общественно-полезнӧй трудсӧ да. Но ӧдвакӧ артмас регыдъя кадӧн, сэтшӧма нин веляммӧдісны челядьсӧ право качайтны да.
Рина Карова.
Серпасаліс Ирина Бенько.