Наставникъясӧс ышӧдӧм, том специалистъясӧс дасьтігӧн налысь пайсӧ тӧдчӧдӧм могысь удж, занятосьт да йӧзӧс социальнӧя доръян министерство нуӧдӧ «Лучшие практики наставничества. Лучшие наставники Республики Коми» конкурс. Вермысьяссӧ бӧръясны учреждение-организацияяс да торъя йӧз пӧвстысь.
Медым пырӧдчыны ордйысьӧмас, шыӧдчӧмыскӧд тшӧтш учреждение-организациялы либӧ конкурсын ордйысьны-вермасьны кӧсйысь мортлы колӧ юӧртны, мый вӧчӧны налӧн предприятиеын наставничествокӧд йитчӧм уджтасъяс збыльмӧдӧм могысь да кутшӧм водзӧс вайӧ тайӧ уджыс, индыны шедӧдӧмторъяссӧ.
Торъя йӧз вермасны венласьны конкурсас сӧмын сэк, налӧн предприятие-организацияыс кӧ тшӧтш пырӧдчӧ ордйысьӧмас.
Быд нимпасын вермысьясӧс наградитасны дипломӧн, а медбур наставникъяслы сетасны Коми Республикаса правительстволысь премия да сьӧма козин: медводдза местаысь – 500 сюрс шайт, мӧдысь – 300 сюрс да коймӧдысь – 200 сюрс шайт.
Конкурсӧ пырӧдчӧм могысь шыӧдчӧмсӧ да мукӧд документсӧ (торъя папкаын кабалаӧ гижӧмӧн да USB-флешкаын электроннӧйӧн) колӧ ыстыны октябрь 16 лунӧдз Коми Республикаса удж, занятосьт да йӧзӧс социальнӧя доръян министерствоӧ татшӧм адрес серти: 167610, Сыктывкар, Интернациональнӧй улича, 174-ӧд номера керка.
<> Гижӧдсӧ дасьтіс Павел Симпелев.
Снимокъясыс ӧтуввезйысь.