Кольӧм вежонӧ республикаса правительстволӧн чукӧртчылігӧн видлалісны, кыдзи Комиын котыртӧма киссянвыйӧдз керкаясын олысьясӧс выль патераясӧ овмӧдан удж.
Кыдзи висьталіс чукӧртчылігас стрӧитчан да жилищно-коммунальнӧй овмӧсса министр Андрей Чибисов, республикаын 2017 вося январь 1 лун кежлӧ киссянвыйӧдз воӧмаӧн вӧлі шуӧма куим сюрс сайӧ патера.
Сэні олысьясӧс «Жильё и городская среда» нацпроект серти выль оланінӧ вуджӧдны урчитлӧмаӧсь 2024 вося июнь 30 лунӧдз. Ӧнӧдз жӧ выль патерасӧ сетӧмаӧсь сӧмын джынйыслы.
Бурджыка тайӧ уджыс мунӧ Княжпогост да Удора районъясын, Печораын, Соногорскын, Усинскын, Ухтаын да Сыктывкарын, кольччӧны Койгорт, Кӧрткерӧс, Сыктывдін, Мылдін, Емдін, Изьва да Кулӧмдін районъяс.
Андрей Чибисовлӧн кывъяс серти, 2017 вося январь 1 лун бӧрын киссянвыйӧдз воӧмӧн шуӧм керкаясын олысьясӧс выль патераясӧ вуджӧдӧм вылӧ сьӧмсӧ лоӧ торйӧдӧма республикаса правительстволӧн резерв фондысь. Таво сэтысь вичмӧдасны 330 миллион сайӧ шайт, медым выль оланінӧ вуджасны киссянвыйӧдз воӧм 129 патераын олысьяс.
Тайӧ могсӧ збыльмӧдны отсалас кар-сикт комплекснӧя сӧвмӧдан уджтас. Ӧні правительство корсьӧ сійӧс олӧмӧ пӧртӧм могысь сьӧм.
<> Гижӧдсӧ дасьтіс Павел Симпелев.
Снимокъясыс ӧтуввезйысь.