Республикаса юралысь Владимир Уйба ветлӧма Перым крайӧ видзӧдлыны, кыдзи Краснокамск карса кӧрта-бетона конструкция вӧчан заводын уджалӧ Комиысь стройотряд.
Правительствоысь чина йӧз кындзи делегацияас вӧлӧмаӧсь тшӧтш Коми Госсӧветӧн веськӧдлысь Сергей Усачёв, парламентысь депутатъяс Александр Попов да Андрей Климушев.
Казьтыштам, таво июньын Владимир Уйба аддзысьлӧма тайӧ предприятиенас веськӧдлысьяскӧд.
Кыдзи тыдовтчӧма, заводас, кӧні вӧчӧны тшӧтш и Сыктывкарысь Эжва районбердса Емвальын кыпӧдан выль школалы конструкцияяс, оз тырмы уджалысьыс. Унаӧн сэтысь мунӧмаӧсь
Украинаӧ тышкасьны неонацистъяслы паныд, а сідзжӧ вуджӧмаӧсь оборона предприятиеясӧ. И сэки Владимир Уйба сёрнитчӧма заводнас веськӧдлысьяскӧд налы отсӧг сетӧм могысь миян регионысь студент стройотряд мӧдӧдӧм йылысь.
Отрядас ӧтувтчӧмаӧсь Сыктывкарса политехническӧй, лесопромышленнӧй, автомеханическӧй, Сосногорскса технологическӧй, Печораса промышленно-экономическӧй да Коми Республикаса агропромышленнӧй техникумъясысь, юркарса торгово-экономическӧй колледжысь, Сыктывкарса государственнӧй да Ухтаса техническӧй университетъясысь, а сідзжӧ Сыктывкарса вӧр институтысь студентъяс.
Владимир Уйбалӧн висьталӧм серти, Краснокамскса заводас зільысьяслы абу кокни. Колӧ оз сӧмын вын-эбӧс. Смена дырйиыс урчитӧма уджавны дас кык час. Студентъяс кык сутки уджалӧны да кыкӧс жӧ шойччӧны. Но сэк жӧ налӧн удждонныс абу ичӧт, кодсюрӧ тӧлысьнас нажӧвитӧны 120 сюрс шайтӧдз.
И оланінныс бур, эм кӧні сёян-юан дасьтыны да мыссьыны-пывсьыны. А шойччан лунъясӧ позьӧ ветлыны Перым карӧ.
Та пӧрйӧ Краснокамскса заводӧн да Емвальын выль школа кыпӧдан «Петробалт» пӧдрада котырӧн веськӧдлысьяскӧд аддзысьлігӧн вӧлі шуӧма стройотрядысь 17 мортӧс вуджӧдны Емвальӧ школа гӧгӧрыс пелькӧдчан да мукӧд колана удж вӧчны, а мукӧд комынысь унджык зонсӧ, кодъяслӧн эм нин опыт-сямыс, кольӧдны водзӧ заводас уджавны, ковмас кӧ, и сентябрӧдз. И тайӧ лоас налы, кыдз шуӧма Владимир Уйба, производственнӧй практикаӧн. Содтӧд на, регионса юралысь эскӧдӧма, мый стройотрядын медбура уджалысьясыслы сетасны Коми Республикаса государственнӧй наградаяс.
Коми Госсӧветӧн веськӧдлысь Сергей Усачёв тӧдчӧдӧма, мый татшӧм стройотрядъясас уджыс том йӧзлы зэв тӧдчана. Найӧ ӧдйӧджык верстяммӧны да бурджыка гӧгӧрвоӧны, кутшӧм колана профессия бӧрйӧмаӧсь аслыныс, и водзӧ кутасны ёнджыка зільны, вуз-техникумас зумыдджык тӧдӧмлун-сям босьтны.
<> Гижӧдсӧ дасьтіс Александра Артеева.
Снимокъясыс ӧтуввезйысь.