Талун миян олӧмын повзьӧдланаыс зэв уна. Но медся весьӧпӧртанаыс – терроризм. Неморт-террористъяс оз жалитны дзик некодӧс: челядьӧс, аньӧс ни олӧмаӧс. Татшӧмыслы морт олӧмыд веськодь.
Террорлы паныд водзсасьнытӧ колӧ ӧтув. Сійӧс бырӧдӧмыс – ставнымлӧн кывкутана мог.
Мый колӧ вӧчны терактысь видзчысьӧм да асьтӧ кулӧм-доймалӧмысь дорйӧм могысь?
Мед эськӧ тайӧ тӧдӧмлуныс тіянлы оз ковмы, но век жӧ олӧмад быдторйыс овлӧ. Сідзкӧ, лоӧй дасьӧсь!
Эновтӧм эмбур-кӧлуй
–Некор эн босьт тӧдтӧм мортлысь пакет-сумка, да и ассьыд дӧзьӧртӧг эн коль.
Эновтӧм кӧлуй-эмбур йылысь дзик пыр юӧрт полицияӧ.
–Вокзалын, аэропортын да вузасян шӧринын синйы содтӧд пыран-петанін. Неминуча-ускӧттьӧ дырйи кутан нин тӧдны, кодарӧ уськӧдчыны.
Мый новлӧдлыны сьӧрысь?
–Сьӧрад век колӧ босьтны мобильнӧй телефон да гижасян-записнӧй книжка. Сэтчӧ быть колӧ пасйыны (а бурджык юрад кутны) матысса-рӧдвужыдлысь номерсӧ.
Тайӧс колӧ юӧртны и челядьтӧ велӧдысьяслы да уджӧн могмӧдысьыдлы.
–Новлӧдлы сьӧрсьыд мездысьӧм могысь медся коланасӧ: ичӧтик пӧнар, ва доз, тӧдчана документ копия, ныр чышкӧд.
Веськалін кӧ террорист киӧ
–Эн весьӧпӧр, кут асьтӧ киад. Сёрнит лӧня.
–Вӧч ставсӧ террорист тшӧктӧм серти.
–Асьтӧ эн петкӧдлы. Окота кӧ чеччыны, вешйыштны мӧдлаӧ, юась.
–Эн видзӧд террористлы веськыда синмас.
ТӦД: героявны оз ков. Тэнад могыд – кольны ловйӧн.
Мездігӧн
–Оз позь котӧртны спецслужбасалы паныд – вермасны чайтны мыж вӧчысьӧн.
–Бурджык вод джоджас, сайӧд юртӧ кинад да эн вӧрӧдчы.
–Пет спецслужбаса дорӧ сӧмын налӧн чукӧстӧм-корӧм бӧрын.
Видз асьтӧ! Неминуча-ускӧттьӧ йылысь юӧрт 112 номерӧ.
<> https://gochs.rkomi.ru да www.rkomi.ru сайт кузя гижӧдъяссӧ дасьтіс
Елена ПЛЕТЦЕР.
Снимокъясыс ӧтуввезйысь.