(Мӧд во тшак да вотӧс вӧрсьыд,
Власьтыд шуӧ, эн пӧ вӧрзьӧд!
Таво вотчам бӧръя во?
Сэсся вотчӧмным оз ло?..)
Мӧвпышті ме вежон шӧрас,
Мися, тшакла ветла вӧрас.
Мыйӧн воис шойччан луныд,
Асывсяньыс пыр и муні.
Ветлі таті, ветлі сэті,
Кытчӧ эськӧ тшакыд петіс?
Ме эг аддзы сійӧс ньӧти,
Сӧмын сулаліс… дзик ӧти.
Ыджыд, джуджыд, топыд, ён,
Быттьӧ мича бурлак зон!
Тайӧс кӧ ме пӧрӧда,
Кыдзи нопъям тӧрӧда?!
Ковмас вундыны ӧд кок,
Да и лӧсавны быд бок.
Мед кӧть сулалан тэ тшапа,
Ковмас торйӧдны и шляпа.
Недыр мӧвпалі ме чӧв.
Кыськӧ кыптіс ыджыд тӧв,
Тшакыд сэки вылӧ пӧри,
Менӧ кусыньтӧдіс шӧри.
Эз на су тай менӧ рӧкыд:
Тшакыд абу вӧлӧм сьӧкыд.
Сылӧн улысь петі-кысси,
Вӧрса шорын дыркодь мысси.
Гортӧдз тайӧс кыдзи нуа?
Менӧ татчӧ войыс суас…
Аски гаражӧ ме ветла,
Механик мед трактор сетлас.
Сійӧ тшакыдла и кайлас,
Сиктӧ, горт дорӧдзым ваяс.
Сиктса йӧзлы кывмӧн шуа:
«Ыджыд пӧртйын тшаксӧ пуам.
Коляс – кӧбреганым сюям.
Кынтам. Мӧд во сэсся сёям…».
Коркӧ, дерт жӧ, власьтыд вежсяс,
Воддза индӧд нитшкӧн эжсяс.
Кадсӧ огӧ кутӧй лотны,
Тшактӧ бара кутам вотны.
Александр Уляшев.
Серпасаліс Арсений Булышев.